¿Ope tzʼel kynikʼ científico tiʼj tzeʼn tzaj tzyet universo ex anqʼibʼil? Naʼmx tel kynikʼ tiʼj. In kubʼ kyximen nim xjal qa jaku tzaj tchikʼbʼaʼn cosmología tzeʼn tzaj tzyet universo. Noqtzun tuʼnj, in tzaj tqʼamaʼn Marcelo Gleiser jlu, jun xjal mintiʼ in xi tnimen qa at Dios ex profesor te Astronomía te Universidad de Dartmouth: «Naʼmx tel qnikʼe tiʼj tzeʼn tzaj tzyet universo».

Yajtzun chwinqlal, ¿jatumel tzaj tzyet? In tzaj tqʼamaʼn jun xnaqʼtzbʼil toj revista Science News jlu: «Bʼalo mlayx tzʼel qnikʼ tiʼj tzeʼn tzaj tzyet chwinqlal tzalu twitz Txʼotxʼ. O che naj qe abʼj ex qe fósil jaku che onin qiʼj tuʼn tel qnikʼ tiʼj tzeʼn tzaj tzyet anqʼibʼil». In tzaj kyyekʼin kabʼe tqanil lu qa naʼmx tel kynikʼ científico tiʼj tzeʼn tzaj tzyet universo ex chwinqlal.

Jakulo kubʼ t-xjelina jlu: «Qa at jun Bʼinchal qe ex at tnabʼil, ¿alkyetzun? ¿Tiquʼn in tzaj tqʼoʼn ambʼil tuʼn qikʼ toj yajbʼil? ¿Tiquʼn in tzaj tqʼoʼn ambʼil tuʼn kyten nim okslabʼil? ¿Tiquʼn in tzaj tqʼoʼn ambʼil tuʼn tkubʼ kybʼinchaʼn okslabʼil nim nya bʼaʼn?».

Mintiʼ in tzaj kyqʼoʼn científico tzaqʼwebʼil kyiʼj xjel lu, pero nya a t-xilen jlu qa mlay kanet tzaqʼwebʼil quʼn. Ateʼ nim xjal o kanet tzaqʼwebʼil kyuʼn toj Tyol Dios.

Ateʼ junjun científico o tzʼel kypaʼn ambʼil tuʼn kyxnaqʼtzan tiʼjju in tzaj tqʼamaʼn Tyol Dios. ¿Taja tuʼn tok tbʼiʼna tiquʼn o tzʼok qeʼ kykʼuʼj junjun científico tiʼj qa at jun Bʼinchalte tkyaqil? Jaku tzʼokxa toj jw.org ex jaku txi tjyoʼna toj jyobʼil «aju kyximbʼetz xjal tiʼjju tzeʼn tzaj tzyet qanqʼibʼil».