¿TIʼ KBʼAJEL TIʼJ TXʼOTXʼ?
Qe mar
NYA oʼkx in che kanet junjun tiʼchaq toj mar tuʼn t-xi qwaʼn, sino ax ikx junjuntl tiʼchaq in che ajbʼen tuʼn kybʼant qʼanbʼil. Ax ikx, in che onin tuʼn tten mas te tmij kyqʼiqʼ in xi qjakʼuʼn ex in che onin tuʼn tkubʼ naj dióxido de carbono. Nya oʼkxju, ax ikx in che onin mar tuʼn tten jun tbʼanel clima.
¿Tiquʼn nim toklen tuʼn tok qxqʼuqin mar?
Tuʼnju in chʼexpaj clima jaku tzaj nya bʼaʼn kyiʼj lugar jatumel ateʼ coral, kyiʼj txkup ex junjuntl tiʼchaq ateʼ toj mar. Kyiʼj kykyaqil txkup ojtzqiʼn kyuʼn xjal, 25 tiʼj 100 in nanqʼin tuʼnju ateʼ lugar at coral toj. Noqtzun tuʼnj, in tzaj kyqʼamaʼn científico qa bʼalo jaku che kubʼ naj lugar jatumel ateʼ coral aj tikʼ juntl 30 abʼqʼi.
Ateʼ pájaro in che anqʼin ttzi mar ex in tzaj kyqʼamaʼn xjal at kyojtzqibʼil qa atlo 90 tiʼj 100 o txi kywaʼn plástico. Ex toj junjun abʼqʼi, in che kyimlo nim millón txkup ateʼ toj mar tuʼn tpaj plástico in pon toj.
Toj abʼqʼi 2022, tqʼama António Guterres aju secretario general kye Naciones Unidas jlu: «Ya mintiʼ in nok qxqʼuqin mar toj ambʼil jaʼlo. Tuʼntzunju, il tiʼj tuʼn t-xi qbʼinchaʼn jun tiʼ tuʼntzun tok xqʼuqit».
Kubʼ bʼinchaʼn Txʼotxʼ tuʼn tten anqʼibʼil twitz
O kubʼ bʼinchaʼn mar ex tkyaqilju at toj tuʼn tbʼaj tsaqin tibʼ ex tuʼn tten toj tbʼanel. Pero oʼkx jaku bʼaj jlu qa mintiʼ ma kux kyxoʼn xjal tzʼis toj mar. In tzaj tqʼamaʼn jun libro qa noqwit tzʼok xqʼuqin jun plaj mar tiʼj tkyaqil contaminación in bʼant kyuʼn xjal, «kukx jaku tzʼok mar te saq tuʼnx tibʼ» (Regeneration: Ending the Climate Crisis in One Generation). Qo xnaqʼtzan kyiʼj junjun techel:
-
Toj mar, ateʼ junjun tal kʼul fitoplancton tbʼi ex mintiʼ qʼanchaʼl qe. In xi kyjakʼuʼn tal kʼul lu dióxido de carbono moqa kyqʼiqʼ tzʼil, aju gas mas in ten kyaq twitz Txʼotxʼ tuʼn. Chʼixme ax dióxido de carbono in xi tjakʼuʼn fitoplancton ik tzeʼn in xi tjakʼuʼn tkyaqil kʼul ex tzeʼ at twitz Txʼotxʼ.
-
Ateʼ junjun microbio in xi kywaʼn aju t-restil kyxmilal pescad otoq che kyim ex in che onin tuʼn tten mar saq. Yajxitl, in xi kywaʼn txkup ateʼ toj mar qe microbio lu. In tzaj tqʼamaʼn jun tqanil tiʼj mar qa aj tbʼaj jlu, «in nonin tuʼn tten mar saq ex tbʼanel» (Smithsonian Institution).
-
At aʼ tzʼil toj mar ex jaku che kyim coral tuʼn, qe marisco ex junjuntl txkup. Noqtzun tuʼnj, ateʼ nim txkup toj mar in najbʼen toj kykʼuʼj kyuʼn tuʼn tbʼaj kysaqsaʼn aʼ.
¿Tiʼ in bʼant kyuʼn xjal tuʼn tok kyxqʼuqin mar?
Qa ma che ajbʼen junjuntl tiʼchaq quʼn te kyxel bolsa ex botella te plástico, qo onil tuʼn tten mar saq.
Nya il tiʼj tuʼn tbʼaj limpiarin mar noqwit mintiʼ in pon tzʼis toj. Tuʼntzunju in tzaj kyqʼamaʼn xjal at kyojtzqibʼil tuʼn miʼn kyajbʼen bolsa te plástico quʼn ex tuʼn kyajbʼen junjun tiʼchaq jaku che ajbʼen nimku maj quʼn.
Pero mlay tzʼok mar te saq noq tuʼnju in bʼant jlu quʼn. Tzma in nikʼ chʼin ambʼil, jaw kyiʼn xjal in che xqʼuqin kyiʼj mar junlo 8,300 tonelada tzʼis ttzi mar toj 112 tnam. Pero noq oʼkx jun tonelada lu tiʼj mil tonelada tzʼis in pon toj mar junjun abʼqʼi.
In tzaj tqʼamaʼn jun revista jlu kyiʼj mar: «Bʼalo ya mlay tzʼok mar te saq juntl maj» (National Geographic). Ex in tzaj tqʼamaʼntl jlu: «Tuʼnju at nim contaminación kyuʼn combustible fósil in najbʼen kyuʼn xjal, ya mintiʼ in che xkyeʼ txkup ateʼ toj mar tuʼn tbʼaj kysaqsaʼn».
¿Tiquʼn jaku tzʼok qeʼ qkʼuʼj tiʼj qa kukx ktel mar saq? Aju in tzaj tqʼamaʼn Tyol Dios
«Nojni twitz txʼotxʼ tuʼn tchʼisbʼena. Lu mar at maʼ twitz ex matij wen jatum in che chmet nimku jil; at jil chʼin ex at nmaq» (Salmo 104:24, 25).
Kubʼ tbʼinchaʼn Dios mar tuʼn tbʼaj tsaqsan tibʼ. Ximana tiʼj jlu: Qa ojtzqiʼn mar tuʼn Dios ex tkyaqilju at toj, ¿mintiʼpe tnabʼil tuʼn t-xi tbʼinchaʼn tiʼj tkyaqil nya bʼaʼn o tzaj tiʼj mar? Qʼonka twitza tiʼj xnaqʼtzbʼil «In tzaj ttziyen Dios qa kukx ktel Txʼotxʼ» toj página 15 toj revista lu.
