Ateʼ nim xjal in nok tilil kyuʼn tuʼn kyaqʼunan tkyaqil qʼij tuʼntzun tkanet aju at tajbʼen kye junjun xjaw. Noqtzun tuʼnj, kwest in nela kye tuʼnju at nim nya bʼaʼn. ¿Tiquʼn?

• Qa ma tzaj nya bʼaʼn toj jun lugar, chʼixme tkyaqil maj in jax kywiʼ tiʼchaq ex chojbʼil ja.

• Mas kwest tuʼn tkanet aqʼuntl ex mintiʼxix in tzaj chjoʼn twiʼ kykʼuʼj xjal.

• Qa ma tzaj jun xitbʼil tuʼnx twitz txʼotxʼ moqa junjuntl nya bʼaʼn, jaku che naj kʼaẍjel, qe ja ex junjuntl tiʼchaq. Tuʼn jlu, nim xjal in che kyaj mebʼa moqa prow.

• Qa in najbʼen pwaq toj tumel tuʼna, mas kʼonil tiʼja aj tok weʼya twitz jun nya bʼaʼn.

• Mlay tzʼok qeʼxix qkʼuʼj tiʼj pwaq, tiʼj txʼotxʼ ex kyiʼj tiʼchaq tuʼnju jaku che naj.

• Nya tkyaqil jaku laqʼet tuʼn pwaq, ik tzeʼn tuʼn qtzalaj moqa tuʼn tten mujbʼabʼil qxol kyukʼil toj qja.

In tzaj tqʼamaʼn Tyol Dios jlu: «Qa at qwa ex at qxbʼalun, qo tzalaj tiʼj jlu» (1 Timoteo 6:8).

Tuʼn qtzalaj, nya a t-xilen qa il tiʼj tuʼn tten tkyaqilju qajbʼil, sino tuʼn qtzalaj kyiʼj tiʼchaq at tajbʼen qe. Nim toklen tuʼn ttzaj qnaʼn jlu, mas qa mintiʼxix qpwaq.

Bʼalo il tiʼj tuʼn tbʼant junjun chʼixpubʼil tuʼna toj tanqʼibʼila tuʼntzun ttzalaja. Qa mas nim pwaq in bʼaj tnajsaʼna twitzju in kanet tuʼna, tzul nya bʼaʼn tiʼja.