Chʼix tpon ambʼil tuʼn qanqʼin toj txubʼtxaj ex toj mujbʼabʼil tuʼn Tkawbʼil Dios, aju o tzʼel nim ambʼil in qo ayon tiʼj tuʼn tul. In tzaj ttziyen Salmo 72:7 jlu: «Che tel xjal tuj txubʼtxaj» twitz Txʼotxʼ. Noqtzun tuʼnj, ¿jtoj txi tzyet tuʼn tkawin Tkawbʼil Dios? ¿Tzeʼn kbʼantel tuʼn? ¿Tzeʼn jaku tzʼonin Tkawbʼil Dios tiʼja?

Kyaj qʼamaʼn toj Tyol Dios tuʼn tikʼ junjun tiʼchaq aʼyeju che okel te techel qa chʼix tul Tkawbʼil Dios. Kyxol techel lu, at nimaq qʼoj twitz tkyaqil Txʼotxʼ, weʼyaj, yabʼil, nim kyaqnajnabʼ ex ktel nim nya bʼaʼn (Mateo 24:3, 7, 12; Lucas 21:11; Apocalipsis 6:2-8).

Juntl yol kyaj qʼamaʼn toj Tyol Dios, a jlu: «Tuj mankbʼil tqʼijlalil tzul nim yajbʼil. Porke che ul xjal oʼkx tok kykʼuʼj kyiʼjx, ex oʼkx tok kykʼuʼj tiʼj pwaq, [...] mibʼan che niman tyol kyman, ex mintiʼ in kyqʼoʼn chjonte tiʼj ju in kykʼmoʼn, mibʼan che niman te Dios, ex mintiʼ kykʼujlalil, ex mintiʼ in chewix kykʼuʼj, ex siʼmil yol qe, ex mintiʼ in kyjakʼun kyibʼ, ex mintiʼ chʼin kylastmi kyiʼj xjal, ex nneʼl kyikʼun aju bʼaʼn, [...] in jaw kyniman kyibʼ, mas tok kykʼuʼj tiʼj achbʼil ex mya tiʼj Dios» (2 Timoteo 3:1-4). O che ten xjal ik kymod ik tzeʼn jlu, pero toj ambʼil jaʼlo mas nim xjal ik kymod ik tzeʼn jlu.

Xi tzyet tuʼn tjapun kywiʼ yol lu toj abʼqʼi 1914. Axpe ikx, ateʼ junjun xjal in che xnaqʼtzan tiʼjju o bʼaj, ateʼkx kyxol aj kawil ex aj tzʼibʼil qe, ax kyximbʼetz tiʼj qa chʼexpaj twitz Txʼotxʼ toj abʼqʼi aju. Jun techel, kubʼ ttzʼibʼin Peter Munch jun aj xnaqʼtzal tiʼjju o bʼaj ojtxe, aju in yolin toj yol danés: «Chʼexpaj tkyaqil twitz Txʼotxʼ tej t-xi tzyet nimaq qʼoj toj 1914. Tej tbʼaneltoq taʼ tkyaqil, [...] xi tzyet tuʼn tten nim nya bʼaʼn, xobʼajil ex ikʼbʼil jatumel mintiʼx mujbʼabʼil».

Noqtzun tuʼnj, ax ikx at tbʼanel tqanil. Otoqxi bʼaj xitbʼil, tzul txubʼtxaj. Aju techel ma qo yolin tiʼj in tzaj tyekʼin qa chʼix t-xi tzyet tuʼn tkawin Tkawbʼil Dios tibʼaj tkyaqil Txʼotxʼ. Yolin Jesús tiʼj jun tbʼanel techel tej tqʼama jlu: «Aju tqanil bʼaʼn lu tiʼj tkawbʼil Dios kxel pakbʼet tuj tkyaqil twitz txʼotxʼ tuʼntzun tchikʼbʼanjtz ju yol lu kye kykyaqil nasyon; maxitzun tzul mankbʼil tqʼijlalil» (Mateo 24:14).

Aju tbʼanel tqanil lu, atzun xnaqʼtzbʼil mas in che pakbʼan testigos de Jehová tiʼj. Tuʼntzunju, aju uʼj mas ojtzqiʼn kyuʼn xjal tok tbʼi Aju Xqʼuqil. Qʼol tqanil tiʼj Tkawbʼil Jehová. In tzaj qʼamaʼn kyoj qe t-xaq uʼj lu tiʼ kbʼantel tuʼn Tkawbʼil Dios kyiʼj xjal ex tiʼj Txʼotxʼ.

Tuʼn ttzaqʼwet xjel lu, qo xnaqʼtzan tiʼj kyaje tiʼ nim toklen:

1. Miʼn txi tqʼoʼn Tkawbʼil Dios ambʼil kye xjal in che kawin tuʼn tten kyoklen toj tkawbʼil.

2. Kʼokel tilil kyuʼn aj kawil tuʼn kukx tten kyoklen ex che okel meltzʼaj tuʼn kyqʼojin tiʼj Tkawbʼil Dios (Salmo 2:2-9).

3. Kbʼel t-xiten Tkawbʼil Dios qe aj kawil tuʼnju kyaj tuʼn kukx kykawin kyibʼaj xjal (Daniel 2:44; Apocalipsis 19:17-21). In nok tqʼoʼn Tyol Dios tbʼi bʼajsbʼil, moqa mankbʼil qʼoj lu te Armagedón (Apocalipsis 16:14, 16).

4. Aʼyeju xjal in jaw kyjyoʼn tuʼn kyanqʼin tjaqʼ Tkawbʼil Dios, che kjel anqʼin toj qʼoj Armagedón ex che anqʼil toj jun tbʼanel akʼaj twitz Txʼotxʼ. In tzaj tqʼamaʼn Tyol Dios qa «nimxix kyajlal xjal» che kletel, bʼalo nim millón xjal (Apocalipsis 7:9, 10, 13, 14).

Jun kyxol qe tiʼchaq il tiʼj tuʼn tbʼant quʼn tuʼntzun qanqʼin tjaqʼ Tkawbʼil Dios, aju tuʼn tten qojtzqibʼil. Toj jun naʼj Dios, tqʼama Jesús jlu: «Ex atzun chwinqlal jlu te jumajx, tuʼn tojtzqinjtza kyuʼn, oʼkx aya jun Dios axix tok, ex tuʼn wojtzqinjtze kyuʼn, aqine Jesucrist ma chin tzaj t-samaʼna» (Juan 17:3).

Qa ma ten qojtzqibʼil tiʼj Dios, in tzaj tiʼn nimku tbʼanel qe. Qo xnaqʼtzan tiʼj kabʼe kyxol jlu. Aju tnejel, in nonin qiʼj tuʼn tten qʼuqbʼil qkʼuʼj tiʼj Dios. At yekʼbʼil tiʼj qʼuqbʼil qkʼuʼj lu, ex in nonin qiʼj tuʼn tok qeʼ qkʼuʼj tiʼj qa ax tok aju Tkawbʼil Dios ex qa chʼix tul (Hebreos 11:1). Aju tkabʼ tten, in nonin qiʼj tuʼn tten mas qkʼujlabʼil tiʼj Dios ex kyiʼj xjal. In nonin qkʼujlabʼil at tiʼj Dios tuʼntzun t-xi qbʼiʼn tukʼil tkyaqil qkʼuʼj. Ex aju qkʼujlabʼil at kyiʼj xjal in nonin tuʼn t-xi qbʼiʼn aju nabʼil tqʼama Jesús: «Ik tzaʼn kyaje tuʼn kybʼinchante xjal kyeye, ikxtzun kyeye kybʼinchame kye» (Lucas 6:31).

Ik tzeʼnx jun tbʼanel mambʼaj, taj Bʼinchal qe tuʼn qten toj tbʼanel. Taj Dios tuʼn qtzalaj tiʼj «chwinqlal axix tok» aju in yolin Xjan Uʼj tiʼj (1 Timoteo 6:19). Mintiʼ tbʼanel qanqʼibʼil jaʼlo. In kynaʼn nim millón xjal qa jun iqtz aju anqʼibʼil. ¿Tzeʼntzun aju «chwinqlal axix tok»? Qo xnaqʼtzan tiʼj junjun tbʼanel tiʼchaq kbʼantel tuʼn Tkawbʼil Dios kyiʼj xjal.