¿Tiʼin bʼaj tukʼil respeto kyiʼj qe toj qja?
¿TIQUʼN NIM TOKLEN TUʼN KYOK QRESPETARIN QE TOJ QJA?
Qa at respeto toj jun ja xjal, kykyaqilx in che ten toj bʼaʼn, ik tzeʼn chmilbʼaj, xuʼjilbʼaj, ex qe kʼwal in kubʼ kynaʼn qa segur ateʼ.
-
Aju libro Siete reglas de oro para vivir en pareja in tzaj tqʼamaʼn qa aj tok kyrespetarin kyibʼ mejebʼlen in kubʼ kyyekʼin kykʼujlabʼil «nya oʼkx aj tbʼant jun tiʼ nim toklen kyuʼn, sino ax ikx tukʼil kymod in ten tkyaqil qʼij».
-
In tzaj kyyekʼin junjun tqanil qa aqeju kʼwal in bʼant kyrespetarin kye txqantl in ten jun tbʼanel kyximbʼetz kyiʼjx, jaku ten jun tbʼanel kyamiwbʼil tukʼil kyman ex nya jurat jaku tzaj nya bʼaʼn tiʼj kyximbʼetz.
¿TIʼ TEYA KBʼANTEL TUʼN?
Yolina tiʼj xnaqʼtzbʼil lu kyukʼil toj tjaya. Tnejel, bʼaʼn tuʼn tel tnikʼa tiʼj tiʼ t-xilen tuʼn «qrespetarin» kye txqantl. Tkabʼin, bʼaʼn tuʼn tkubʼ kytzʼibʼine tiʼ tuʼn tbʼant tuʼn teyle te junjun qeju toj kyjaye ex alkye junjun kymode moqa kybʼinchbʼene nya bʼaʼn tuʼn tbʼant kyuʼne. Toxin, che yoline tiʼj jlu tuʼn tel kynikʼe tiʼj tiʼ tuʼn tbʼant kyuʼne tuʼntzun tkubʼ kyyekʼine respeto kyxolxe.
Qʼonkuya techel. Bʼalo jaku kubʼ t-xjelina: «¿Naqʼlipe qine tuʼn wok tene yolil kyiʼj toj njaye aj kyel txalpaj tiʼj jun tiʼ? ¿In chin okpe tene xmayil tiʼj kyximbʼetz? ¿In nokpe nqʼoʼne nwiʼye kyiʼj moqa jun ratpe in chin jaw yoline akux in tzaj kyqʼamaʼn jun tiʼ weye?» Naʼntza qa aya tuʼn tok trespetarin tnejel kye txqantl.
Jun nabʼil: Tzʼok tilil tuʼna tuʼn tok trespetarina tkyaqil qe toj tjaya ex miʼn kubʼ t-ximena qa oʼkx jaku bʼant jlu tuʼna qa ma tzʼok respetarina kyuʼn tnejel.
Maske nya junx kyximbʼetze, nim toklen tuʼn tok kyrespetarin kyibʼe. Bʼaʼn tuʼn miʼn txi kyqʼamaʼne, yol ik tzeʼn jlu «eske aya tkyaqil maj. . .» moqa «eske teya mintiʼxix. . .». Qe yol kyuʼj ik tzeʼn jlu jaku tzaj kyiʼn nya bʼaʼn kyiʼj qe toj qja tuʼnju jaku kubʼ kyximen qa noq oʼkx kye in xi qqʼamaʼn jlu ex tuʼn jlu jaku tzʼok jun yol te jun matij qʼoj.
¿TIʼ IN BʼANT QUʼNE, AQOʼYE TESTIGOS DE JEHOVÁ?
Aqoʼye testigos de Jehová in nok tilil quʼne tuʼn kyok qrespetarin qe toj qjaye. Kukx in netz xnaqʼtzbʼil lu kyoj qe quʼje, ik tzeʼn kyoj artículos, libros, folletos ex videos, aqeju in che jax publicarin toj internet noq kukx kye kykyaqil xjal.
KYE MEJEBʼLEN: Aju kʼloj xnaqʼtzbʼil «Onbʼil kye ja xjal» jaku tzʼonin kyiʼj chmilbʼaj ex xuʼjilbʼaj. . .
-
. . . tuʼn tok kyqʼoʼn kywiʼ tiʼj kyukʼil.
-
. . . tuʼn miʼn tkyaj kykolin tuʼn kyyolin noq tuʼn miʼn tchʼiy qʼoj.
-
. . . tuʼn ya miʼn kyqʼojin.
(Jaku tzʼokxa toj jw.org ex tzʼibʼinkuxa toj jyobʼil «Onbʼil kye ja xjal»).
KYE MAMBʼAJ: Aju kʼloj xnaqʼtzbʼil «Onbʼil kye ja xjal» ax ikx in tzaj tqʼoʼn onbʼil kye mambʼaj tuʼn kyxi xnaqʼtzet kykʼwal. . .
-
. . . tuʼn tbʼant kynimen.
-
. . . tuʼn kyonin toj ja.
-
. . . ex tuʼn txi kyqʼamaʼn «najsam» ex «chjonte».
(Jaku tzʼokxa toj jw.org ex tzʼibʼinkuxa toj jyobʼil «La educación de los hijos» moqa «Hijos adolescentes»).
Ax ikx qʼonka twitza tiʼj apéndice «Los padres preguntan» tkux toj libro Lo que los jóvenes preguntan. Respuestas prácticas (volumen1). (Jaku tzʼokxa toj jw.org ex tzʼibʼinkuxa toj jyobʼil «Los padres preguntan»).
KYE KUʼXUN: Toj plaj «Kye kuʼxun» tkux toj jw.org at artículos, videos, ex actividades jaku che onin kyiʼj kuʼxun. . .
-
. . . tuʼn kyten bʼaʼn kyukʼil kyman ex kyerman.
-
. . . tuʼn kyyolin tukʼil respeto kyiʼj qe kawbʼil in kubʼ kyqʼoʼn kyman.
-
. . . tuʼn tok qeʼ kykʼuʼj kyman kyiʼj.
(Jaku tzʼokxa toj jw.org ex tzʼibʼinkuxa toj jyobʼil «Kye kuʼxun»)
Aju sitio jw.org noq kukx. Nya il tiʼj tuʼn t-xi tchjoʼne tuʼn tkux ttzʼibʼina tbʼiya toj moqa tuʼn tkux tregistrarin tibʼa tuʼn tajbʼen tuʼna. Ex mintiʼ in tzaj qanin mas tqanil tiʼj tbʼiya.
