Pero qa mintiʼ ma tzʼok kyxqʼuqin kyibʼ, jaku tzaj tiʼn tecnología nya bʼaʼn toj kymejebʼleʼn ik tzeʼn qe jlu:

• Jaku tzʼel tiʼn ambʼil kyiʼj tuʼn kyten junx.

• Jaku che aqʼunan kyja maske nya il tiʼj.

• Jaku ya mlay tzʼok qeʼ tkʼuʼj jun tiʼj juntl ex jaku kubʼ kybʼinchaʼn jun il.

AJ KYTENE JUNX

In tzaj tqʼamaʼn jun chmilbʼaj jlu, aju Michael tbʼi: «Aj qtene junx, at maj in kubʼ nnaʼne qa mintiʼ in nok tqʼoʼn nxuʼjile twiʼ wiʼje. Oʼkx in nok tkeʼyin celular ex in tzaj tqʼamaʼn jlu weye: ‹Najsama, es que tzma xten ambʼil wiʼje tuʼn kyjaw wuʼjine mensaje jaʼlo›». Ax ikx te Jonathan o kubʼ mojeʼ ex in tzaj tqʼamaʼn qa «jaku ten jun mejebʼleʼn junx, pero jaku kubʼ kynaʼn qa najchaq taʼ jun tiʼj juntl».

XIMANA TIʼJ JLU: ¿Jteʼ maj o tzʼel tiʼn jun mensaje moqa jun llamada ambʼil weye tuʼn ntene tukʼil nxuʼjile moqa nchmile? (EFESIOS 5:33).

AJU AQʼUNTL

Ateʼ junjun xjal at maj il tiʼj tuʼn t-xi kytzaqʼweʼn junjun llamada moqa mensaje tiʼj kyaqʼun toj alkyexku ambʼil. Atzun junjuntl xjal, nya il tiʼj tuʼn kyaqʼunan aj kyten kyja, pero kukx in che aqʼunan. In tzaj tqʼamaʼn jun chmilbʼaj jlu, aju Lee tbʼi: «Aj ntene tukʼil nxuʼjile, kwest in nela toj nwitze tuʼn miʼn t-xi ntzaqʼweʼne jun llamada moqa jun mensaje tiʼj waqʼune». Atzun jun xuʼjilbʼaj Joy tbʼi, in tzaj tqʼamaʼn jlu: «Kwest in nela toj nwitze tuʼn tkyaj ntzaqpiʼne waqʼune tuʼnju ax njaye in chin aqʼunane. Il tiʼj tuʼn tok tilil wuʼne tuʼn miʼn tok nqʼoʼnxix nwiʼye tiʼj».

XIMANA TIʼJ JLU: ¿In nokpe tqʼoʼna twiʼya tiʼj tchmila moqa tiʼj t-xuʼjila aj tyolin tukʼila? (LUCAS 8:18).

JAPUNX TWI KYYOLE

Ik tzeʼn tzaj tyekʼin jun xnaqʼtzbʼil, nim qe mejebʼleʼn in tzaj qʼoj kyxol tuʼnju mintiʼ in nok qeʼ tkʼuʼj jun tiʼj juntl aj tajbʼen redes sociales kyuʼn. Tzaj tqʼamaʼn 10% xjal e onin tiʼj xnaqʼtzbʼil lu qa jax kyqʼoʼn jun tiʼ toj redes sociales toj ewaj twitz kyxuʼjil moqa twitz kychmil.

In tzaj kyqʼamaʼn nim xjal qa jaku tzaj nya bʼaʼn tiʼj jun mejebʼleʼn kyuʼn redes sociales ex qa mas nya kwest tuʼn kykubʼ tzʼaq toj yaẍbʼil. Tuʼn jlu, mintiʼ in qo jaw labʼin aj ttzaj kyqʼamaʼn licenciado qa ateʼ nim mejebʼleʼn in kubʼ kypan kyibʼ tuʼn kypaj redes sociales.

XIMANA TIʼJ JLU: ¿In kubʼpe tewana twitz tchmila moqa t-xuʼjila aju in yolina tiʼj tukʼil juntl xjal? (PROVERBIOS 4:23).

XIMANA TIʼJ ALKYE MAS NIM TOKLEN

Jaku tzaj yabʼil tiʼj jun xjal qa mintiʼ in nok t-xqʼuqin aju in xi twaʼn. Ax jlu jaku bʼaj tiʼj jun xjal qa mintiʼ ma tzʼel tpaʼn ambʼil tuʼn tten tukʼil tchmil moqa tukʼil t-xuʼjil, jaku tzaj nya bʼaʼn tiʼj tmejebʼleʼn (Efesios 5:28, 29).

Jaku yolina tukʼil t-xuʼjila moqa tukʼil tchmila kyiʼj nabʼil tkuʼx toj uʼj lu moqa jaku kubʼ kytzʼibʼine tiʼ jaku bʼant kyuʼne tuʼn miʼn ttzaj nya bʼaʼn tiʼj kymejebʼleʼne tuʼn tecnología.

• Che waʼne junx maske noq jun maj toj jun qʼij.

• Kypaʼmile ambʼil tuʼn miʼn tajbʼen tecnología kyuʼne.

• Kypaʼmile ambʼil tuʼn tbʼant jun tiʼ kyuʼne kyjunalxe.

• Kyyuptzʼanxe celular moqa juntl tiʼ te qonikʼen ex miʼn kyaj kyqʼoʼne nqayin kytxlaje.

• Tkyaqil qʼij, kypaʼmile 15 minut tuʼn kyyoline ex tuʼn miʼn tajbʼen celular moqa juntl tiʼ kyuʼne.

• Bʼaʼn tuʼn tkubʼ kyximane jniʼ ambʼil kʼajbʼel Internet kyuʼne junjun qʼij.