Ateʼ nim nabʼil jaku che onin tiʼja tuʼn tikʼx bʼis tuʼna, noqtzun tuʼnj, ateʼ junjun mas jaku che onin twitz junjuntl. Bʼalo in bʼaj jlu tuʼnju junxitl bʼis in kubʼ tnaʼn teyele junjun aj in kyim jun toj tja. Tuʼntzunju, bʼalo aju jaku tzʼonin tiʼj jun, mlay tzʼonin tiʼj juntl.

Maske ikju, ateʼ junjun nabʼil o che onin kyiʼj nimku xjal. Ax jlu in tzaj kyqʼamaʼn xjal in che xnaqʼtzan tiʼj bʼis ex in tzaj tyekʼin jlu qa ax tok aju in tzaj tqʼamaʼn jun ojtxe uʼj, aju Biblia.

• In tzaj kyqʼamaʼn junjun xjal in che xnaqʼtzan tiʼj bʼis qa atzun jlu jaku tzʼonin tiʼj jun xjal aj tkyim jun toj tja. Maske ikju, bʼalo at maj taja tuʼn ttena tjunalxa, axpe ikx jaku tzaj tqʼoja kyiʼj qeju kyaj tuʼn kyonin tiʼja. Nya oʼkx tiʼja in bʼaj jlu.

• Miʼn kubʼ t-ximana qa tkyaqil ambʼil ktel jun xjal tukʼila, pero ax ikx mintiʼ tuʼn tkubʼ t-ximana qa bʼaʼn tuʼn tel tpan tibʼa kyiʼj kykyaqil. Aj tbʼet ambʼil, kʼelel tnikʼa tiʼj qa nim toklen tuʼn kyonin txqantl tiʼja. Tuʼntzunju, qʼamanxa tiʼ taja ex tiʼ nya taja, pero chebʼe qʼamanxa.

• Ximana tiʼjju in bʼaj tiʼja, tuʼntzunju, bʼaʼn tuʼn tel tpaʼna ambʼil tuʼn ttena kyukʼil txqantl ex tuʼn ttena tjunalxa.

NABʼIL TOJ TYOL DIOS: «Mas bʼaʼn kabʼe xjal twitzju noq junx», «qa ma kubʼ tzʼaq jun, jaku jaw wabʼan tuʼn juntl» (Eclesiastés 4:9, 10).

• Qa ma tzʼok t-xqʼuqina tiʼ in xi twaʼna, jaku tzʼonin tiʼja tuʼn tikʼx bʼis tuʼna. Qʼonka tilil tuʼn t-xi tloʼna fruta, tuʼn t-xi twaʼna qe verdura ex qeju tiʼchaq mintiʼ nim grasa kyoj.

• Bʼaʼn tuʼn t-xi tkʼaʼna nim aʼ ex junjuntl tbʼanel kʼabʼj.

• Qa mintiʼxix weʼyaj tiʼja, bʼaʼn tuʼn t-xi twaʼna chʼin wabʼj akux in nex qʼij. Ax ikx, jaku txi tqanina te doctor tiʼ jaku txi twaʼna te t-xel twaya. *

• Qa jun rat ma bʼeta ex qa ma bʼant junjuntl ejercicio tuʼna, jaku tzʼonin tiʼja tuʼn tkubʼ kyiʼj nya bʼaʼn t-ximbʼetza. Ateʼ junjun in najbʼen ambʼil lu kyuʼn tuʼn kyximen tiʼj xjal otoq kyim, atzun junjuntl in najbʼen kyuʼn tuʼn miʼn ttzaj kynaʼn.

NABʼIL TOJ TYOL DIOS: «Mi jun xjal nneʼl tikʼun t-ximlal, noq oʼkx in tkʼaʼchan ex kwentin tuʼn» (Efesios 5:29).

• Nim toklen tuʼn qjtan nim ambʼil, pero mas kbʼantel jlu kyuʼn qeju o kyim jun toj kyja tuʼnju in che sikt tuʼn bʼis.

• Miʼn txi tkʼana nim café nix qʼeʼn tuʼnju mlay jtana kyuʼn.

NABʼIL TOJ TYOL DIOS: «Mas bʼaʼn tuʼn qojlan chʼin twitzju tuʼn qaqʼunan nimxix, tuʼnju ik tten jlu ik tzeʼn qaj tuʼn ttzyet kyqʼiqʼ quʼn tuʼn qqʼabʼ» (Eclesiastés 4:6, TNM).

• Tuʼnju junxitl bʼis in kubʼ tnaʼn teyele junjun xjal, aya kbʼel ximente alkye mas bʼaʼn te teya.

• Tuʼn tikʼx bʼis kyuʼn junjun xjal, in xi kyqʼamaʼn kye txqantl tiʼ in kubʼ kynaʼn, atzun junjuntl mintiʼ in xi kyqʼamaʼn. In tzaj kyqʼamaʼn xjal in che xnaqʼtzan tiʼj bʼis qa nim toklen tuʼn t-xi tqʼamaʼn jun xjal tiʼ in kubʼ tnaʼn. Qa kwest tuʼn tyolina tukʼil juntl tiʼjju in kubʼ tnaʼna, chebʼe chebʼe jaku bʼant tuʼna. Jaku txi tzyet tuʼna aj tyolina tukʼil jun tamiwa.

• Ateʼ junjun in che oqʼ nim, atzun junjuntl mintiʼ in netz taʼl kywitz, pero in che bʼisun.

NABʼIL TOJ TYOL DIOS: «Bʼaʼn tuʼn tanmi xjal alkye taʼw tok tiʼj» (Proverbios 14:10).

• Ateʼ junjun xjal o kyim jun toj kyja in xi kykʼaʼn nim qʼeʼn moqa in najbʼen droga kyuʼn tuʼntzun miʼn tkubʼ kynaʼn nim bʼis. Qa ma bʼant jlu kyuʼn, jaku tzaj nya bʼaʼn kyiʼj. Oʼkx jaku tzʼonin jlu kyiʼj kyoj junjun qʼij, pero yajxitl, in tzaj nim nya bʼaʼn kyiʼj. Tuʼntzunju, jyonxa juntl tumel tzeʼn tuʼn texa twitz bʼis.

NABʼIL TOJ TYOL DIOS: «Qtxʼjoʼmel tkyaqilju in tzʼilsante qchibʼjal» (2 Corintios 7:1).

• Ateʼ nim xjal in nel kypaʼn ambʼil tuʼn t-xi kybʼinchaʼn junxichaq tiʼchaq tuʼntzun tikʼ tnaʼl bʼis kyuʼn.

• Jaku tzʼel chʼin bʼis tiʼja qa ma tzʼel tpaʼna ambʼil tuʼn ttena kyukʼil tamiwa moqa aj t-xi tjyoʼna akʼaj tamiwa. Ax ikx jaku tzʼonin tiʼja qa ma xnaqʼtzana kyiʼj junjuntl tiʼchaq moqa ma tzʼel tpaʼna ambʼil tuʼn ttzalaja jun rat.

• Chebʼe chebʼe jaku che chʼexpaj qe tiʼchaq toj tanqʼibʼila. Aj tok tkeʼyina, ya mintiʼxix in yolina tiʼj bʼis ex mas in nok tqʼoʼna twiʼya kyiʼj junjuntl tiʼchaq. Aj tbʼaj jlu, in tzaj tyekʼin qa chʼix texa twitz bʼis.

NABʼIL TOJ TYOL DIOS: «At tqʼijlalil tuʼn qjaw oqʼ, ex at tqʼijlalil tuʼn qtzeʼn» (Eclesiastés 3:1, 4).

• Miʼn txi tqʼoʼna nim ambʼil tuʼn tkubʼ t-ximana tiʼ kxel tbʼinchaʼna junjun qʼij.

• Qa ma ximana tiʼj alkye or tuʼn t-xiʼya jtal, tuʼn taqʼunana ex tuʼn tbʼant junjuntl tiʼchaq tuʼna, kʼelel tnikʼa tiʼj qa jaku che bʼant aʼyex tiʼchaq tuʼna ik tzeʼn nej.

• Qa ma kubʼ tbʼinchaʼna junjun tiʼchaq jaku che onin tiʼja, mlay kubʼ tnaʼna nim bʼis.

NABʼIL TOJ TYOL DIOS: «Ate Dios knojsalte tanmi xjal tuʼn tzalajbʼil, kyjaʼtzun mlay tzaj bʼaj tkʼuʼj tiʼj tchwinqlal ok tten tzalu twitz txʼotxʼ» (Eclesiastés 5:20).

• Ateʼ xjal jun rat in xi kybʼinchaʼn junjun tiʼchaq nim toklen aj in nikʼ chʼin ambʼil tkyimlen jun toj kyja ex yajxitl, in tzaj kybʼis tiʼj.

• Qa jaku bʼant, bʼaʼn tuʼn tyona chʼin ambʼil tuʼntzun tbʼant junjun chʼixpubʼil tuʼna ik tzeʼn toj tjaya, toj taqʼuna moqa jatumel kxel tkʼuʼna qe tiʼchaq te tfamiliara otoq kyim.

NABʼIL TOJ TYOL DIOS: «Aju xjal nej in kubʼ ten ximal tiʼj alkye tuʼn tbʼant tuʼn, bʼaʼn nneʼl te te, atzunju xjal noq t-xoʼn tibʼ tiʼj jun tiʼxti ex mintiʼ in kubʼ ten ximal tiʼj qa bʼaʼn, ktzajel mebʼayil tiʼj» (Proverbios 21:5).

• Ateʼ nim xjal in nonin kyiʼj aj t-xi kybʼinchaʼn junjun tiʼchaq tuʼntzun ttzaj kynaʼn toj kyja otoq kyim.

• Bʼaʼn tuʼn t-xi tjyoʼna jatumel jaku kubʼ tqʼoʼna jun tfoto ex qa junjuntl tiʼchaq, moqa tzʼibʼinkuxa toj jun cuaderno junjun ambʼil nim toklen toj twitza. Jaku tzʼonin jlu tiʼja tuʼn texa twitz bʼis.

• Kʼunxa qe tiʼchaq in che tzaj tnaʼna tbʼanel ambʼil tuʼn ex bʼaʼn tuʼn kyok tkeʼyina qa otoq bʼant ttena.

NABʼIL TOJ TYOL DIOS: «Kynaʼntze qe tqʼijlalil ojtxi» (Deuteronomio 32:7).

• Bʼaʼn tuʼn tkubʼ t-ximana tuʼn texa bʼetil junjun qʼij.

• Qa nya tgana tuʼn tel tpaʼna nim qʼij tuʼn texa pasialil, jaku tzʼexa jun moqa kabʼe qʼij tuʼntzun tonin tiʼja. Jaku txiʼya visitaril qe toj tjaya, jaku txiʼya visitaril jun museo, jaku tzʼexa bʼetil toj kar moqa toj alkyexku juntl lugar.

• Axpe ikx, jaku tzʼonin tiʼja tuʼn texa twitz bʼis qa ma kubʼ tchʼexpuʼna junjun tiʼchaq in bʼant tuʼna junjun qʼij.

NABʼIL TOJ TYOL DIOS: «Kytzaje kyjunalxe, qoʼqe tuj jun lugar mintiʼ kynajbʼil xjal tuj, tuʼntzun qojlan chʼin» (Marcos 6:31).

• Bʼaʼn tuʼn ttzaj tnaʼna qa jaku tzalaja aj tonina kyiʼj txqantl.

• Jaku txi tzyet tuʼn tonina kyiʼj toj tjaya moqa kyiʼj tamiwa in che bʼisun ik tzeʼn teya. Ax ikx kye, bʼalo kyaj tuʼn kyok bʼin kyuʼn txqantl tuʼntzun t-xi kyqʼamaʼn tiʼ in kubʼ kynaʼn.

• Qa ma tzʼonina kyiʼj txqantl ex qa ma txi tqʼuqbʼaʼna kykʼuʼj, jaku tzʼonin tiʼja tuʼn ttzalaja ex tuʼn tel tnikʼa tiʼj qa kukx jaku ten ttxolil tanqʼibʼila.

NABʼIL TOJ TYOL DIOS: «Mas at tzalajbʼil kyeye qa at chʼin ma txi kyqʼoʼne te juntl, ex mya aqeye tuʼn kykʼmonteye chʼin ktzajel qʼoʼn kyeye tuʼn juntl» (Hechos 20:35).

• Jaku tzʼonin bʼis tiʼja tuʼn tel tnikʼa tiʼj tiʼxix nim toklen.

• Bʼaʼn tuʼn tajbʼen ambʼil tuʼna tuʼn t-ximana tiʼj tiʼ in bʼant tuʼna toj tanqʼibʼila.

• Qa il tiʼj, bʼaʼn tuʼn tbʼaj tchʼexpuʼna junjun tiʼchaq in bʼant tuʼna.

NABʼIL TOJ TYOL DIOS: «Mas bʼaʼn tuʼn qxiʼ jatum in che oqʼ xjal tiʼj jun kyimni, twitzju tuʼn qxiʼ tuj jun ninqʼij tja jun xjal, porke aju kamik atzun bʼajsbʼil kye kykyaqil xjal, ex aqeju itzʼxqe bʼaʼn tuʼn kyximan tiʼj» (Eclesiastés 7:2).

Bʼaʼn tuʼn tel tnikʼa tiʼj qa kukx tzul bʼis tiʼja junjun maj. Pero o tzʼel kynikʼ nim xjal tiʼj qa o che onin junjun nabʼil kyiʼj ik tzeʼn qeju ma qo yolin tiʼj toj xnaqʼtzbʼil lu. Noqtzun tuʼnj, nya oʼkx qe nabʼil lu jaku che onin kyiʼj xjal, ax ikx ateʼ junjuntl. Tuʼntzunju, qa ma txi tbʼinchaʼna junjun nabʼil in tzaj qʼamaʼn tzalu, jaku che onin tuʼn tel chʼin bʼis tiʼja.