¿Tiʼ in bʼaj tukʼil respeto kyiʼj txqantl?
¿TIQUʼN NIM TOKLEN TUʼN QRESPETARIN KYE TXQANTL?
Tuʼnju qa ma qo respetarin kye txqantl kʼonil qiʼj tuʼn miʼn ttzaj naj qqʼoj ex tuʼn miʼn t-xiʼ jun nya bʼaʼn toj il.
-
In tzaj tqʼamaʼn Biblia jlu: «Aju tzaqʼwebʼil te yol tukʼil kʼujlabʼil, bʼiʼx in weʼ qʼoj tuʼn, atzunju tzaqʼwebʼil tukʼil ikʼbʼil, mas in tzaj qʼoj tuʼn» (Proverbios 15:1). Aʼyeju yol ex bʼinchbʼen nya bʼaʼn oʼkx in chʼiy qʼoj kyuʼn ik tzeʼn aj tokx qqʼoʼn mas siʼ toj qʼaqʼ. Tuʼn jlu, jaku tzaj nim nya bʼaʼn qiʼj.
-
Tqʼama Jesús: «Tkyaqilju at tuj tanmi xjal, axtzunju in yolin tiʼj» (Mateo 12:34). Aj in qo yolin kyukʼil xjal tukʼil nya bʼaʼn yol, in tzaj tyekʼin qa bʼalo at jun nya bʼaʼn qximbʼetz kyiʼj, tuʼnju junxitl kyyajil, kytnam ex aju kykostumbr. Qa ikju, aqoʼ il tiʼj tuʼn tbʼaj qchʼexpuʼn qmod kyukʼil ex qximbʼetz kyiʼj.
Kʼitzqeku xi qanin xjel kye mas te 32 mil xjal te 28 tnam. Tzaj kyqʼamaʼn junlo 65% xjal qa ya mintiʼ in nok kykeʼyin qa in che respetarin xjal toj qqʼijlalil jaʼlo.
¿TIʼ TEYA KBʼANTEL TUʼN?
Noq alkyexku xjal in yolina tukʼil, il tiʼj tuʼn t-respetarina te, axpe ikx kye qeju junxitl kyximbʼetz ik tzeʼn teya. Yolina kyiʼj tqanil jaku tzʼonin kyiʼje tuʼn tten junx kyximbʼetze. Ax ikx, bʼaʼn tuʼn miʼn tyolina nya bʼaʼn kyiʼj txqantl ex tuʼn miʼn tok tkeʼyina kypaltil.
Bʼinchama bʼaʼn kyiʼj txqantl ik tzeʼn taja tuʼn kybʼinchante tiʼja. Qa in nok tqʼoʼna kyoklen txqantl ex qa in kubʼ tyekʼina tbʼanel tmoda kyukʼil, ax ikx kye kbʼel kybʼinchaʼn jlu tiʼja.
Najsankuya kyil. Miʼn ximane nya bʼaʼn kyiʼj txqantl. Ex qa ma kubʼ kybʼinchan jun tiʼ nya toj tumel, bʼaʼn tuʼn miʼn t-ximane tiʼj.
¿TIʼ IN BʼANT QUʼNE, AQOʼYE TESTIGOS DE JEHOVÁ?
Noq jaxku tumel in qo anqʼine moqa in qo aqʼunane, aqoʼye testigos de Jehová in qo respetarine kye kykyaqil xjal. Ex in qo onine kyiʼj txqantl tuʼn tbʼant ax jlu kyuʼn.
In xi qqʼone xnaqʼtzbʼil kye kykyaqil xjal tuʼn tel kynikʼ tiʼj Biblia noq kukx, pero mintiʼ in che ok q-obligarine xjal tuʼn tten kyximbʼetz ex kyokslabʼil ik tzeʼn qeye. Aj qyoline kyukʼil xjal tiʼjju nimen quʼne, in qo ok lepeʼye tiʼjju in tzaj tqʼamaʼn Biblia: «Chebʼa kymanxe kye ex atwit kychi tuj kywitze» (1 Pedro 3:15; 2 Timoteo 2:24).
In kubʼ tiʼj alkyexku ikʼbʼil quʼne. Tuʼntzunju, nim in qo tzalaje aj kypon noq alkyexku xjal toj qchmabʼile, aqeju kyaj tuʼn tel kynikʼ tiʼjju in tzaj t-xnaqʼtzan Biblia, noq alkyexku tten in che anqʼin. In nok tilil quʼne tuʼn tbʼant ik tzeʼn in tzaj tqʼamaʼn Biblia, «che nimane kye kykyaqil» xjal (1 Pedro 2: 17).
In qo respetarine kykawbʼil aj kawil ateʼ toj lugar jatumel atoʼye (Romanos 13:1). In xi qnimane qe kawbʼil ex in xi qchjoʼne impuesto. Mintiʼ in nokx qqʼoʼn qibʼe toj política, pero in nok qrespetarine kyoklen txqantl aj tkubʼ kyximen qa ok che onil tiʼj política moqa miʼn.
