Tej kyxiʼ kʼwaʼl ateʼkx toj tja xnaqʼtzbʼil pasiaril, moqa pasialil, tzaj qʼamaʼn qa ateʼ junjun kuʼxun e ok ten tiʼj jun kyukʼil, moqa kyajtoq tuʼn kykubʼ koẍeʼ tukʼil. Kykyaqilx in che xnaqʼtzantoq toj jun tbʼanel colegio privado te Canadá. Tej otoqxi bʼaj jlu, kubʼ ttzʼibʼin Leonard Stern jlu toj periódico Ottawa Citizen: «Noq tzeʼnxku kyanqʼibʼil kuʼxun, in che okx toj jun tbʼanel tja xnaqʼtzbʼil ex in ten kynabʼil, pero kukx in kubʼ kybʼinchaʼn aju nya bʼaʼn».

Tqʼamatl Leonard jlu: «Aju mas bʼaʼn tuʼn tbʼant kyuʼn mambʼaj, moqa tatbʼaj, aju tuʼn t-xi kyxnaqʼtzaʼn kykʼwaʼl tiʼj alkye bʼaʼn ex nya bʼaʼn. Noqtzun tuʼnj, ateʼ nim mambʼaj oʼkx in che ximen tiʼj tuʼn tetz tbʼanel kycalificación kykʼwaʼl ex tuʼn tkanet jun tbʼanel kyaqʼun jatumel ktzajel chjoʼn nim twi kykʼuʼj».

Nim toklen tuʼn kyxnaqʼtzan kʼwaʼl, ex tbʼanel xnaqʼtzbʼil in kyqʼoʼn xjal, pero mlayx onin tiʼj jun xjal tuʼn miʼn tten nya bʼaʼn tajbʼil moqa nya bʼaʼn tbʼinchbʼen. ¿Alkyetzun xnaqʼtzbʼil jaku tzʼonin qiʼj tuʼn tkubʼ qbʼinchaʼn aju bʼaʼn?

In nok Tyol Dios ik tzeʼn jun espej. Aj tjaw quʼjin, moqa aj tjaw qẍchʼiʼn, jaku tzʼel qnikʼ tiʼj alkye junjun tiʼ jaku qo kubʼ tzʼaq kyuʼn ex alkye junjun tiʼ jaku bʼant quʼn (Santiago 1:23-25). Ax ikx, in nonin Tyol Dios qiʼj tuʼn qchʼexpaj ex tuʼn kyten tbʼanel qmod, ik tzeʼn tuʼn qbʼinchante aju bʼaʼn, tuʼn qok te mans, tuʼn tten qpasens, tuʼn qjukʼun qibʼ ex tuʼn tten qkʼujlabʼil. In che onin mod lu qiʼj tuʼn tten mujbʼabʼil ex txubʼtxaj qxol. Ax ikx in tzaj tqʼamaʼn Tyol Dios qa tuʼn kʼujlabʼil «qtzuylaj qibʼ qkyaqil» (Colosenses 3:14). ¿Tiquʼn in nok kʼujlabʼil te nim toklen? Qʼonk twitza tiʼjju in tzaj tqʼamaʼn Tyol Dios tiʼj mod lu.

• «Aju xjal at tkʼujlalil at tpasens ex in tzʼeʼy tkʼuʼj tiʼj tukʼil; aju xjal at tkʼujlalil mintiʼ in tzaj tloʼch tkʼuʼj tiʼj juntl, ex mintiʼ in jaw tniman tibʼ, mintiʼ in bʼaj tyolin tibʼ. At tchi tuj twitz, mya noq oʼkx tiʼjx tok tkʼuʼj; mya txʼuʼj twiʼ, ex mintiʼ in xi tkʼuʼn qʼoj. Mintiʼ in tzalaj tiʼj ju mya bʼaʼn in kybʼinchaʼn xjal, oʼkx in tzalaj tiʼj ju yol ax tok. Tkyaqil nnikʼx tuʼn, [...] ex at tpasens tuj tkyaqil. Aju kʼujlalil mlay bʼaj» (1 Corintios 13:4-8).

• «Qa at kykʼujlalile mlay kybʼinchaye mya bʼaʼn tiʼj kyukʼile» (Romanos 13:10).

• «Pero aju mas il tiʼj, tuʼn ttenxix kykʼujlalile kyxolxe, porke qa at kykʼujlalile, knajsetel nimku kyil txqantl kyuʼne» (1 Pedro 4:8).

Aj qten kyukʼil toj qja, mintiʼ in tzaj bʼaj qkʼuʼj tiʼj jun tiʼ ex tbʼanel in qnaʼn. In bʼaj jlu tuʼnju ojtzqiʼn quʼn qa kyaj toj qja tuʼn qten toj bʼaʼn ex mlayx tzʼok kybʼinchaʼn jun nya bʼaʼn qiʼj.

 Ax ikx, jaku bʼant junjun chʼixpubʼil quʼn toj qanqʼibʼil noq tuʼn kʼujlabʼil. Qo ximen tiʼj jun techel, jun xjal aju kʼokel qqʼoʼn tbʼi te Jorge, tajtoq tuʼn tten tukʼil tchman aju tzmatoq in nul itzʼj. Noqtzun tuʼnj, tgantoq Jorge tuʼn tsichʼin nim, atzunte tman tal neʼ, moqa neʼẍ, nyatoq taj tuʼn tsichʼin Jorge ttxlaj, moqa tkʼitz tal neʼ. ¿Tiʼ bʼant tuʼn Jorge? Maske qʼiʼntoq 50 abʼqʼi tuʼn in sichʼin, kyaj ttzaqpiʼn tuʼn tsichʼin tuʼnju tajtoq tuʼn tten tukʼil tchman. ¡Jaku bʼant nimxix tuʼn kʼujlabʼil!

Jaku ten qkʼujlabʼil, ex aʼye mambʼaj at kyoklen tuʼn t-xi kyxnaqʼtzaʼn qe kykʼwaʼl tuʼn tten kykʼujlabʼil. In xi kyqʼoʼn kywa, in che xqʼuqin kyiʼj ex in che onin kyiʼj qa ma che kʼixbʼi ex qa ma che yabʼti. In che yolin tbʼanel mambʼaj kyukʼil kykʼwaʼl ex in xi kyqʼoʼn nabʼil kye. Ax ikx in chex kykawin ex in chex kyxnaqʼtzaʼn tuʼn tel kynikʼ tiʼj alkye bʼaʼn ex alkye nya bʼaʼn. Ex tuʼn techel in kubʼ kyqʼoʼn mambʼaj, jaku tzʼel kykanoʼn kʼwaʼl.

Bʼisbʼajilxix tuʼnju ateʼ mambʼaj mintiʼ in bʼant jlu kyuʼn. Noqtzun tuʼnj, ¿ape t-xilen jlu qa mlayx kubʼ kyyekʼin kykʼujlabʼil kykʼwaʼl? Miʼn. Tuʼnju ateʼ xjal e jaw chʼiy toj jun ja xjal jatumel mintiʼ kʼujlabʼil, pero o bʼant chʼixpubʼil kyuʼn toj kyanqʼibʼil ex o che ok te tbʼanel xjal ex jaku tzʼok qeʼ qkʼuʼj kyiʼj. Axpe ikx, o chʼexpaj kyanqʼibʼil xjal aʼyeju kubʼ kyximen txqantl qa mlayx che chʼexpaj, ik tzeʼn kʼelel qnikʼ tiʼj toj juntl xnaqʼtzbʼil.