ATEʼ nim xjal mintiʼ in nok qeʼ kykʼuʼj tiʼj qa jaku tzʼonin naʼj Dios kyiʼj. Atzunte Tyol Dios in tzaj tqʼamaʼn qa jaku tzʼonin qiʼj (Lucas 22:40; Santiago 5:13). Nya oʼkx in nonin naʼj Dios qiʼj tuʼn tten jun tbʼanel qamiwbʼil tukʼil Jehová, sino ax ikx in nonin qiʼj tuʼn tkubʼ qnaʼn bʼaʼn ex tuʼn qtzalaj. ¿Tiquʼn in xi qqʼamaʼn jlu?

Qo ximen tiʼj jun techel, aj t-xi qʼoʼn jun oyaj te jun kʼwal, ¿tiʼ in xi kyqʼamaʼn mambʼaj te tuʼn t-xi tbʼinchaʼn? In xi kyqʼamaʼn te qa nya oʼkx tuʼn ttzalaj tiʼj oyaj, sino ax ikx il tiʼj tuʼn t-xi tqʼoʼn chjonte. Aj tkubʼ qyekʼin qa in xi qqʼoʼn chjonte kyukʼil qyol, kʼonil qiʼj tuʼn kukx tbʼant quʼn. Axtzun jlu in bʼaj qa ma qo naʼn Dios. Qo xnaqʼtzan tiʼj tzeʼn in che onin junxichaq naʼj Dios qiʼj.

Aj qnaʼn Dios tuʼn t-xi qqʼoʼn chjonte. Aj t-xi qqʼoʼn chjonte te Dios kyiʼj kykyaqil tbʼanel tiʼchaq in che ikʼ qiʼj, in nonin qiʼj tuʼn qximen kyiʼj kʼiwlabʼil in che tzaj qkʼamoʼn. Tuʼn jlu mas in qo tzalaj, in ten tbʼanel qximbʼetz ex kukx in qo qʼon chjonte (Filipenses 4:6).

Jun techel: xi tqʼoʼn Jesús chjonte te Jehová tuʼnju tzaj tbʼiʼn qe tnaʼj Dios (Juan 11:41).

Aj qnaʼn Dios tuʼn t-xi qqanin najsam. Aj t-xi qqanin te Dios tuʼn tkubʼ tnajsaʼn qil, in nonin qiʼj tuʼn miʼn tkubʼ qnaʼn nya bʼaʼn. Ax ikx, in nonin qiʼj tuʼn tbʼaj qxnaqʼtzaʼn qnabʼil tuʼnju in tzaj tyekʼin qa jun matij il aju otoq bʼant quʼn. Ex in nonin qiʼj tuʼn tajtz tiʼj qanmi.

Jun techel: naʼn David Dios tuʼn tkubʼ tyekʼin qa otoq tzʼajtz tiʼj tanmi (Salmo 51).

Aj qnaʼn Dios tuʼn t-xi qqanin onbʼil ex qnabʼil. In che onin naʼj Dios lu qiʼj tuʼn miʼn tjaw qnimsan qibʼ ex tuʼn tel qnikʼ tiʼj qa mlayx bʼant tkyaqil quʼn. Ax ikx, in che onin qiʼj tuʼn tok qeʼ qkʼuʼj tiʼj Jehová ex nya qiʼjx (Proverbios 3:​5, 6).

Jun techel: Xi tqanin Salomón onbʼil ex tnabʼil te Jehová tuʼntzun tbʼant tkawin kyibʼaj aj Israel (1 Reyes 3:​5-12).

Aj qnaʼn Dios tuʼnju in tzaj bʼaj qkʼuʼj. Jaku chewix qanmi aj t-xi qqʼamaʼn te Dios tkyaqilju in kubʼ qnaʼn aj qok weʼ twitz jun nya bʼaʼn. Ex kʼonil jlu qiʼj tuʼn ttzaj qnaʼn qa nim toklen tuʼn tonin Jehová qiʼj (Salmo 62:8).

Jun techel: xi tqʼamaʼn Asá tbʼis tkʼuʼj te Dios tej kyok tzoqpaj aj qʼoj kyiʼj 2 Crónicas 14:11).

Aj qnaʼn Dios kyiʼj txqantl. Qa ma qo naʼn Dios kyiʼj txqantl, jaku tzʼonin qiʼj tuʼn miʼn qximen oʼkx qiʼjx ex tuʼn kyten tbʼanel qmod, ik tzeʼn qʼaqʼbʼil qkʼuʼj ex tuʼn tel qnikʼ tiʼjju in bʼaj kyiʼj txqantl.

Jun techel: naʼn Jesús Dios kyiʼj t-xnaqʼtzbʼen (Juan 17:​9-17).

Aj qnaʼn Dios tuʼn tjaw qnimsaʼn Jehová. Aj tjaw qnimsan Jehová kyuʼn tbʼanel tmod ex tbʼinchbʼen, in nonin qiʼj tuʼn tok qqʼoʼn mas toklen ex tuʼn tok qkʼujlaʼn. In che onin naʼj Dios lu qiʼj tuʼn qok laqʼeʼ ttxlaj Jehová, aju Qtat at toj kyaʼj.

Jun techel: jaw tnimsaʼn David Jehová tiʼj tbʼinchbʼen (Salmo 8).

Pero nya oʼkx qe kʼiwlabʼil lu in che tzaj qkʼamoʼn aj qnaʼn Dios. Sino ax ikx in qeʼ qkʼuʼj tuʼn tuʼnju «mas maʼ t-xilen [...] twitz tkyaqil kynabʼl xjal» (Filipenses 4:7). Mintiʼ jun tiʼ jaku qo tzalaj tuʼn twitzju tuʼn qten bʼaʼn ex tuʼn qten toj txubʼtxaj. Axpe ikx jaku tzʼonin qiʼj tuʼn miʼn ttzaj yabʼil qiʼj (Proverbios 14:30). Pero ¿tiʼ jaku bʼant quʼn tuʼn tqeʼ qkʼuʼj? ¿Oʼkxpe tuʼn tok tilil quʼn moqa at juntl tiʼ nim toklen tuʼn tbʼant quʼn?