KXOL xnaqʼtzbʼil mas yolin Jesús tiʼj, at aju naʼj Dios. Toj ambʼil tej tten Jesús, naqʼli qe nejenel kye aj Judiy tuʼn kynaʼn Dios «jatum in che mojeʼ cay». ¿Tiquʼn bʼant jlu kyuʼn? «Tuʼntzun kyok keʼyin kyuʼn xjal». Kyajtoq tuʼn tok qʼoʼn kyoklen tuʼnju bʼant kyuʼn. Nim kye e ok ten naʼl Dios toj nim ambʼil ex xi kyqʼamaʼn nim maj aʼyex yol. Bʼalo kubʼ kyximen qa jakutoq che tzaj bʼiʼn tuʼn Dios qa ma che ajbʼen «nimku kyyol» (Mateo 6:​5-8). Kyaj t-xnaqʼtzaʼn Jesús qa mintiʼ kyajbʼen yol lu ex iktzun tten kyaj tyekʼin tzeʼn tuʼn kynaʼn xjal Dios. Noqtzun tuʼnj, nya oʼkx kyaj t-xnaqʼtzaʼn Jesús tiʼ mintiʼ tuʼn tbʼant quʼn aj qnaʼn Dios. ¿Tiʼ mas kyaj t-xnaqʼtzaʼn?

Kyaj t-xnaqʼtzaʼn Jesús qa nim toklen tuʼn t-xi qqanin tuʼn tok tbʼi Dios te xjan, tuʼn tul Tkawbʼil ex tuʼn tbʼant tajbʼil. Ex kyaj tqʼamaʼn qa toj tumel aj t-xi qqanin onbʼil te Dios kyiʼj junjun tiʼchaq in qo ok weʼ twitz (Mateo 6:​9-13; Lucas 11:​2-4). Ax ikx, e ajbʼen qe techel tuʼn tuʼntzun tel qnikʼ tiʼj qa il tiʼj tuʼn t-xi qqanin nim maj jun tiʼ, tuʼn tten qʼuqbʼil qkʼuʼj ex tuʼn tkubʼ qin qibʼ qa qaj tuʼn ttzaj tbʼiʼn Jehová qnaʼj Dios (Lucas 11:​5-13; 18:​1-14). Tej tyolin tiʼj jlu, ax kubʼ qʼonte techel kywitz txqantl tzeʼn tuʼn tbʼant quʼn (Mateo 14:23; Marcos 1:35).

Jaku txi qqʼamaʼn qa nim e onin xnaqʼtzbʼil kyiʼj qeju ok lepeʼ tiʼj Jesús tuʼntzun kynaʼn Dios toj tumel. Maske ikju, kyaj tqʼoʼn Jesús jun tbʼanel techel kywitz t-xnaqʼtzbʼen tiʼj naʼj Dios toj mankbʼil qonikʼen tuʼn tten tzalu twitz Txʼotxʼ.

Toj qonikʼen aju, kukx onin Jesús kyiʼj t-apóstol. Atzun jun tbʼanel ambʼil tuʼn t-xi tqʼamaʼn jun akʼaj xnaqʼtzbʼil kye. Tqʼama jlu: «Aqine ju bʼe, aqine ju yol axix tok, ex aqine qʼol chwinqlal; mi aʼl jun xjal jaku pon tukʼil Dios Mambʼaj, qa mya wuʼne». Tej tqʼama jlu, ax ikx kyaj ttziyen jlu: «Tkyaqilju kxel kyqanine te Nmane tuʼnju okslal qeye wiʼje, ok nbʼinchaʼye kyeye tuʼntzun tjaw nimsaʼn tbʼi Nmane tiʼj ju ok nbʼinchaʼye kyeye, aqine Tkʼwaʼl. Qa at jun tiʼxti ma txi kyqanine [... toj nbʼiye], ok nbʼinchaʼye kyeye». Tej chʼixtoq tkubʼaj tuʼn tyolin, tqʼama jlu: «Jaʼlo naʼnx t-xi kyqanine jun tiʼxti [... toj nbʼiye]; kyqaninxe jaʼlo, ex ok kykʼmaʼye tuʼntzun kytzalaje nimxix» (Juan 14:​6, 13, 14; 16:24).

Tbʼanelxix aju tqʼama Jesús. Tqʼama jun diccionario in yolin tiʼj Xjan Uʼj qa tuʼn jlu bʼant «jun chʼixpubʼil tiʼj alkye tten tuʼn qnaʼn Dios». Pero nya tuʼn jlu tqʼama Jesús qa il tiʼj tuʼn qnaʼn Dios te ex nya te Jehová, sino xi tjyoʼn tumel tuʼn qok laqʼeʼ ttxlaj Jehová.

Ojtzqiʼn quʼn qa kukx o tzaj tbʼiʼn Jehová kynaʼj Dios tmajen (1 Samuel 1:​9-19; Salmo 65:2). Noqtzun tuʼnj, atxix tej tkyaj bʼant tiʼj tyol Jehová kyukʼil aj Israel, iltoq tiʼj tuʼn tel kynikʼ tiʼj qa aʼye otoq che ok te tmajen tuʼntzun ttzaj bʼiʼn kynaʼj Dios. Ex tej tbʼet ambʼil, iltoq tiʼj tuʼn tok qeʼ kykʼuʼj tiʼj qa oʼkx jakutoq kubʼ qʼet chojbʼil toj tja Dios bʼant tuʼn Salomón tuʼnju atzun otoq jaw tskʼoʼn Jehová (Deuteronomio 9:29; 2 Crónicas 6:​32, 33). Pero chʼexpaj tumel lu tej tbʼet ambʼil. Ik tzeʼn tqʼama apóstol Pablo, ok Ley xi qʼoʼn kye aj Israel ex qe chojbʼil kubʼ qʼoʼn toj tja Dios te jun «t-xlekumal aju tbʼanil attoq tulel» (Hebreos 10:​1, 2). Iltoq tiʼj tuʼn tpon ambʼil tuʼn kyok qkeʼyin qe tiʼchaq lu (Colosenses 2:17). Tuʼntzunju, atxix toj abʼqʼi 33 tiʼj ambʼil qʼiʼn jun jaʼlo, ya mintiʼ in najbʼen Ley xi qʼoʼn te Moisés quʼn tuʼn tten jun tbʼanel qamiwbʼil tukʼil Jehová. Aju tuʼn tbʼant quʼn, il tiʼj tuʼn t-xi qnimen Jesús, aju yolin Ley tiʼj (Juan 15:​14-16; Gálatas 3:​24, 25).

Bʼant jun tiʼ tuʼn Jesús tuʼn qok laqʼeʼ ttxlaj Jehová. Ok tqʼon tibʼ ik tzeʼn jun tbʼanel amiw ex xi tjyoʼn tumel tuʼn ttzaj bʼiʼn qnaʼj Dios ex tuʼn kytzaj tzaqʼweʼn. ¿Tiquʼn jaku bʼant jlu tuʼn Jesús qiʼj?

Qkyaqilx aj il qoʼ aj in qo ul itzʼj ex mlay bʼant jun tiʼ quʼn tuʼn tel, axpe ikx, mlay tzʼel qiʼn tuʼn alkyexku chojbʼil jaku txi qqʼoʼn. Ax ikx, mintiʼ qoklen tuʼn tten jun tbʼanel qamiwbʼil tukʼil Jehová, aju Dios xjan (Romanos 3:​20, 24; Hebreos 1:​3, 4). Noqtzun tuʼnj, chjet kyil xjal tuʼn Jesús tej t-xi tqʼoʼn tchwinqlal kyiʼj (Romanos 5:​12, 18, 19). Noq tuʼn jlu, jaku ten jun tbʼanel qximbʼetz twitz Jehová ex jaku qo tzalaj aj qyolin tukʼil qa ma tzʼok qeʼ qkʼuʼj tiʼj chojbʼil bʼant tuʼn Tkʼwal ex qa ma qo naʼn Dios toj tbʼi.

Aj qnaʼn Dios toj tbʼi Jesús, tuʼn jlu in kubʼ qyekʼin qa qʼuqli qkʼuʼj tiʼj oxe aqʼuntl in bʼant tuʼn tuʼn tbʼant tajbʼil Dios. Jun, a in nok te «Tal T-ẍneʼl Dios» ex tuʼn chojbʼil bʼant tuʼn, in kubʼ najset kyil xjal. Tkabʼin, qa ok te «tnejel pal» tej tjaw anqʼin tuʼn Jehová. Ex toxin, oʼkx te in nok te bʼe tuʼntzun qok laqʼeʼ ttxlaj Jehová aj qnaʼn Dios te (Juan 1:29; 14:6; Hebreos 4:​14, 15).

Ex aj qnaʼn Dios toj tbʼi Jesús, in nok qqʼoʼn toklen. Toj tumel jlu tuʼnju taj Jehová tuʼn «kykubʼ ẍmejeʼ kykyaqil [...] twitz Jesús ok kybʼinte aju tbʼi, [...] ex tuʼn kymante kykyaqil: Ax tok ate Jesucrist Qajaw, tuʼntzun tjaw nimsaʼn tbʼi Qman Dios» (Filipenses 2:​10, 11). Ex aju mas nim toklen, qa ma qo naʼn Dios toj tbʼi Jesús, kjawil qnimsaʼn Jehová tuʼnju a tzaj qʼonte Tkʼwal te chojbʼil tuʼn tchej qil (Juan 3:16).

Tuʼn tel qnikʼ tiʼj toklen Jesús o txi qʼoʼn, in tzaj tqʼamaʼn Tyol Dios junxichaq tbʼi ex junxichaq título tiʼj. Kykyaqil jlu in che onin qiʼj tuʼn tel qnikʼ tiʼj qa in che tzaj qkʼamoʼn kʼiwlabʼil noq tuʼnju o bʼant tuʼn Jesús ex tuʼnju in bʼant tuʼn jaʼlo, ex kukx kbʼantel junjuntl tiʼchaq tuʼn qiʼj toj ambʼil tzul. (Qʼonka twitza tiʼj recuadro « Aju toklen Jesús ). Tuʼn jlu in nel qnikʼ tiʼj qa «ok tqʼoʼn Dios jun tbʼi [Jesús] mas maʼ t-xilen twitz kybʼi kykyaqil», toj juntl yol, xi qʼoʼn toklen toj kyaʼj ex twitz Txʼotxʼ (Filipenses 2:9; Mateo 28:18). *

Ik tzeʼn ma tzʼel qnikʼ tiʼj, il tiʼj tuʼn qnaʼn Dios toj tbʼi Jesús qa qaj tuʼn qtzaj bʼiʼn tuʼn Jehová (Juan 14:​13, 14). Pero nya qaj tuʼn oʼkx qnaqʼet tuʼn t-xi qqʼamaʼn «toj tbʼi Jesús» aj qbʼaj naʼn Dios tuʼnju jaku kubʼ qyekʼin qa mintiʼ toklen. ¿Tiquʼn?

Ximana tiʼj techel lu. Qa in tzaj qʼoʼn jun uʼj teya tuʼn jun xjal in naqʼunan toj jun empresa, bʼalo naqʼli tuʼn tkubʼ ttzʼibʼin jlu aj tkubʼaj tcarta: «Aqine aju...». ¿Pero jakupe kubʼ t-ximana qa toj tanmi xjal otoq jatz jlu moqa noq otoq naqʼet tuʼn tkubʼ ttzʼibʼin txol yol lu? Tuʼntzunju, nya oʼkx tuʼn qnaqʼet tuʼn qnaʼn Dios toj tbʼi Jesús, sino il tiʼj tuʼn qximen tiʼj tiquʼn in bʼant jlu quʼn. In nel qnikʼ tiʼj qa nim toklen tuʼn qnaʼn Dios tuʼn tkyaqil qanmi ex nya oʼkx tuʼn qnaqʼet tuʼn t-xi qqʼamaʼn jun txol yol (1 Tesalonicenses 5:17; Salmo 119:145).

¿Tiʼ jaku bʼant quʼn tuʼn miʼn txi qqʼamaʼn «toj tbʼi Jesús» noq tuʼnju otoq qo naqʼet tiʼj? ¿Jakupe qo ximen kyiʼj tbʼanel tmod Jesús? Qo ximen tiʼjju o bʼant tuʼn Jesús qiʼj ex tiʼjju taj tuʼn t-xi tbʼinchaʼn qiʼj toj ambʼil tzul. Aj qnaʼn Dios, qqʼonx chjonte te Jehová ex qnimsanktz tbʼi tuʼnju alkye tten o tzʼajbʼen Tkʼwal tuʼn. Qa ma bʼant jlu quʼn, mas kchʼiyel qʼuqbʼil qkʼuʼj kyiʼj yol lu, aju tqʼama Jesús: «Ax tok kxel nmaʼne kyeye, tkyaqilju kxel kyqanine te Nmane [... toj nbʼiye], ktzajel tqʼoʼn kyeye» (Juan 16:23).