6 In xi pakbʼet tyol dios twitz tkyaqil txʼotxʼ
6 In xi pakbʼet tyol dios twitz tkyaqil txʼotxʼ
«Aju tqanil bʼaʼn lu tiʼj tkawbʼil Dios kxel pakbʼet tuj tkyaqil twitz txʼotxʼ» (MATEO 24:14).
● In nanqʼin jun xuʼj Vaiatea tbʼi toj jun isla te archipiélago te Tuamotú atz toj Pacífico. Toj junlo 803 mil kilómetros in che anqʼin junlo 16 mil xjal toj junlo 80 islas. Maske najchaq ateʼ lugar lu, o che pon testigos de Jehová visitaril Vaiatea ex qe tvecin. ¿Tiquʼn o bʼant jlu kyuʼn? Tuʼnju kyaj tuʼn t-xi kypakbʼaʼn tbʼanel tqanil tiʼj Tkawbʼil Dios kye kykyaqil xjal noq jaxku tumel in che anqʼin.
¿TIʼ IN TZAJ KYQʼAMAʼN TQANIL? In xi pakbʼet tbʼanel tqanil tiʼj Tkawbʼil Dios twitz tkyaqil Txʼotxʼ. Toj 2010, e pakbʼan testigos de Jehová tiʼj tbʼanel tqanil mas te mil 600 millón or toj 236 nimaq tnam. Tuʼn jlu pakbʼan teyele junjun testigo de Jehová 30 minut tkyaqil qʼij. Kyoj qeju lajaj abʼqʼi o kye kyaj, o che bʼant ex o chex sipet mas te 20 mil millón uʼj tiʼj Tyol Dios kye xjal tuʼntzun kyxnaqʼtzan tiʼj.
AJU IN TZAJ KYQʼAMAʼN XJAL: Atxix ojtxe tzaj tzyet tuʼn kypakbʼan xjal tiʼj evangelio.
¿TOJPE TUMEL AJU IN TZAJ KYQʼAMAʼN XJAL? Ax tok, o tzʼok tilil kyuʼn nim xjal tuʼn kypakbʼan tiʼj tqanil tkuʼx toj Tyol Dios. Noqtzun tuʼnj, oʼkx o bʼant jlu kyuʼn toj chʼin ambʼil ex kye junjun xjal. Atzun kye testigos de Jehová in che pakbʼan kye nim millón xjal twitz tkyaqil Txʼotxʼ. Ex o bʼant jlu kyuʼn maske o che el ikʼun kyuʼn junjun kʼloj xjal nim kyipumal (Marcos 13:13). * Ax ikx, in nel kypaʼn testigos de Jehová ambʼil tuʼntzun kypakbʼan ex tuʼn t-xi kysipen uʼj kye xjal noq kukx. In bʼant aqʼuntl lu kyuʼn noq tuʼn onbʼil in xi kyqʼoʼn xjal tuʼn tkyaqil kykʼuʼj.
¿TIʼ T-XIMA TIʼJ? ¿In xipe pakbʼet tbʼanel tqanil tiʼj Tkawbʼil Dios twitz tkyaqil Txʼotxʼ? Tuʼnju in japun twi profecía lu toj ambʼil jaʼlo, ¿jakupe qo ayon tiʼj jun tbʼanel ambʼil?
[Tqanil]
^ taqik' 6 Qa taja tuʼn tel mas tnikʼa tiʼj jlu, qʼonka twitza tiʼj video Fieles ante las pruebas, Los triángulos púrpuras ex Los testigos de Jehová se mantienen firmes ante el ataque nazi, aju bʼinchan kyuʼn testigos de Jehová.
[Yol]
«Kukx qo pakbʼal tiʼj tbʼanel tqanil kye xjal ex kʼajbʼel alkyexku tumel quʼn tuʼn qpon kyukʼil akux in tzaj tqʼoʼn Jehová ambʼil qe» (ANUARIO DE LOS TESTIGOS DE JEHOVÁ 2010).