Jaku kubʼ qnaʼn bʼis ex jaku tzaj yabʼil qiʼj tuʼnju at nim nya bʼaʼn. Tuʼntzunju, qa in qo ok weʼ twitz jun nya bʼaʼn, jaku tzaj bʼaj qkʼuʼj. Aj tbʼaj jlu, ¿tiʼtzun in bʼant kyuʼn junjun xjal?

• At maj nya kyaj tuʼn kyximen tiʼj ambʼil tzul.

• In che kʼan qʼeʼn ex in najbʼen droga kyuʼn.

• Atzun junjuntl in kubʼ kyximen qa mas bʼaʼn tuʼn kykyim ex in tzaj kyqʼamaʼn jlu: «¿Tiquʼn kukx kʼokel tilil wuʼne?».

• Nyalo toj tkyaqil ambʼil ktel nya bʼaʼn in nok weʼya twitz ex jaku che kyaj toj ttxolil.

• Qa mintiʼ in kyaj nya bʼaʼn toj ttxolil, jakulo che bʼant junjun tiʼchaq tuʼna tuʼn texa twitz.

• In tzaj tqʼamaʼn Tyol Dios qa kʼelel qʼiʼn tkyaqil nya bʼaʼn te jumajx.

In tzaj tqʼamaʼn Tyol Dios jlu: «Miʼn bʼaj kykʼuʼje tiʼj ju te nchiʼj, porke aju te nchiʼj texte tbʼis ktzajel. Aju nnikʼx quʼn tuj jun qʼij, akuxju» (Mateo 6:34).

Miʼn ximana tiʼjju kbʼajel nchiʼj. Miʼn tzaj bʼaj tkʼuʼja tiʼjju kbʼajel toj juntl qʼij tuʼnju jaku tzʼel tiʼn ambʼil teya tuʼn tok tqʼoʼn twiʼya tiʼjju in bʼant tuʼna.

Qa oʼkx in ximana kyiʼj tiʼchaq jaku che bʼaj, jaku kubʼ tnaʼna siktleʼn ex jaku tzaj bʼaj tkʼuʼja tuʼn.

Xi tqʼamaʼn jun xjal kubʼ ttzʼibʼin jun salmo jlu te Dios: «Ik tten tyola ik tzaʼn jun kandil te ẍaqlul weye, in tqʼoʼn spikʼun tuj nbʼeye» (Salmo 119:105). ¿Tiʼtzun kyxilen yol lu?

Qa atoʼ toj qlolj, jaku tzʼonin jun kandil qiʼj moqa jun lámpara tuʼn tten spikʼun toj qbʼe. Ax jlu in bʼant tuʼn Tyol Dios, jaku che onin tconsej qiʼj tuʼn tel qnikʼ tiʼjju jaku bʼant quʼn.

Jaku tzʼonin tspikʼumal jun lámpara qiʼj tuʼn tok qkeʼyin tiʼ tkubʼ toj qbʼe. Ex atzun jlu in bʼant tuʼn Tyol Dios, in tzaj tyekʼin qe tiʼ kbʼajel toj ambʼil tzul.