In tzaj kyqʼamaʼn junjun xjal qa jaku che tzaj nya bʼaʼn lu kyiʼj kuʼxun qa ma tzʼajbʼen Internet kyuʼn toj nim ambʼil:

• Oʼkx in nok bʼaj kywiʼ tiʼj celular.

• Jaku tzaj qʼamaʼn nya bʼaʼn yol kye.

• Jaku tzʼok kyqʼoʼn kywitz tiʼj pornografía, qa in che jyon tiʼj moqa mintiʼ.

OʼKX TOK KYWIʼ TIʼJ

In che kubʼ qʼoʼn junjun tiʼchaq toj Internet tuʼn qnaqʼet kyiʼj, ik tzeʼn qe juego. Ojtzqiʼn kyuʼn xjal tiquʼn in bʼant jlu kyuʼn. In tzaj tqʼamaʼn libro En defensa de la conversación jlu: «O che bʼaj bʼinchaʼn aplicación tuʼn qnaqʼet kyiʼj». Qa mas in che ok qkeʼyin qe anuncio in che etz yekʼin kyoj aplicación, mas in che kambʼan empresa pwaq moqa medi.

XIMANA TIʼJ JLU: ¿Oʼkxpe tok kywiʼ tkʼwala tiʼj celular? ¿Tzeʼn jaku tzʼonina kyiʼj tuʼn tajbʼen ambʼil toj tumel kyuʼn? (EFESIOS 5:15, 16).

IN NOK BʼINCHAʼN NYA BʼAʼN KYIʼJ

Ateʼ junjun xjal mas in tzaj kyqʼoj, in ten nya bʼaʼn kymod ex in bʼant kyyasin aj tajbʼen Internet kyuʼn. Ex tuʼn jlu jaku tzʼok kybʼinchaʼn nya bʼaʼn kyiʼj txqantl.

Ateʼ junjun xjal in bʼant jlu kyuʼn tuʼnju kyaj tuʼn tok bʼaj kywitz txqantl kyiʼj ex tuʼn tok ojtzqiʼn kywitz. Atzun junjuntl, in kubʼ kyximen qa in che el ikʼun qa mintiʼ ma txi qʼoʼn txokbʼil kyiʼj aj tbʼant jun tiʼ kyuʼn txqantl.

XIMANA TIʼJ JLU: ¿In kubʼpe kyyekʼin tkʼwala tbʼanel kymod aj tajbʼen Internet kyuʼn? (Efesios 4:31). ¿In kubʼpe kynaʼn nya bʼaʼn qa mintiʼ in tzaj qʼoʼn txokbʼil kyiʼj kyuʼn txqantl?

PORNOGRAFÍA

Toj ambʼil jaʼlo, mas nya kwest jaku che okx xjal toj Internet jatumel jaku tzʼetz yekʼin pornografía. Jaku che ajbʼen junjun tiʼchaq kyuʼn mambʼaj tuʼn miʼn tok kykeʼyin kykʼwal tkyaqilju at toj Internet, pero nya toj tkyaqil ambʼil jaku tzʼonin jlu.

Qa ma txi tsamaʼn jun xjal jun tfoto jatumel mintiʼ t-xbʼalun tok moqa noq tal chʼin t-xbʼalun tok, jaku tzʼok te jun il twitz ley. Kyoj junjun tnam, in nok tkeʼyin ley tabʼqʼi xjal in bʼant jlu tuʼn ex jaku tzʼok qʼoʼn tpaj tuʼnju in xi tsipen kyilbʼilal kʼwal mintiʼ kyxbʼalun tok.

XIMANA TIʼJ JLU: ¿Tzeʼn jaku tzʼonina tiʼj tkʼwala tuʼn miʼn tok tkeʼyin nix tuʼn t-xi tsamaʼn foto ex tqanil at toklen tukʼil yaẍbʼil toj Internet? (EFESIOS 5:3, 4).

XNAQʼTZANXA QE TKʼWALA

Maske nya kwest tuʼn tajbʼen tecnología kyuʼn kʼwal, nim toklen tuʼn t-xi yekʼit kye tzeʼn tuʼn tajbʼen kyuʼn. In tzaj tqʼamaʼn libro Indistractable (Indistraíble) qa aj t-xi qʼet celular te jun kʼwal ex naʼmx tel tnikʼ tiʼj tzeʼn tuʼn tajbʼen tuʼn, in nok jlu ik tzeʼn aj t-xi qʼet ambʼil te tuʼn t-xi t-xon tibʼ toj piscina ex naʼmx tbʼant tnadarin.

Qʼonka techel kyiʼj nabʼil taja tuʼn t-xi tbʼinchaʼna moqa tzʼibʼinkuya aju taja tuʼn tbʼant tuʼna:

• Waje tuʼn nyoline tukʼil nkʼwale tiʼj tzeʼn tuʼn tajbʼen Internet tuʼn.

• Waje tuʼn wonine tiʼj nkʼwale tuʼn miʼn ttzaj tbʼis qa mintiʼ ma tzaj qʼoʼn txokbʼil tiʼj kyuʼn txqantl.

• Waje tuʼn tkubʼ nbloquearine tkyaqil nya bʼaʼn tqanil jaku tzʼoktz toj Internet.

• Waje tuʼn tok nkeʼyine tzeʼn in najbʼen celular tuʼn nkʼwale.

• Waje tuʼn t-xi nqʼamaʼne te nkʼwale jniʼ ambʼil jaku tzʼajbʼen celular tuʼn junjun qʼij.

• Kʼelel wiʼne ambʼil te nkʼwale tuʼn miʼn tajbʼen celular tuʼn te qonikʼen toj tkwart.

• Kʼelel wiʼne ambʼil te nkʼwale tuʼn miʼn tajbʼen celular tuʼn akux in qo waʼne.