KYE KUʼXUN
9 Ojtzqinka tibʼa
¿TIʼ T-XILEN?
Tuʼn tok tojtzqin tibʼa, nya oʼkx at toklen jlu tukʼil tbʼiya, tzeʼn keʼyina, sino ax ikx at toklen tukʼil tmoda, tukʼilju nimen tuʼna ex tukʼilju in bʼant tuʼna.
¿TIQUʼN NIM TOKLEN?
Qa ma tzʼel tnikʼa tiʼj alkye teya, jaku tzʼonin jlu tiʼja tuʼn tok qeʼ tkʼuʼja tiʼjju nimen tuʼna ex mlay txi tqʼoʼna ambʼil tuʼn tkubʼ tbʼinchaʼna aju in tzaj kyqʼamaʼn junjuntl kuʼxun.
«Ateʼ nim xjal ik kyten ik tzeʼn jun muñec, tuʼnju nya aʼyex in che kubʼ ximente alkye kyxbʼalun kʼokel kyqʼoʼn» (Adrian).
«Maske kwest in nela te weye, o tzʼok tilil wuʼne tuʼn nkoline tiʼjju bʼaʼn. Ojtzqiʼn wuʼne alkyeqe axix tok wamiwe tuʼn kymod in kubʼ kyyekʼin ex tuʼn nmode in kubʼ nyekʼine kyukʼil» (Courtney).
NABʼIL TOJ TYOL DIOS: «Miʼn che ok lpeʼye tiʼj kynabʼl xjal mya bʼaʼn, noq oʼkx kychʼexpum kynabʼle tuʼn kyoke te akʼaj» (Romanos 12:2).
¿TIʼ JAKU BʼANT TUʼNA?
Tuʼn tel tnikʼa tiʼj alkye teya ex alkye taja tuʼn toka, ximana kyiʼj tbʼanel tiʼchaq in bʼant tuʼna, kyiʼj tiʼchaq jun rat in kubʼ tiʼja kyuʼn ex tiʼjju nimen tuʼna. Tuʼn tel tnikʼa tiʼj jlu, ximana kyiʼj xjel ateʼ kubʼni.
Qe tbʼanel tiʼchaq: «¿Alkyeqe tbʼanel tiʼchaq in che bʼant wuʼne? ¿Alkye jun tiʼ mas list qine tiʼj? ¿Jun ratpe in tzaj nqʼoje? ¿Nganpeye tuʼn waqʼunane, tuʼn nbʼinchaʼne xtalbʼil ex tuʼn npone puntual?».
JUNJUN NABʼIL TE TEYA: Qa kwest tuʼn tel tnikʼa kyiʼj tbʼanel tmoda, qaninxa onbʼil kye ttata moqa te jun tbʼanel tamiwa tuʼn ttzaj tqʼamaʼn teya.
NABʼIL TOJ TYOL DIOS: «Teyle junjun tuʼn tikʼ twitz tiʼj tex taqʼunbʼen; kyjaʼtzun bʼaʼn tuʼn ttzalaj tiʼj taqʼunbʼen ex mya tiʼj taqʼunbʼen juntl» (Gálatas 6:4).
Qe tiʼchaq jun rat in kubʼ tiʼja kyuʼn: «¿Alkyeqe nmode il tiʼj tuʼn tkubʼ nchʼexpuʼne? ¿Toj alkye ambʼil waje tuʼn tkubʼ nbʼinchaʼne jun nya bʼaʼn? ¿Toj alkye ambʼil jun rat in tzaj nqʼoje?».
NABʼIL TOJ TYOL DIOS: «Qa in qmaʼn qa mintiʼ qil, in qsbʼun qibʼ quʼnx qibʼ, ex ju yol axix tok mintiʼ tuj qanmi» (1 Juan 1:8).
Aju nimen tuʼna: «¿Alkyeqe kawbʼil in nok nqʼoʼne toklen ex tiquʼn? ¿In nokpe qeʼ nkʼuʼje tiʼj qa at Dios? ¿Tiquʼn qʼuqli nkʼuʼje tiʼj qa at? ¿Tiquʼn in kubʼ nximane qa mintiʼ in xi bʼinchet kyiʼj tiʼchaq toj tumel? ¿Alkye nxime at tiʼj ambʼil tzul?».
NABʼIL TOJ TYOL DIOS: «Aju tnabʼla bʼaʼn ex tojtzqibʼla che okel te kolil tiʼja» (Proverbios 2:11).
Bʼalo ax ikx tgana jlu
TZAQʼWEBʼIL TIʼJ 10 KYXJEL QE KUʼXIN
¿Alkye qine?
Qa ma tzʼel tnikʼa tiʼ in bʼant tuʼna ex tiʼ mintiʼ in bʼant tuʼna, ex alkye tajbʼila tuʼn tbʼant tuʼna, ex qeju tiʼchaq nimen tuʼna kʼonil tiʼja tuʼn tjaw tjyoʼna aju mas bʼaʼn aj ttzaj kyqʼamaʼn junjuntl tuʼn tkubʼ tbʼinchaʼna aju nya bʼaʼn.
