AT NIM NYA BʼAʼN
1 | Xqʼuqink tibʼa tuʼn miʼn ttzaj yabʼil tiʼja
¿TIQUʼN NIM TOKLEN?
Aj qok weʼ twitz jun ambʼil kwest, jaku tzaj yabʼil qiʼj toj junxichaq tten.
-
Aj tok weʼ jun xjal twitz jun nya bʼaʼn toj nim ambʼil, mas jun rat in tzaj yabʼil tiʼj tuʼnju in tzaj bʼaj tkʼuʼj.
-
At maj mintiʼ in che kanin qʼanbʼil ex nya nim kybʼet doctor tuʼn kyqʼanit xjal.
-
At maj mintiʼ in kanin kypwaq xjal tuʼn ttzaj laqʼet qe tiʼchaq at tajbʼen kye, ik tzeʼn wabʼj moqa qʼanbʼil.
¿O tzʼok tbʼiʼna?
-
Qa ma tzaj nim yabʼil tiʼja ex qa ma tzaj bʼaj tkʼuʼja, jaku txi tbʼinchaʼna junjun tiʼchaq nya toj tumel aj t-xi tqʼanin tibʼa. Ex tuʼn jlu, jaku tzaj mas yabʼil tiʼja.
-
Qa mintiʼ ma txi tqʼanin tibʼa, jaku txiʼ yabʼil toj il ex jaku kyima tuʼn.
-
Qa mintiʼ yabʼil tiʼja, mas toj tumel kbʼel t-ximana junjun tiʼchaq kyoj ambʼil kwest.
-
Noq jniʼ tpwaqa at, jaku bʼant junjun tiʼchaq tuʼna tuʼntzun miʼn ttzajxix yabʼil tiʼja.
¿Tiʼ jaku bʼant tuʼna?
Qa jaku bʼant, aju xjal at tnabʼil in ximen kyiʼj junjun nya bʼaʼn jaku che tzaj ex in jyon tumel tuʼn tok t-xqʼuqin tibʼ kyiʼj. Qa taja tuʼn miʼn ttzajxix yabʼil tiʼja, bʼaʼn tuʼn tok tilil tuʼna tuʼn tbʼaj tsaqin tibʼa. Mas bʼaʼn tuʼn tok t-xqʼuqin tibʼa tuʼn miʼn ttzaj yabʼil tiʼja twitzju tuʼn tjyona tumel tzeʼn tuʼn tqʼanit.
«Tuʼnju in bʼaj qsaqin qibʼe ex tuʼnju in jaw qiʼne tzʼis toj qjaye, mintiʼ in bʼaj qnajsaʼne nim pwaq kyiʼj qʼanbʼil ex kyukʼil doctor» (Andreas). *
^ Ma che kubʼ chʼixpet junjun bʼibʼaj.
Bʼalo ax ikx tgana jlu
¡WEʼKTZA!
¿Tiʼ jaku bʼant quʼn tuʼn miʼn ttzaj bʼaj qkʼuʼj?
Xnaqʼtzana kyiʼj junjun nabʼil jaku che onin tiʼja tuʼn miʼn ttzaj bʼajxix tkʼuʼja.
