ONBʼIL KYE QEJU ATEʼ TOJ BʼIS

Aju mas tbʼanel onbʼil kye qeju in che bʼisun

TUʼN TOK QBʼIʼN TOJ

KYOJ QE ABʼQʼI O CHE IKʼ, O TXI JYOʼN NIM TQANIL TIʼJ BʼIS IN KUBʼ KYNAʼN XJAL O KYIM JUN TOJ KYJA. Pero ik tzeʼn ma tzʼel qnikʼ tiʼj, tkyaqil onbʼil in tzaj kyqʼoʼn xjal in che xnaqʼtzan tiʼj bʼis, chʼixme aʼyex ik tzeʼn in tzaj tqʼamaʼn Tyol Dios. A jlu in tzaj tyekʼin qe qa kukx at kyajbʼen nabʼil tkuʼx toj. Noqtzun tuʼnj, nya oʼkx jaku che kanet tbʼanel nabʼil quʼn toj Tyol Dios, sino ax ikx in tzaj tqʼoʼn mas tqanil qe, aju mlay kanet quʼn toj juntl uʼj ex in tzaj tqʼuqbʼaʼn kykʼuʼj qeju in che bʼisun.

In tzaj tqʼamaʼn Tyol Dios qa nya toj kʼixkʼoj ateʼ qeju o che kyim

In tzaj tqʼamaʼn Eclesiastés 9:5 qa mintiʼ jun tiʼ ojtzqiʼn kyuʼn kyimni ex ya mintiʼ in che ximen (Salmo 146:4). Tuʼntzunju, in nok tmojbʼaʼn Tyol Dios kamik ik tzeʼn aj tikʼ jtan jun xjal (Juan 11:11).
In tzaj tyekʼin Biblia qa jaku tzʼok qeʼ qkʼuʼj tiʼj qa kʼujlaʼn qoʼ tuʼn Dios

In tzaj tqʼamaʼn Tyol Dios jlu: «Kwentin qe xjal tzʼaqlxix tuʼn Qman [Jehová, * TNM] ex in tzaj tbʼiʼn kynaʼj Dios» (Salmo 34:15). Mas tbʼanel naʼj Dios twitz jun terapia moqa twitz alkyexku juntl tiʼ in nonin qiʼj tuʼn tbʼaj qnukʼuʼn qximbʼetz. ¿Tiquʼn? Tuʼnju in nonin qiʼj tuʼn tten jun qamiwbʼil tukʼil Jehová, aju Dios at tipumal tuʼn ttzaj tqʼuqbʼaʼn qkʼuʼj.
In tzaj tqʼoʼn jun tbʼanel qʼuqbʼil qkʼuʼj tiʼj ambʼil tzul

In yolin Tyol Dios tiʼj qʼij jatumel che jawil anqʼin kyimni. Jun techel, in tzaj tqʼamaʼn qa toj ambʼil tzul «kʼelel t-suʼn Dios taʼl kywitz kykyaqil; ex mintiʼtl kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj» (Apocalipsis 21: 3, 4). ¿Jakupe kubʼ t-ximana tzeʼn qanqʼibʼil ktel aj tjapun kywi yol lu?

Ateʼ nim xjal in nok qeʼ kykʼuʼj tiʼj Jehová, in ten kyipumal tuʼn kyex twitz bʼis tuʼnju o tzʼel kynikʼ tiʼj qa che jawil anqʼin kyimni tuʼn. Jun techel, in tzaj tqʼamaʼn Ann jlu, aju kyim tchmil tej otoq tzikʼ 65 abʼqʼi kykubʼlen mojeʼ: «O tzʼel nnikʼe tiʼj toj Tyol Dios qa nya toj kʼixkʼoj ateʼ kyimni ex qa che jawil anqʼin juntl maj toj ambʼil tzul. In chin ximane tiʼj jlu aj ttzaj nnaʼne nchmile ex iktzun tten in nikʼx bʼis wuʼne».

In tzaj tqʼamaʼn Tina jlu, aju ma qo yolin tiʼj: «Atxix toj qʼij tej tkyim Timo, o tzʼok nkeʼyine qa in nonin Dios wiʼje. Ex mas o tzʼok nkeʼyine qa in nonin Dios wiʼje kyoj ambʼil mas kwest. Qʼuqli nkʼuʼje tiʼj qa che jawil anqʼin kyimni ex tuʼn jlu in ten wipumale tuʼn kukx tok tilil wuʼne tzmaxi aj tok nkeʼyine Timo juntl maj».

In tzaj kyyekʼin yol lu aju in kubʼ kynaʼn nim millón xjal in nok qeʼ kykʼuʼj tiʼj Tyol Dios. Qa in kubʼ t-ximen teya qa nya ax tok aju in tzaj tqʼamaʼn Tyol Dios, bʼaʼn tuʼn tel tpaʼna ambʼil tuʼn t-xnaqʼtzana kyiʼj junjun yekʼbʼil qa ax tok in che onin nabʼil in tzaj tqʼamaʼn ex qa ax tok che kjapunel kywi yol tkuʼx toj. Qa ma bʼant jlu tuʼna, kʼelel tnikʼa tiʼj qa mas in nonin Tyol Dios kyiʼj qeju o kyim jun toj kyja.