5 In naj txʼotxʼ

«[Kpol] tqʼijlalil tuʼn kynaj qeju ma naj twitz txʼotxʼ kyuʼn» (APOCALIPSIS 11:18).

● In kʼayin Pirri tiʼj vin te palmera atz Kpor te tnam Nigeria. Noqtzun tuʼnj, o naj taqʼun tuʼnju o tzʼel qojl nim petróleo atz delta del Níger ex o che naj nim palmera tuʼn. In tzaj tqʼamaʼn jlu tukʼil bʼis: «O che kyim pescad, in tzaj nya bʼaʼn tiʼj qxmilal ex in che naj nim aʼ tuʼn [petróleo]. Oʼkx tuʼn aqʼuntl lu in kanet twi nwaye».

¿TIʼ IN TZAJ KYQʼAMAʼN TQANIL? In tzaj kyqʼamaʼn xjal at kyojtzqibʼil qa tkyaqil abʼqʼi in kux xoʼn 6 millón y medio tonelada tzʼis toj mar. Chʼixme nikʼjan tzʼis in kux xoʼn toj mar puro plástico ex kxel tiʼn nim syent abʼqʼi tuʼn tnaj. Tuʼn jlu, nya oʼkx in naj twitz Txʼotxʼ tuʼn, sino ax ikx ya mintiʼxix in chmet twitz kyawal xjal. In tzaj kyqʼamaʼn xjal in che xnaqʼtzan tiʼj Txʼotxʼ qa il tiʼj tuʼn t-xi tiʼn 17 xjaw tuʼn ttzaj tqʼoʼn Txʼotxʼ twitz awal in bʼaj kyuʼn xjal toj jun abʼqʼi. In tzaj tqʼamaʼn periódico Sydney Morning Herald te Australia jlu: «Qa kukx ma chʼiy kybʼet xjal ex qa kukx ma che ajbʼen tiʼchaq kyuʼn ik tzeʼn in bʼaj toj ambʼil jaʼlo, il-lo tiʼj tuʼn tten kabʼe Txʼotxʼ toj 2035».

AJU IN TZAJ KYQʼAMAʼN XJAL: At kyipumal ex kynabʼil xjal tuʼn tbʼant junjun tiʼchaq kyuʼn tuʼn tklet Txʼotxʼ.

¿TOJPE TUMEL AJU IN TZAJ KYQʼAMAʼN XJAL? O tzʼok tilil kyuʼn junjun xjal tuʼn kyxqʼuqin kyiʼj tzeʼ ex kyiʼj txkup. Tuʼn jlu, o che onin kyiʼj xjal tuʼn miʼn tbʼaj kyyajin twitz Txʼotxʼ. Maske ikju, kukx at nim contaminación twitz Txʼotxʼ.

¿TIʼ T-XIMA TIʼJ? ¿Ilpe tiʼj tuʼn tbʼant jun tiʼ tuʼn Dios tuʼn miʼn tnaj twitz Txʼotxʼ ik tzeʼn o tzaj ttziyen?

Nya oʼkx in yolin Tyol Dios kyiʼj profecía ma qo xnaqʼtzan kyiʼj, ax ikx in yolin kyiʼj tbʼanel tiʼchaq tuʼn tbʼaj kyoj bʼajsbʼil tqʼijlalil. Qo xnaqʼtzan tiʼj jun yekʼbʼil.

[Yol]

«Mintiʼ in chin anqʼine toj jun tbʼanel najbʼil, sino toj jun lugar jatumel at nim tzʼis» (COMENTARIO DE ERIN TAMBER, RESIDENTE DE LA COSTA SUR DE ESTADOS UNIDOS, SOBRE LOS EFECTOS DEL DERRAME PETROLÍFERO DE 2010 EN EL GOLFO DE MÉXICO).

[Recuadro]

¿Ape Dios at tpaj?

Tuʼnju in yolin Biblia kyiʼj junjun tiʼchaq in bʼaj toj ambʼil jaʼlo, ¿ape t-xilen jlu qa a Dios at tpaj tiʼjju nya bʼaʼn in tzaj qiʼj? Kkanetel tzaqʼwebʼil tuʼna tiʼj xjel lu toj capítulo 11 toj uʼj tok tbʼi ¿Tiʼ in tzaj t-xnaqʼtzaʼn Tyol Dios qe?, aju bʼinchan kyuʼn testigos de Jehová.

[Reconocimiento]

U.S. Coast Guard photo