Chʼexpaj kyanqʼibʼil tuʼn Tyol Dios

¿TIʼ ONIN tuʼn tchʼexpaj tanqʼibʼil jun xjal ok te eleqʼ ex tgantoq tuʼn t-apostarin? Qqʼonx ambʼil te tuʼn ttzaj tqʼamaʼn qe tiʼ onin tiʼj.

«Ngantoqe qe carrera kyiʼj chej» (RICHARD STEWART)

AJU ABʼQʼI TEJ TUL ITZʼJ: 1965

TNAM: JAMAICA

JUNJUNTL TQANIL: TGANTOQ TUʼN TELQʼAN EX TUʼN T-APOSTARIN

AJU IKʼ TOJ WANQʼIBʼILE: In jaw chʼiye atz Kingston aju ttxuylal tnam Jamaica. Nim xjal in che anqʼin toj tnam lu ex prow qeʼ moqa mebʼa xjal qeʼ. Toj tnam lu mintiʼx aqʼuntl ex at nim bʼiybʼil. Nimtoq in che tzaj xobʼ xjal tuʼnju ateʼtoq kʼloj xjal in che bʼiyen. Chʼixme tkyaqil qʼij in che dispararin qe xjal lu tiʼj arma.

Nimxix aqʼunan ntxuʼye tuʼn qkʼachite tuʼn kyukʼil witzʼine, ex ok tilil tuʼn tuʼn tetz jun tbʼanel qxnaqʼtzbʼile. Noqtzun tuʼnj, mas ngantoqe tuʼn nxiʼye keʼyil kye carrera kyiʼj chej twitzju tuʼn nxiʼye toj escuela. Nim maj mintiʼ in xiʼye toj escuela tuʼntzun nxiʼye keʼyil kye chej, axpe ikx in jaxe junjun maj kyibʼaj.

Tej tikʼ chʼin ambʼil, otoq chin naqʼete tuʼn n-apostarine ex tuʼn nkubʼ kuẍeye kyukʼil nim xuʼj. Ax ikx in sichʼine tiʼj marihuana. Tuʼn kybʼant qe tiʼchaq lu wuʼne, in xiʼye elqʼal ex e ten nim nqʼaqʼe moqa n-armaye. Noqtzun tuʼnj, mintiʼ jun xjal kyim wuʼne kyoj ambʼil tej in chin elqʼane.

Pero in ntzyete ex in nokx qʼoʼne toj cárcel. Ex tej wetz tzaqpiʼne, kubʼ nbʼinchaʼne juntl maj qe tiʼchaq otoq chin naqʼete tiʼj. Axpe ikx mas in nok tene bʼinchal nya bʼaʼn. Jakutoq kubʼ kyximen xjal qa tbʼanel nmode, pero puro nya bʼaʼn xjal qine, jun rat in tzajtoq nqʼoje, mintiʼ in tzaj qʼaqʼin nkʼuʼje tiʼj juntl ex oʼkxtoq in chin ximane wiʼjxe.

CHʼEXPAJ WANQʼIBʼILE TUʼN TYOL DIOS: Kyoj qe ambʼil nya bʼaʼn te wanqʼibʼile lu, ok ten ntxuʼye xnaqʼtzal tiʼj Tyol Dios ex ok te testigo de Jehová. Tej kybʼant chʼixpubʼil tuʼn, wajtoqe tuʼn tok nbʼiʼne tiʼ onin tiʼj tuʼn tchʼexpaj tmod. Tuʼntzunju, xi nqʼoʼne ambʼil kye testigos de Jehová tuʼn kyyolin wukʼile tiʼj Tyol Dios.

Jun rat naj el nnikʼe tiʼj qa junxitl kyxnaqʼtzbʼil testigos de Jehová twitzju in tzaj kyxnaqʼtzan txqantl okslabʼil ex aju in tzaj kyqʼamaʼn atz in jatz kyiʼn toj Biblia. Ax ikx oʼkx kye in che pakbʼan ttziyele kyja xjal ik tzeʼn bʼant kyuʼn tnejel okslal (Mateo 28:19; Hechos 20:20). Ok qeʼ nkʼuʼje tiʼj qa axix tok okslal qe tuʼnju in kubʼ kyyekʼin kykʼujlabʼil kyxolx (Juan 13:35).

Tej nxnaqʼtzane tiʼj Tyol Dios, el nnikʼe tiʼj qa iltoq tiʼj tuʼn kybʼant chʼixpubʼil wuʼne toj wanqʼibʼile. Ikʼun yaẍbʼil tuʼn Jehová, tuʼntzunju, qa wajtoqe tuʼn ttzalaj wiʼje iltoq tiʼj tuʼn tkyaj ntzaqpiʼne tkyaqilju in tzʼilsante nxmilale (2 Corintios 7:1; Hebreos 13:4). Kuʼpin toj wanmiye tej tel nnikʼe tiʼj qa jaku tzalaj Jehová wuʼne moqa jaku tzaj tbʼis (Proverbios 27:11). Tuʼntzunju, kubʼ nximane tuʼn ya miʼn nsichʼine tiʼj marihuana, tuʼn miʼn kyajbʼentl arma wuʼne, ex ok tilil wuʼne tuʼn kyten tbʼanel nmode. Noqtzun tuʼnj, kwest ela toj nwitze tuʼn ya miʼn ntene kyukʼil xuʼj ex tuʼn ya miʼn n-apostarine.

Tnejel, nyatoq waje tuʼn tok kybʼiʼn wamiwe qa in chin xnaqʼtzane tiʼj Tyol Dios kyukʼil testigos de Jehová. Pero chʼexpaj nximbʼetze tej kyjaw wuʼjine tyol Jesús ateʼkux toj Mateo 10:33, aju in tqʼamaʼn: «Qa at jun xjal in kubʼ tewan kywitz xjal qa mintiʼ ojtzqiʼn qine tuʼn, ax ikx weye kbʼel wewane twitz Nmane aju at tuj kyaʼj qa mintiʼ ojtzqiʼn xjal lu wuʼne». Tuʼntzunju, jun rat naj xi nqʼamaʼne kye wukʼile qa in chin xnaqʼtzane. Tej t-xi nqʼamaʼne jlu kye, e jaw labʼin tuʼnju mintiʼ xi kynimen qa wajtoqe tuʼn woke te okslal. Maske ikju, xi nqʼamaʼne kye qa wajtoqe tuʼn tchʼexpaj wanqʼibʼile.

QE KʼIWLABʼIL O CHE TZAJ NKʼAMOʼNE: Nimxix jaw tzalaj ntxuʼye tej tok tqʼoʼn twitz tiʼj qa in kubʼ nbʼinchaʼne aju in tzaj tqʼamaʼn Tyol Dios. Toj ambʼil jaʼlo ya mintiʼ in bʼisen tiʼjju jaku kubʼ nbʼinchaʼne. Qkabʼile qgane tuʼn qyoline tiʼj qkʼujlabʼil at tiʼj Jehová. Aj wok tene ximel junjun maj tiʼjju o tzikʼ wiʼje, in chin jaw labʼine kyiʼj junjun chʼixpubʼil o che bʼant wuʼne noq tuʼn tonbʼil Dios. Ya mintiʼ in chin ximane tiʼj yaẍbʼil ex tiʼjju tuʼn kyten nim tiʼchaq weye ik tzeʼn ojtxe.

Noqwit mintiʼ xi nbʼiʼne aju in tzaj tqʼamaʼn Tyol Dios, owtlo chin okxe toj cárcel moqa owtlo chin kyime. Noqtzun tuʼnj, toj ambʼil jaʼlo, in chin tzalaje kyukʼil toj njaye noq tuʼnju el nnikʼe tiʼj toj Tyol Dios. In nonin nxuʼjile wiʼje, in chinx nimane tuʼn nmeʼjele, ex junx in qo ajbʼene te Jehová tukʼil tzalajbʼil. Nimxix in xi nqʼoʼne chjonte tuʼnju tzaj qʼoʼn xnaqʼtzbʼil weye tiʼj Tyol Dios. Tuʼntzunju, in nok tilil wuʼne tuʼn wonine kyiʼj txqantl tuʼn tok kyojtzqiʼn Tyol Dios. Ax ikx in xi nqʼoʼne nimxix chjonte te Jehová tuʼnju ma chin tzaj tiʼne toj ttnam atz jatumel at nim kʼujlabʼil, pero mas in xi nqʼoʼne chjonte te tuʼnju ma tzaj qʼaqʼin tkʼuʼj wiʼje ex ma tzʼonin wiʼje tuʼn wok laqʼeʼye ttxlaj.

[Yol]

«Kuʼpin toj wanmiye tej tel nnikʼe tiʼj qa jaku tzalaj Jehová wuʼne moqa jaku tzaj tbʼis».

[Yol]

Tukʼil nxuʼjile ex nmeʼjele.

[Yol]

Tej kybʼant chʼixpubʼil tuʼn ntxuʼye, wajtoqe tuʼn tok nbʼiʼne tiʼ onin tiʼj tuʼn tchʼexpaj tmod.