KYE MEJEBʼLEʼN
2 Tuʼn tbʼaj kyonin kyibʼe
¿TIʼ T-XILEN?
Aqeju mejebʼleʼn in bʼaj kyonin kyibʼ, in che ok ik tzeʼn jun xjal in manejarin tukʼil juntl in nonin tiʼj. Ax lugar kyaj tuʼn kypon. Mintiʼ in che ximen oʼkx kyiʼjx, sino tiʼjju alkye mas bʼaʼn te kye, axpe ikx aj in che ok weʼ twitz nya bʼaʼn.
NABʼIL TOJ TYOL DIOS: «Kyjaʼtzun mya kabʼe kyten, noq junx kyten» (Mateo 19:6).
«Nim toklen tuʼn tbʼaj kyonin kyibʼ mejebʼleʼn tuʼntzun kukx kytzalaj» (Christopher).
¿TIQUʼN NIM TOKLEN?
Qa mintiʼ ma bʼaj kyonin kyibʼ mejebʼleʼn aj kyok weʼ twitz jun nya bʼaʼn, in che qʼojin kyxolx ex mintiʼ in che yolin tiʼj nya bʼaʼn. Aj tbʼet ambʼil, in chʼiy nya bʼaʼn maske nyaxix nim toklen aj t-xi tzyet.
«Nim toklen tuʼn tbʼaj kyonin kyibʼ mejebʼleʼn. Noqwit mintiʼ in bʼaj wonin wibʼe tukʼil nchmile, oʼkxlo in qo anqʼine junx toj jun ja. Jaku qo oke ik tzeʼn kabʼe xjal in che anqʼin toj jun ja, pero teyele te junjun tukʼil tbʼe ex mintiʼ in che kubʼ qeʼ ximel tiʼj tiʼ kxel kybʼinchaʼn» (Alexandra).
¿TIʼ JAKU BʼANT TUʼNA?
XIMANA TIʼJ JLU:
-
¿In kubʼpe t-ximana qa tjunalxa at toklen tiʼj pwaq in kanet tuʼna?
-
¿In kubʼpe tnaʼna qa il tiʼj tuʼn ttena tjunalxa tuʼn tojlana chʼin?
-
¿Mintiʼpe in yolina kyukʼil qe tfamilia tukʼila maske kygan tuʼn kyten junx?
JAKU CHE YOLINE TIʼJ JLU:
-
¿Alkyeqe tiʼchaq in xi qbʼinchaʼn toj tumel toj qmejebʼleʼn?
-
¿Alkye junjun tiʼchaq il tiʼj tuʼn qaqʼunan tiʼj?
-
¿Tiʼ mas jaku bʼant quʼn tuʼn tbʼaj qonin qibʼ?
JUNJUN NABʼIL TE KYEYE
-
Ximana tiʼj qa ik tten mejebʼleʼn ik tzeʼn aj in che saqchan xjal tiʼj tenis. ¿Tiʼ jaku bʼant kyuʼne tuʼn kysaqchane junx ex nya toj juntl equipo?
-
Miʼn ximana tiʼj tzeʼn jaku kambʼana, sino ximana tiʼj tzeʼn jaku che kambʼane kykabʼile.
«Nya nim toklen tuʼn qximan tiʼj alkye at tpaj. Aju mas nim toklen tuʼn tbʼant quʼn, aju tuʼn tten mujbʼabʼil ex tzalajbʼil toj qmejebʼleʼn» (Ethan).
NABʼIL TOJ TYOL DIOS: «Teyle junjun mya noq oʼkx tuʼn tok tqʼoʼn tkwent tiʼj aju at tajbʼen te, ax ikx tuʼn tok tqʼoʼn tkwent tiʼj aju at tajbʼen kye txqantl» (Filipenses 2:3, 4).
