Noqtzun tuʼnj, qa oʼkx in najbʼen tecnología kyuʼn xjal tuʼn kyyolin kyukʼil kyamiw, jaku tzaj nya bʼaʼn kyiʼj ik tzeʼn qe jlu:

• Mintiʼxix in nel kynikʼ kyiʼj kyamiw.

• Mas in kubʼ kynaʼn qa kyjunalx ateʼ ex qa mintiʼ jun tiʼ in bʼant kyuʼn.

• Mas in che ximen kyiʼjx ex nya kyiʼj txqantl.

TUʼN TEL QNIKʼ KYIʼJ TXQANTL

Tuʼn tel qnikʼ kyiʼj txqantl, nim toklen tuʼn qximen tiʼj tiʼ in kubʼ kynaʼn. Pero mlay bʼant jlu quʼn qa atz tok qwiʼ kyiʼj tqanil in che kubʼ qʼoʼn kyoj redes sociales ex qa jun rat in xi qtzaqʼweʼn qe mensaje.

Aj tbʼet ambʼil, qa a tecnología nmandarin teya, jaku naqʼeta tuʼn kyxi ttzaqʼweʼna qe mensaje in tzaj kysamaʼn tamiwa teya ex mlay ximana tiʼjju in xi ttzʼibʼina. Qa ma bʼant jlu tuʼna, mlay tzʼel tpaʼna ambʼil tuʼn tonina tiʼj jun tamiwa in nikʼ toj jun nya bʼaʼn moqa in bʼisun.

XIMANA TIʼJ JLU: Aj tyolina kyukʼil tamiwa, ¿tzeʼn jaku kubʼ tyekʼina qa in ximana kyiʼj aj tajbʼen tecnología tuʼna? (1 PEDRO 3:8).

JAKU TZAJ QBʼIS

Tzaj tqʼamaʼn jun xnaqʼtzbʼil qa kubʼ kynaʼn xjal nya bʼaʼn tej otoqxi tzʼel kypaʼn nim ambʼil tuʼn tok kykeʼyin jun página te Internet ojtzqiʼnxix kyuʼn xjal. El kynikʼ qeju in che jyon tqanil tiʼj qa aj tok qkeʼyin kyfoto ex kyyol txqantl tiʼjju in bʼant kyuʼn, «jaku kubʼ qnaʼn qa mintiʼ jun tiʼ tbʼanel in bʼant quʼn toj qanqʼibʼil».

Nya oʼkxju, aj in che ok qkeʼyin qe tbʼanel foto tiʼjju in bʼant kyuʼn txqantl, jakulo tzʼok qmojbʼan qibʼ kyukʼil ex jaku kubʼ qximen qa oʼkx kye in che tzalaj, atzun qe mintiʼ.

XIMANA TIʼJ JLU: Aj kyajbʼen redes sociales tuʼna, ¿tiʼ jaku bʼant tuʼna tuʼn miʼn tok tmojbʼaʼna aju in bʼant tuʼna tukʼilju in bʼant kyuʼn txqantl? (GÁLATAS 6:4).

OʼKX JAKU QO XIMEN QIʼJX

Tqʼama jun maestra qa ateʼ junjun kʼwal in che xnaqʼtzan tukʼil ex oʼkx in che ximen kyiʼjx. * Ax ikx, oʼkx in nok kyamiwen kyibʼ kyukʼil qeju in che bʼinchan xtalbʼil kyiʼj ex mintiʼ in nel kypan kyibʼ kyiʼj. Aj in che ten kyamiw ik tzeʼn jlu, oʼkx in che ximen tiʼj tiʼ jaku txi qʼoʼn kye. Tuʼntzunju, jaku che ok qe kyamiw ik tzeʼn qe aplicación, oʼkx jaku che ajbʼen qa at tajbʼen kye, qatzun miʼn, mintiʼ in chex yolin kyukʼil.

XIMANA TIʼJ JLU: Tukʼilju in jax tqʼoʼna toj Internet, ¿in kubʼpe tyekʼina qa in competirina ex qa oʼkx in ximana tiʼjxa? (GÁLATAS 5:26).

XIMANA TIʼJ TZEʼN IN NAJBʼEN TECNOLOGÍA TUʼNA

Qa mintiʼ ma txi tqʼoʼna ambʼil tuʼn tmandarin tecnología tiʼja, jaku tzʼonin tiʼja tuʼn tyolina kyukʼil tamiwa ex tuʼn tchʼiy tamiwbʼila kyukʼil.

Qʼonka techel kyiʼj nabʼil taja tuʼn t-xi tbʼinchaʼna moqa tzʼibʼinkuya aju taja tuʼn tbʼant tuʼna:

• Waje tuʼn nyoline kyukʼil wamiwe ex nya oʼkx tuʼn t-xi nsamaʼne qe mensaje moqa qe correo electrónico kye.

• Waje tuʼn miʼn tok nqʼoʼn nwitze tiʼj ncelulare akux in chin yoline kyukʼil txqantl moqa tuʼn tkyaj nqʼoʼne toj silencio.

• Waje tuʼn miʼn tok nqʼoʼne nim ambʼil kyiʼj redes sociales.

• Waje tuʼn tok nqʼoʼne mas nwiʼye tiʼj kyyol txqantl.

• Waje tuʼn nyoline tukʼil jun wamiwe in nikʼ toj jun nya bʼaʼn.