Atzun jlu tqʼama jun grupo xjal at kyojtzqibʼil tej kyyolin tiʼj chʼixpubʼil in tzaj tiʼj clima. Qa in nok qeʼ tkʼuʼja tiʼj qa at jun Bʼinchal tkyaqil ex qa at tkʼuʼj kyiʼj xjal, jakulo ximana tiʼjju o bʼant tuʼn Dios tuʼn tbʼaj tsaqin tibʼ Txʼotxʼ juntl maj.

Pero mintiʼ in bʼaj tsaqin tibʼ Txʼotxʼ tjunalx tuʼnju o tzʼok kybʼinchaʼn xjal nim nya bʼaʼn tiʼj. ¿Tiquʼn jaku tzʼok qeʼ qkʼuʼj tiʼj qa kxel tbʼinchaʼn Dios jun tiʼ tuʼn tkolin tiʼj Txʼotxʼ ex kyiʼj xjal?

Aqeju texto ateʼ toj recuadro at toj t-xaq lu in tzaj kyyekʼin qe qa mlay kubʼ naj Txʼotxʼ ex qa kukx ktel anqʼibʼil twitz.

• A Dios kubʼ bʼinchante Txʼotxʼ. «T-xe tnejel kubʼ tbʼinchaʼn Dios kyaʼj ex txʼotxʼ» (Génesis 1:1).

• A Dios tajaw Txʼotxʼ. «Te Qman Dios tkyaqil twitz txʼotxʼ» (Salmo 24:1).

• Kubʼ tbʼinchaʼn Dios Txʼotxʼ tuʼn tten te jumajx. «Kubʼ tqʼoʼna txʼotxʼ tibʼaj tqʼuqbʼil tuʼntzun miʼn tyukch tuj tlugar» (Salmo 104:5).

• Kubʼ tbʼinchaʼn Dios Txʼotxʼ tuʼn kukx tten anqʼibʼil twitz. «Ate Qman o [ . . . ] bʼinchante txʼotxʼ [ . . . ] ex mya o bʼant tuʼn tuʼn tten noq kukx, noq oʼkx o tbʼincha tuʼn kyten xjal twitz» (Isaías 45:18).

• Tzaj ttziyen Dios qa che anqʼil xjal twitz Txʼotxʼ te jumajx. «Qe xjal bʼaʼn ok che etzal tiʼj ju txʼotxʼ, ex ax che tel tuj te jumajx» (Salmo 37:29).

O kubʼ tbʼinchaʼn Dios Txʼotxʼ tuʼn tbʼaj tsaqin tibʼ ex jaku tzʼaqʼunan toj tumel qa ma tzʼok qxqʼuqin. Ik tzeʼn in tzaj kyqʼamaʼn profecía tkuʼx toj Tyol Dios, ya o kubʼ t-ximen Qman Jehová a toj alkye ambʼil kbʼel tnajsaʼn qe xjal in nok kybʼinchaʼn nya bʼaʼn tiʼj Txʼotxʼ (Apocalipsis 11:18).

In tzaj ttziyen Biblia qa aj tbʼaj tkyaqil jlu, kʼokel Txʼotxʼ te saq ex te jun Paraíso tuʼn Dios. Ex kjapunel kywi yol lu: «Tkyaqil in xi tqʼoʼna kye ax tuʼn t-xtalbʼila, ex in che noj kykyaqil qe tchʼisbʼena» (Salmo 145:16).