4 O naj kykʼujlabʼil xjal kyiʼj toj kyja

«Ok che ul xjal [...] mintiʼ kykʼujlalil» (2 TIMOTEO 3:1-3).

● Atz jawni tiʼj tnam Gales, in naqʼunan Chris toj jun kʼloj xjal in kolin kyiʼj xjal in nok bʼinchaʼn nya bʼaʼn kyiʼj kyuʼn toj kyja. Tqʼama jlu: «Jun qʼij, ul jun xuʼj otoq bʼaj kʼixbʼisaʼn ex mintiʼ el nnikʼe tiʼj. Ax ikx, in che ul junjuntl xuʼj in xi qʼamaʼn nim nya bʼaʼn yol kye ex tuʼn jlu mintiʼ in tzaj kykeʼyin toj qwitz».

¿TIʼ IN TZAJ KYQʼAMAʼN TQANIL? Toj jun tnam te África, tiʼj 100 xuʼj chʼixme 30 o che kubʼ violarin tej tal txin qe. Ex tzaj tyekʼin jun encuesta ok toj tnam lu, qa nim xinaq kyqʼama qa toj tumel tuʼn tok kybʼyoʼn kyxuʼjil. Noqtzun tuʼnj, nya oʼkx qe xuʼj in nok bʼinchaʼn nya bʼaʼn kyiʼj kyuʼn toj kyja. Jun techel, toj tnam Canadá tiʼj lajaj xinaq chʼixme oxe in che ok kʼixbʼisaʼn ex in nok bʼinchaʼn nya bʼaʼn kyiʼj tuʼn kyxuʼjil.

AJU IN TZAJ KYQʼAMAʼN XJAL: Atxix ojtxe in che ok kʼixbʼisaʼn xjal kyuʼn toj kyja, noqtzun tuʼnj, mas in nok kyqʼoʼn xjal kywi tiʼj jlu toj ambʼil jaʼlo.

¿TOJPE TUMEL AJU IN TZAJ KYQʼAMAʼN XJAL? Ax tok, kyoj abʼqʼi o che ikʼ o tzʼel kynikʼ xjal tiʼj qa nya bʼaʼn jlu. Pero ¿ope tzʼonin jlu tuʼn miʼn kyok kʼixbʼisaʼn mastl xjal? Mintiʼ. Toj ambʼil jaʼlo, ya mintiʼ in kubʼ kyyekʼin xjal kykʼujlabʼil kyiʼj toj kyja.

¿TIʼ T-XIMA TIʼJ? ¿In japunpe kywi qe yol in tzaj qʼamaʼn toj 2 Timoteo 3:1 a 3? ¿Ateʼpe nim xjal mintiʼ in kubʼ kyyekʼin kykʼujlabʼil kyiʼj toj kyja?

Aju tjweʼyin profecía in japun twiʼ toj ambʼil jaʼlo at toklen tukʼil Txʼotxʼ. Qo xnaqʼtzaʼn tiʼj tiʼ in tzaj tqʼamaʼn Tyol Dios tiʼj jlu.

[Yol]

«Aj kyok bʼyoʼn xjal kyuʼn qe toj kyja, mintiʼ in cheʼx qʼol part tiʼj twitz ley. Aj t-xiʼ jun xuʼj qʼol part twitz polisiy, otoq tzʼok kʼixbʼisaʼn junlo 35 maj» (PORTAVOZ DEL SERVICIO DE AYUDA CONTRA EL MALTRATO DOMÉSTICO DE GALES).