• AJU ABʼQʼI TEJ TUL ITZʼJ: 1941

• TNAM: BENÍN

• JUNJUNTL TQANIL: ATTOQ NIM T-XUʼJIL EX AJ QʼOJ KYIʼJ TESTIGOS DE JEHOVÁ

AJU IKʼ TOJ WANQʼIBʼILE:

Atz in nul itzʼje Cotonou, jun matij tnam te Benín. Católico qe toj njaye, pero chʼixme tkyaqil maj mintiʼ in xiʼye kyoj misa. Toj ambʼil aju, ateʼ nim católico ten nim kyxuʼjil, bʼaj jlu tuʼnju tzaj tqʼoʼn ley ambʼil tuʼn tten nim kyxuʼjil xjal. Ax ikx weye, ten kyaje nxuʼjile.

Toj 1970, tzaj tzyet tuʼn tten junjun chʼixpubʼil toj tnam Benín. Tuʼnju kubʼ nximane qa kʼoniltoq chʼixpubʼil lu tiʼj ntname, ok tilil wuʼne tuʼn wonine tiʼj ex okx nqʼon wibʼe toj política. Tuʼnju mintiʼ e onin testigos de Jehová kyiʼj tiʼchaq lu, i el ikʼun kyuʼn xjal kyajtoq tuʼn kybʼant chʼixpubʼil toj tnam, ex ax ikx weye i el wikʼune. Toj 1976, i ex lajoʼn testigos de Jehová in che ajbʼen te misionero toj tnam ex kubʼ nximane qa mlaytoq che meltzʼaj juntl maj.

CHʼEXPAJ WANQʼIBʼILE TUʼN TYOL DIOS:

Bʼaj chʼixpubʼil lu toj abʼqʼi 1990, ex in jaw labʼine tuʼnju e meltzʼaj juntl maj qe Testigos in che ajbʼen te misionero. Tuʼn jlu kubʼ nximane qa bʼalo in nonin Dios kyiʼj. Toj ambʼil aju xi nchʼexpuʼne waqʼune ex junx in aqʼunane tukʼil jun testigo de Jehová. Tzaj tzyet naj tuʼn tyolin wukʼile tiʼjju nimen tuʼn ex tzaj tuʼjin junjun texto weye aju in yolin tiʼj qa tzʼaqli te Jehová ex qa at tkʼujlabʼil (Deuteronomio 32:4; 1 Juan 4:8). Tbʼanel ela qe tmod Jehová lu toj nwitze, ex wajtoqe tuʼn tel mas nnikʼe tiʼj, tuʼntzunju tzaj nkʼamoʼne jun xnaqʼtzbʼil tiʼj Tyol Dios.

Mintiʼ xi tiʼn ambʼil tuʼn tok nchmon wibʼe kyukʼil testigos de Jehová ex in jaw labʼine tuʼnju in kubʼ kyyekʼin kykʼujlabʼil axix tok ex mintiʼ in nel kyikʼun kyyajil xjal ex kyoklen. Tuʼnju kukx ok nchmon wibʼe kyukʼil, mas el nnikʼe tiʼj qa axix tok t-xnaqʼtzbʼen Jesús qe (Juan 13:35).

Nimtoq toklen tuʼn tkyaj nqʼoʼne Iglesia Católica qa wajtoqe tuʼn wajbʼene te Jehová. Kwest ela jlu te weye tuʼnju tzaj bʼaj nkʼuʼje tiʼjju tzultoq kyqʼamaʼn xjal. Maske xi tiʼn ambʼil tuʼn tbʼant jlu wuʼne, onin Jehová wiʼje tuʼn tten wipumale ex kyaj nkoline Iglesia.

Iltoq tiʼj tuʼn tbʼant juntl chʼixpubʼil wuʼne. El nnikʼe tiʼj toj Biblia qa mintiʼ in tzaj tqʼoʼn Dios ambʼil tuʼn tten nim kyxuʼjil xjal (Génesis 2:18-24; Mateo 19:4-6). Tuʼn jlu, oʼkx jakutoq tzʼok tqʼoʼn Dios toklen tnejel nxuʼjile, tuʼntzunju in kubʼ mojeʼye tukʼil. Xi nqʼamaʼne kye junjuntl nxuʼjile qa ya mlaytoq che anqʼin toj njaʼye, pero kukx xi nqʼoʼne aju at tajbʼen kye. Tej tbʼet ambʼil, ok kabʼe kye te testigos de Jehová.

AʼYEJU TBʼANEL O CHE TZAJ NKʼAMOʼNE:

Maske católica nxuʼjile toj ambʼil jaʼlo, tbʼanel in nela toj twitz tuʼn wajbʼene te Jehová, ex qkabʼile in nel qnikʼe tiʼj qa mas tbʼanel chmilbʼaj qine jaʼlo.

Toj ambʼil ojtxe kubʼ nximane qa jaku che onin aj kawil tuʼn tchʼexpaj kyanqʼibʼil xjal jatumeltoq in chin anqʼine. Atzun jaʼlo in nel nnikʼe tiʼj qa oʼkx Tkawbʼil Dios jaku tzʼel qʼinte tkyaqil nya bʼaʼn in tzaj qiʼj (Mateo 6:9, 10). In xi nqʼoʼne chjonte te Jehová tuʼnju o tzʼonin wiʼje tuʼn tkanet axix tok tzalajbʼil toj wanqʼibʼile.

• AJU ABʼQʼI TEJ TUL ITZʼJ: 1977

• TNAM: BRASIL

• JUNJUNTL TQANIL: OK TE PASTOR TOJ JUN IGLESIA PENTECOSTAL

AJU IKʼ TOJ WANQʼIBʼILE:

In jaw chʼiye atz Itu, jun tal lugar te São Paulo. Ojtzqiʼntoq tnam lu kyuʼn xjal tuʼnju at nim nya bʼaʼn toj.

Ngantoqe tuʼn nbʼiyene, tuʼn nyaẍine ex in chin kʼayintoqe tiʼj drogra. Noqtzun tuʼj, el nnikʼe tiʼj qa jakutoq chin okxe toj cárcel moqa jakutoq chin kyime, tuʼntzunju, kubʼ nchʼexpuʼne wanqʼibʼile. Toj ambʼil aju, in onine tiʼj Iglesia Pentecostal ex in noke te pastor.

Kubʼ nximane qa jakutoq tzʼonin Iglesia wiʼje tuʼn wajbʼene kye xjal, tuʼntzunju, etz jun programa toj radio wuʼne ex tuʼn jlu ok ojtzqiʼn nwitze kyuʼn xjal. Pero chebʼe chebʼe el nnikʼe tiʼj qa mintiʼ in nonin Iglesia kyiʼj xjal tuʼn tel kynikʼ tiʼj Dios. Ya mintiʼ in xiʼye toj Iglesia tuʼnju oʼkxtoq kyaj tuʼn tjaw chmet pwaq.

CHʼEXPAJ WANQʼIBʼILE TUʼN TYOL DIOS:

Tej t-xi tzyet tuʼn xnaqʼtzane tiʼj Tyol Dios kyukʼil testigos de Jehová, el nnikʼe tiʼj qa junxitl qe kywitz txqantl okslabʼil. Tbʼanel ela kabʼe tiʼ toj nwitze. Tnejel, nya oʼkxtoq in kyqʼamaʼn tuʼn tok qkʼujlaʼn Dios, sino kubʼ kyyekʼin tukʼil kybʼinchbʼen. Tkabʼin, mintiʼ in cheʼx toj qʼoj ex mintiʼ in che onin kyiʼj aj kawil (Isaías 2:4). E onin kabʼe tiʼ lu wiʼje tuʼn tok qeʼ nkʼuʼje tiʼj qa otoq kanet axix tok okslabʼil wuʼne, aju bʼe chʼin twitz in tzaj tqʼoʼn ambʼil qe tuʼn qanqʼin te jumajx (Mateo 7:13, 14).

Tuʼn wajbʼene te Dios, iltoq tiʼj tuʼn kybʼant chʼixpubʼil wuʼne. Jun techel, iltoq tiʼj tuʼn tkubʼ win wibʼe ex tuʼn ntene mas ambʼil kyukʼil toj njaye. Kwest ela toj nwitze tuʼn kybʼant chʼixpubʼil wuʼne, pero noq tuʼn tonbʼil Jehová e bʼant wuʼne. Otoqxi txi tzyet tuʼn t-xnaqʼtzan nxuʼjile, pero jaw labʼin kyiʼj chʼixpubʼil e bʼant wuʼne, ex ok tilil tuʼn. Tej tikʼ ambʼil, kubʼ qximane tuʼn qoke te testigo de Jehová, ex ax qʼij o bautisarine.

AʼYEJU TBʼANEL O CHE TZAJ NKʼAMOʼNE:

In qo tzalaje tukʼil nxuʼjile aj qonine kyiʼj oxe qkʼwale tuʼn tten jun tbʼanel kyamiwbʼil tukʼil Jehová. In xi nqʼoʼne chjonte te Jehová tuʼnju onin wiʼje tuʼn tel nnikʼe tiʼj axix tok tkuʼx toj Tyol. In chʼexpaj kyanqʼibʼil xjal tuʼn Tyol Dios, ex atzun jlu o bʼaj wiʼje.

• AJU ABʼQʼI TEJ TUL ITZʼJ: 1957

• TNAM: AUSTRALIA

• JUNJUNTL TQANIL: MINTIʼ IN NOK KʼUJLAʼNE TEJ NJAW CHʼIYE

AJU IKʼ TOJ WANQʼIBʼILE:

Atz in jaw chʼiye toj tnam Newcastle te Nueva Gales del Sur. Wuq qbʼete ex aʼyine tzikbʼaj. Kʼal qʼeʼn ntate ex tgantoq tuʼn tbʼiyen. Ax ikx te ntxuʼye tzaj tqʼamaʼn nya bʼaʼn yol weye ex in ok bʼyoʼne tuʼn. Tkyaqil qʼij tzaj tqʼamaʼn ntxuʼye weye qa nya bʼaʼn xjal qine ex qa chin xeʼle toj infierni. Tuʼn tkyaqil jlu in tzaj xobʼe.

Nim maj in nok kʼixbʼisaʼn tuʼn ntxuʼye ex tuʼn tpaj jlu mintiʼ nxiʼye toj escuela. Tej qʼiʼntoq 11 abʼqʼi wuʼne, in nel qʼiʼne kye ntate kyuʼn aj kawil ex aʼye e xqʼuqin wiʼje. Yajxitl, in nokx qʼoʼne toj jun convento ex in netz oke tej in japune twiʼ 14 abʼqʼi. Tuʼnju nya wajtoqe tuʼn nmeltzʼaje njaye, in kyaj tene anqʼil kyoj kay te Kings Cross, jun lugar te tnam Sydney.

Tej wanqʼine kyoj kay, in nok tene kʼal qʼeʼn, droga, in nkeʼyine kyiʼj xjal mintiʼ kyxbʼalun ex jawni nwitze kyukʼil xinaq. Jun maj, nim in tzaj xobʼe. Atztoq in chin kyaj tene jtal toj tkwart jun xjal aju tajaw jun club nocturno, pero toj jun qonikʼen e pon kabʼe xjal visitaril te. Tzaj tqʼamaʼn xjal weye tuʼn nxiʼye toj juntl kwart, maske ikju, ok nbʼiʼne tkyaqilju e yolin tiʼj. Otoq kubʼ t-ximen tuʼn t-xi tkʼayin qine kye qeju kabʼe xjal e pon, ex kyqʼama tuʼn txi kyewin qine toj jun bark tuʼntzun nxiʼye aqʼunal toj jun bar toj tnam Japón. Tej tok nbʼine jlu nimxix in tzaj xobʼe, tuʼntzunju, in netz tʼikpaje ttzi jun ventan ex in el karreline tuʼn nxiʼye qanil onbʼil.

Kanet jun xjal wuʼne toj bʼe aju in visitarintoq toj tnam, tuʼnju wajtoqe tuʼn ttzaj tqʼoʼn chʼin npwaqe, xi nqʼamaʼne te aju otoq bʼaj wiʼje. Mintiʼ tzaj tqʼoʼn pwaq weye, sino tzaj tqʼamaʼn tuʼn nxiʼye toj tkwart tuʼntzun nbañarine ex tuʼn nwaʼne. Atz in kyaj tene tukʼil ex tej tikʼ jun abʼqʼi o kubʼ mojeʼye.

CHʼEXPAJ WANQʼIBʼILE TUʼN TYOL DIOS:

Akux in chin xnaqʼtzane tiʼj Tyol Dios kyukʼil testigos de Jehová, kubʼ nnaʼne junxichaq tiʼchaq. Nimku maj tzaj qʼamaʼn weye qa tuʼn Dios in tzaj nya bʼaʼn qiʼj, noqtzun tuʼnj, tzaj nim nqʼoje tej tel nnikʼe tiʼj qa tuʼn Satanás in tzaj tkyaqil nya bʼaʼn. Ax ikx, tej tal kʼwalx qine in tzaj xobʼe tej ttzaj xnaqʼtzaʼn weye qa in kubʼ tqʼoʼn Dios qkastiw toj infierni, pero chewix wanmiye tej tel nnikʼe tiʼj qa mintiʼ in bʼant jlu tuʼn Dios.

In jaw labʼine tej tok nqʼoʼne nwitze tiʼj tzeʼn in nok kyqʼoʼn testigos de Jehová toklen Tyol Dios aj tkubʼ kyximen tiʼ tuʼn tbʼant kyuʼn. Maske nya toj tumel aju xi nqʼamaʼne kye moqa aju bʼant wuʼne, kukx kubʼ kyyekʼin Testigo kykʼujlabʼil wiʼje ex ok kyqʼoʼn woklene.

Mas kwest ela toj nwitze tuʼn tten tbʼanel nximbʼetze. Kubʼ nximane qa mintiʼ wajbʼene ex tzaj nim nqʼoje wiʼjxe. Maske otoq tzikʼ nim ambʼil woklene te testigo de Jehová, kukx ten nximbʼetze ik tzeʼn jlu. Kʼujlaʼntoq Dios wuʼne, pero kubʼ nximane qa mlaytoq chin ok kʼujlaʼne tuʼn.

Chʼexpaj tkyaqil tej otoq tzikʼ junlo 15 abʼqʼi tej nbautisarine. Toj jun Ja te Chmabʼil kye Testigos de Jehová, yolin jun ermano tiʼj Santiago 1:23 ex 24 toj tchikʼbʼabʼil. In tzaj kyyekʼin versículo lu qa ik tten Tyol Dios ik tzeʼn jun espej, tuʼnju in nonin qiʼj tuʼn tel qnikʼ tiʼj alkye t-ximbʼetz Jehová at qiʼj. Tuʼntzunju, kubʼ nxjeline qa junxitl nximbʼetze at wiʼje ik tzeʼn te Jehová. Ex kwest ela te weye tuʼn t-xi nnimane jlu, tuʼnju kubʼ nnaʼne qa mintiʼ woklene tuʼn wok kʼujlaʼne tuʼn Jehová.

Tej tikʼ junjun qʼij, jaw wuʼjine jun texto aju onin wiʼje tuʼn tchʼexpaj wanqʼibʼile. Jaw wuʼjine Isaías 1:18 jatumel in tzaj tqʼamaʼn Jehová jlu: «Kytzaje, qo yolin tuʼn tbʼant tiʼj jlu quʼn. Maske kyaqxix keʼyin kyile wen, jaku tzʼok wuʼne te saq ik tzaʼn ttxa cheʼw». Kubʼ nnaʼne qa tzaj tqʼamaʼn Jehová jlu weye: «Tzaja Vicky, qbʼincham kyiʼj nya bʼaʼn. Ojtzqiʼna wuʼne, ojtzqiʼn tanmiya wuʼne, in nel nnikʼe tiʼj qa o kubʼ tbʼinchaʼna il, maske ikju, kʼujlaʼna wuʼne».

Mintiʼ in jtane toj qonikʼen aju, tuʼnju kukx kubʼ nximane qa nya kʼujlaʼn qine tuʼn Dios, pero in nok tene ximel tiʼj chojbʼil bʼant tuʼn Jesús. El nnikʼe tiʼj qa otoq ten nim tpasens Jehová wiʼje ex qa otoq kubʼ tyekʼin tkʼujlabʼil wiʼje toj nimku tten. Tuʼnju kubʼ nnaʼne, ok ik tzeʼn xi nqʼamaʼne jlu te Jehová: «Mlayx chin ok tkʼujlaʼna. Mlayx chjet wile tuʼn chojbʼil o bʼant tuʼn Tkʼwala». Kubʼ nyekʼine qa mintiʼ ok nqʼoʼne toklen chojbʼil. Noqtzun tuʼnj, tej nximane tiʼj tbʼanelxix oyaj lu, kubʼ nnaʼne qa kʼujlaʼn qine tuʼn Jehová.

AʼYEJU TBʼANEL O CHE TZAJ NKʼAMOʼNE:

Toj ambʼil jaʼlo, o kubʼ tnajsaʼn Jehová wile ex in chin tzalaje. Mas tbʼanel taʼ nmejebʼleʼne, ex in chin tzalaje tuʼnju jaku chin onine kyiʼj txqantl tuʼnju o tzikʼ wiʼje. In kubʼ nnaʼne qa mas nqayin atine ttxlaj Jehová junjun qʼij.

• AJU ABʼQʼI TEJ TUL ITZʼJ: 1974

• TNAM: RUSIA

• JUNJUNTL TQANIL: TGANTOQ BʼITZ HEAVY METAL

AJU IKʼ TOJ WANQʼIBʼILE:

In nul itzʼje toj jun ja xjal mebʼa toj tnam Vótkinsk, toj ax lugar jatumel ul itzʼj Piotr Ilič Chaikovski, jun bʼinchal bʼitz ojtzqiʼnxix twitz. Attoq tbʼanel tmod ntate, noqtzun tuʼnj kʼal qʼeʼntoq, tuʼntzunju, in tzajtoq nya bʼaʼn kyxol toj njaye.

Nyatoq list qine toj tja xnaqʼtzbʼil, ex tej tikʼ junjun abʼqʼi kubʼ nximane qa mlaytoq chin oke ik tzeʼn kye txqantl. Tuʼn jlu in tzaj xobʼe, tzaj loʼchj tiʼj nkʼuʼje kyiʼj xjal ex nyatoq ngane tuʼn nxiʼye toj tja xnaqʼtzbʼil. Jun techel, kwest ela te weye tuʼn txi nchikʼbʼaʼne junjun xnaqʼtzbʼil nya nim kyoklen kywitz qe wukʼile toj escuela. Tej atine toj básico ex tej chʼixtoq tkubʼ bʼaj abʼqʼi, kux tzʼibʼin jlu kyoj ncalificacióne: «Mintiʼ in bʼant tyolin ex mintiʼ in bʼant tchikʼbʼaʼn kyiʼj xnaqʼtzbʼil». Tzaj nim nbʼise kyuʼn yol lu ex kubʼ nnaʼne qa mintiʼ wajbʼene. Tuʼntzunju, kubʼ nxjeline tiquʼn in nul itzʼje.

Tej kuʼxun qine xi tzyet tuʼn nkʼane tiʼj qʼeʼn. Tnejel kubʼ nnaʼne bʼaʼn, pero tej t-xi nkʼane nim qʼeʼn kubʼ nnaʼne nya bʼaʼn. Mintiʼtoq ttxolil wanqʼibʼile, mas tzaj nbʼise ex at maj ax in kyaj tene njaye toj nimku qiʼj. Ex kubʼ nximane tuʼn tkubʼ nbʼyon wibʼe.

Tej qʼiʼntoq 20 abʼqʼi wuʼne, kubʼ nximane qa jakutoq tzʼonin bʼitz heavy metal wiʼje tuʼn ntzalaje. Kubʼ nximane qa tzaj qʼoʼn wipumale tuʼn bʼitz lu, tuʼntzunju, ok njunin wibʼe kyukʼil xjal kygan bʼitz rock. Kubʼ nchʼiysane tzmal nwiʼye, ex nqʼoʼne toy moqa jul toj nẍkyine ex ok nxbʼalumin wibʼe ik tzeʼn qe xjal in che bʼitzen. Chebʼe chebʼe in nok tene bʼiyel kyiʼj txqantl ex ya mintiʼ ok nqʼoʼne kyoklen tiʼchaq, tuʼn jlu tzaj nim nya bʼaʼn kyukʼil toj njaye.

Otoq chʼexpaj nmode tuʼn bʼitz lu, kubʼ nximane qa kʼoniltoq wiʼje tuʼn ntzalaje, pero mintiʼ bʼaj jlu. Tej tok nbʼine junjun tqanil nya bʼaʼn kyiʼj qe xjal in che bʼitzen, tzaj nbʼise tuʼn jlu.

Toj ambʼil aju wajtoqe tuʼn tkubʼ nbʼyon wibʼe. Noqtzun tuʼnj, mintiʼ bʼant jlu wuʼne tuʼnju tzaj nnaʼne qa nimxix kʼujlaʼn qine tuʼn ntxuʼye ex qa otoq bʼant nimku tiʼchaq tuʼn wiʼje. Kwest ok ambʼil lu te weye, tuʼnju ya nya wajtoqe tuʼn wanqʼine, pero ax ikx nyatoq waje tuʼn tkubʼ nbʼyon wibʼe.

Tuʼn miʼn ximane tiʼj jlu, in nok tene uʼjil kyiʼj ojtxe uʼj in che yolin tiʼj tnam Rusia. Jun kyxol uʼj lu in nyolintoq tiʼj jun nejenel kye okslabʼil. Tuʼn jlu, kubʼ nximane tuʼn wajbʼene te Dios ex kye txqantl. Toj ambʼil aju, in nnaʼne Dios tnejel maj ex xi nqanine onbʼil te Dios tuʼn tonin wiʼje tuʼn tten ttxolil wanqʼibʼile. Akux in chin nnaʼne Dios, chewix nkʼuʼje. Pero in jaw labʼine tiʼjju bʼaj tej tikʼ kabʼe or, pon jun testigo de Jehová pakbʼal ttzi njaye ex tzaj tqanin weye qa waje tuʼn nxnaqʼtzane tiʼj Tyol Dios. Kubʼ nximane qa atzun tzaqʼwebʼil tiʼj nnaʼj Diose. Iktzun tten tzaj tzyet jun akʼaj wanqʼibʼile.

CHʼEXPAJ WANQʼIBʼILE TUʼN TYOL DIOS:

Maske kwest ela toj nwitze, ex nxoʼne toj tzʼis kykyaqil qe tiʼchaq at toklen tukʼil heavy metal. Maske ikju, kukx tzaj nnaʼne qe bʼitz toj nimku ambʼil. Ajtoq wikʼe toj jun lugar jatumel in che chinbʼan xjal kyiʼj qe bʼitz lu, in che tzajtoq nnaʼne junjun tiʼchaq nya toj tumel. Nyatoq waje tuʼn kynaj qe tbʼanel tiʼchaq otoq tzʼel nnikʼe tiʼj, tuʼntzunju, ya mintiʼ in nikʼe kyoj qe lugar aju. Ax ikx, ok tilil wuʼne tuʼn nnaʼne Dios tuʼn miʼn tzaj nnaʼne qe tiʼchaq bʼaj wiʼje toj ambʼil ojtxe. Tej tbʼant jlu wuʼne, kubʼ nnaʼne bʼaʼn (Filipenses 4:7).

Tej nxnaqʼtzane tiʼj Tyol Dios, el nnikʼe tiʼj qa nim toklen tuʼn kyyolin okslal tiʼj qʼuqbʼil kykʼuʼj kyukʼil txqantl (Mateo 28:19, 20). Kubʼ nximane qa mlayxtoq bʼant jlu wuʼne, pero kubʼ nnaʼne tzalajbʼil tiʼjju otoq tzʼel nnikʼe tiʼj. Ojtzqintoq wuʼne qa nimtoq toklen tuʼn tel kynikʼ txqantl xjal tiʼj axix tok. Tuʼntzunju, ok tilil wuʼne tuʼn nyoline kyukʼil txqantl tiʼjju otoq tzʼel nnikʼe tiʼj maske in tzaj xobʼe. In jaw labʼine tuʼn jlu, tuʼnju onin wiʼje tuʼn tkubʼ nnaʼne mas tzalajbʼil ex tuʼn tok qeʼ nkʼuʼje kyiʼj xnaqʼtzbʼil tkuʼx toj Tyol Dios.

AʼYEJU TBʼANEL O CHE TZAJ NKʼAMOʼNE:

Toj ambʼil jaʼlo, ya o chin kubʼ mojeʼye ex o chin onine kyiʼj nimku xjal tuʼn tel kynikʼ tiʼj axix tok, ik tzeʼn tiʼj ntxuʼye ex tiʼj wanabʼe. O kubʼ nnaʼne qa at ttxolil wanqʼibʼile tuʼnju in chin ajbʼene te Dios ex tuʼnju in chin onine kyiʼj xjal tuʼn tel kynikʼ tiʼj axix tok.