Nim toklen tuʼn tel tnikʼa tiʼj tzaqʼwebʼil
¿Tiquʼn nim toklen tuʼn tel tnikʼa tiʼj qa at jun Bʼinchal tkyaqil? Tuʼnju qa ma tzʼel tnikʼa tiʼj qa at Dios ex at nim tipumal, bʼalo jaku kubʼ t-ximana tuʼn tel tnikʼa tiʼj qa atz tzajni Biblia tukʼil. Ex qa ma tzʼok qeʼ tkʼuʼja tiʼj Biblia, jaku che kanet tbʼanel tiʼchaq lu tuʼna:
Mas jaku tzalaja tiʼj tanqʼibʼila
IN TZAJ TQʼAMAʼN TYOL DIOS JLU: Tzaj tqʼoʼn Dios tbʼanel tiʼchaq kye xjal. «In kuʼtz tqʼoʼn jbʼal qibʼaj, ex in tzaj tqʼoʼn tqʼijlalil tuʼn tchmet qawal, ex in tzaj tqʼoʼn qwa tuʼn ttzalaj qanmi» (Hechos 14:17).
¿TIʼ T-XILEN JLU? Qa jun oyaj tuʼn Dios tkyaqilju in nok qkeʼyin twitz kyaʼj ex twitz Txʼotxʼ. Aj tel tnikʼa tiʼj toj Biblia qa in ximen Dios tiʼja, mas jaku tzalaja.
Che kanetel tbʼanel consej tuʼna
IN TZAJ TQʼAMAʼN TYOL DIOS JLU: «Kʼelel tnikʼa tiʼj aju tjiqumal tiʼj ex aju tzʼaqlxix, ex tiʼj tkyaqil aju bʼaʼn tuʼn tbʼant tuʼna» (Proverbios 2:9).
¿TIʼ T-XILEN JLU? Tuʼnju a Dios Bʼinchal teya, ojtzqiʼn tuʼn tiʼ jaku tzʼonin tiʼja tuʼn ttzalaja. Qa ma xnaqʼtzana tiʼjju in tzaj tqʼamaʼn Tyol Dios, che kanetel tbʼanel consej tuʼna ex che onil tiʼja.
Kʼonil tiʼja tuʼn kykanet tzaqʼwebʼil kyiʼj t-xjela
IN TZAJ TQʼAMAʼN TYOL DIOS JLU: «Kʼelel tnikʼa tiʼj tzaʼn tten tuʼn tojtzqinteya Dios» (Proverbios 2:5).
¿TIʼ T-XILEN JLU? Qa ma tzʼel tnikʼa tiʼj qa at jun Bʼinchalte tkyaqil, kʼonil tiʼja tuʼn kykanet tzaqʼwebʼil tuʼna kyiʼj junjun xjel nim kyoklen ik tzeʼn, ¿alkye ttxolil qanqʼibʼil?, ¿tiquʼn at nim yajbʼil ex jatumel in cheʼx xjal aj kykyim? Jaku che kanet tzaqʼwebʼil tuʼna toj Biblia ex jaku tzʼok qeʼ tkʼuʼja tiʼj.
Ktel qʼuqbʼil tkʼuʼja tiʼj ambʼil tzul
IN TZAJ TQʼAMAʼN TYOL DIOS JLU: «Bʼaʼn wuʼne alkye nximbʼetze kyiʼje; ximan wuʼne tuʼn nbʼinchanteye bʼaʼn kyiʼje ex mya tuʼn nbʼinchanteye mya bʼaʼn. In xi nmaʼne jlu tuʼntzun tqeʼ kykʼuʼje tiʼj oybʼil, ex mas bʼaʼn che tele te yajxitl. Aqine Dios in chin qʼmante jlu» (Jeremías 29:11).
¿TIʼ T-XILEN JLU? In tzaj ttziyen Dios qa kʼelel tiʼn tkyaqil nya bʼaʼn in tzaj qiʼj, axpe ikx aju kyimen. Qa ma tzʼok qeʼ tkʼuʼja tiʼjju in tzaj ttziyen Dios, ktel tipumala tuʼn texa kywitz nya bʼaʼn junjun qʼij.
