Chʼexpaj kyanqʼibʼil tuʼn Tyol Dios

¿TZEʼN kanet ttxolil tanqʼibʼil jun tal txin maske ok weʼ twitz nim nya bʼaʼn? ¿Tiʼ onin tiʼj jun xjal ten kyxol aj kawil ex nya bʼaʼn tmod tuʼn tok te testigo de Jehová? Qqʼonx ambʼil kye tuʼn ttzaj kyqʼamaʼn.

«Wajtoqe tuʼn wok kʼujlaʼne» (INNA LEZHNINA)

AJU ABʼQʼI TEJ TUL ITZʼJ: 1971

TNAM: RUSIA

JUNJUNTL TQANIL: OK WEʼ TWITZ NIM NYA BʼAʼN TEJ TJAW CHʼIY

AJU IKʼ TOJ WANQʼIBʼILE: Tẍkyin qe nmane, ax ik weye tẍkyin qine tej wul itzʼje. Kubʼ nnaʼne nim tzalajbʼil kyoj qeju tnejel qaq abʼqʼi wanqʼibʼile, noqtzun tuʼnj, el kydivorciarin kyibʼ nmane tukʼil ntxuʼye. Maske tal chʼin qine, el nnikʼe tiʼj jlu ex tzaj nim nbʼise tuʼn. Tej tbʼaj jlu, atz kyaj ten nmane tukʼil ntzike toj tnam Troick, atzun weye tukʼil ntxuʼye o xiʼye anqʼil atz Cheliabinsk. Tej tikʼ ambʼil, kubʼ mojeʼ ntxuʼye juntl maj. Kʼal qʼeʼntoq tchmil ntxuʼye ex in qo bʼaj bʼyoʼne tuʼn.

Toj abʼqʼi 1993, jaw jiqʼwi ntzike ex kyim. Tzaj nim qbʼise tuʼn jlu. Tej tbʼet ambʼil, ax ikx te ntxuʼye ok ten kʼal qʼeʼn ex ok ten kʼixbʼisal weye. Wajtoqe tuʼn tten jun tbʼanel wanqʼibʼile ex mas tuʼn wok kʼujlaʼne. Tuʼntzunju, in xiʼye kyoj nim iglesia, pero mintiʼ tzaj qʼuqbʼaʼn nkʼuʼje kyuʼn.

CHʼEXPAJ WANQʼIBʼILE TUʼN TYOL DIOS: Tej qʼiʼntoq 13 abʼqʼi wuʼne, junxtoq in qoʼxe toj tja xnaqʼtzbʼil tukʼil jun txin testigo de Jehová, ex tzaj tqʼamaʼn junjun txʼolbʼabʼil weye tiʼj Tyol Dios. Ngantoqe tuʼn tel nnikʼe kyiʼj xjal in yolin Tyol Dios tiʼj, ik tzeʼn Noé ex Job, tuʼnju kukx e ajbʼen te Dios maske e ok weʼ twitz nya bʼaʼn. Tej tikʼ chʼin ambʼil, tzyet nxnaqʼtzane tiʼj Biblia kyukʼil testigos de Jehová ex xi tzyet tuʼn nbʼete kyoj kychmabʼil.

Onin Tyol Dios wiʼje tuʼn tel nnikʼe kyiʼj axix tok xnaqʼtzbʼil. In jaw tzalaje tej tel nnikʼe tiʼj qa at tbʼi Dios (Salmo 83:18, Traducción del Nuevo Mundo). In jaw labʼine tej tel nnikʼe tiʼj qa tzʼaqli aju in tzaj tqʼamaʼn Tyol Dios tiʼjju tuʼn tbʼaj kyoj «mankbʼil tqʼijlalil» (2 Timoteo 3:1-5). Ax ikx, nim in jaw tzalaje tej tel nnikʼe tiʼj qa che kjawil anqʼin kyimni juntl maj. Noqpe ximana tiʼj, ¡kʼokel nkeʼyine ntzike juntl maj! (Juan 5:28, 29).

Noqtzun tuʼnj, nya kykyaqil el kynikʼ tiʼj tzalajbʼil kubʼ nnaʼne. Ikʼuntoq kywitz testigos de Jehová tuʼn ntxuʼye ex tuʼn tchmil, ex tzaj kyqʼamaʼn weye tuʼn tkyaj nkoline nxnaqʼtzbʼile tiʼj Tyol Dios. Pero ngane aju el nnikʼe tiʼj, tuʼntzunju kubʼ nximane tuʼn kukx nxnaqʼtzane.

Kwest ela te weye tuʼnju in el ikʼune kyuʼn toj njaye. Yajxitl, in nok weʼye twitz juntl nya bʼaʼn, kyim witzʼine aju in xiʼtoq wukʼile kyoj kychmabʼil testigos de Jehová. Tej tbʼaj jlu, kukx e ten testigo de Jehová wukʼile ex kubʼ kyyekʼin kykʼujlabʼil wiʼje. Atzun jlu otoq chin jyone tiʼj toj wanqʼibʼile. Tuʼn jlu, ok qeʼ nkʼuʼje tiʼj qa aʼye testigos de Jehová okslal axix tok, ex in bautisarine toj 1996.

AʼYEJU TBʼANEL O CHE TZAJ NKʼAMOʼNE: Ma tzikʼ qaq abʼqʼi nkubʼlen mojeʼye tukʼil nchmile Dmitry. Qkabʼile in qo ajbʼene toj ninja qʼil twitz aqʼuntl kye testigos de Jehová, atz San Petersburgo. Tej tbʼet ambʼil, chʼexpaj kyximbʼetz ntate tiʼjju nimen wuʼne.

Nim in xi nqʼoʼne chjonte tuʼnju o tzʼok wojtzqiʼne Jehová. At ttxolil wanqʼibʼile tuʼnju in chin ajbʼene te.

«In chin ximantoqe kyiʼj nim xjel» (RAUDEL RODRÍGUEZ RODRÍGUEZ)

AJU ABʼQʼI TEJ TUL ITZʼJ: 1959

TNAM: CUBA

JUNJUNTL TQANIL: MINTIʼ OK TQʼOʼN KYOKLEN AJ KAWIL

AJU IKʼ TOJ WANQʼIBʼILE: Atz in nul itzʼje La Habana toj tnam Cuba. Ex in jaw chʼiye toj jun lugar jatumel prow qe xjal ex naqʼli qe tuʼn kybʼiyen kyoj bʼe. Tej tzmatoq qʼa qine, ngantoqe bʼiybʼel yudo ex junjuntl saqchbʼil at toklen tukʼil bʼiybʼel.

Tzaj kyqʼamaʼn ntate tuʼn nxiʼye toj universidad tuʼnju otoq chin oke te jun tbʼanel alumno. Toj ambʼil aju, kubʼ nximane qa iltoq tiʼj tuʼn tchʼexpaj alkye tten in che kawin xjal toj ntname, tuʼntzunju, ya mintiʼ ok nqʼoʼne kyoklen. Tuʼn jlu, ok tzoqpaj qoʼye tukʼil jun wukʼile tiʼj jun polisiy, el qelqʼaʼne tpistola ex bʼaj qkʼixbʼisaʼne twiʼ. Tuʼn tkyaqil jlu, o okx qʼoʼne toj cárcel ex tzaj qʼamaʼn qeye qa tuʼn qkubʼ bʼyoʼne tukʼil arma. Tzmatoq qʼiʼn 20 abʼqʼi wuʼne ex ya chʼixtoq nkubʼ bʼyoʼne.

Tej ntene njunalxe toj pres, bʼaj nxnaqʼtzan wibʼe tuʼntzun miʼn nkyime aj kyok ten polisiy dispararil wiʼje. Ax ikx, toj ambʼil aju in ximane kyiʼj nim xjel ik tzeʼn jlu, ¿tiquʼn mintiʼ in xi bʼinchaʼn tiʼj nya bʼaʼn? Ex, ¿oʼkxpe qanqʼibʼil jlu at?

CHʼEXPAJ WANQʼIBʼILE TUʼN TYOL DIOS: Tej tikʼ ambʼil, tzaj qʼamaʼn qeye qa ya mlay qo kubʼ bʼyoʼne, sino qo okelx qʼoʼne 30 abʼqʼi toj pres. Toj ambʼil aju, e ok wojtzqiʼne junjun testigos de Jehová otoq che okx qʼoʼn toj pres noq tuʼnju nimen kyuʼn. In jaw labʼine kyiʼj tuʼnju kubʼ kyyekʼin tbʼanel kymod ex qʼuqbʼil kykʼuʼj. Maske otoq che okx qʼoʼn toj cárcel ex mintiʼ kyil, mintiʼ tzaj kyqʼoj tuʼn jlu.

Tzaj kychikʼbʼaʼn testigos de Jehová weye alkye t-ximbʼetz Dios at kye xjal toj ambʼil tzul. Ax ikx, tzaj kyyekʼin weye tukʼil Biblia qa kʼokel Txʼotxʼ te jun tbʼanel najbʼil tuʼn Dios, jatumel che anqʼil tbʼanel xjal te jumajx, ya miʼn ten nya bʼaʼn ex kxel bʼinchaʼn tkyaqil toj tumel (Salmo 37:29).

Tbʼanel ela toj nwitze aju tzaj kyxnaqʼtzaʼn weye, noqtzun tuʼnju, kwesttoq tuʼn tten ax nmode ik tzeʼn kye testigos de Jehová. Kubʼ nximane qa kwesttoq tuʼn tten nximbʼetze toj tumel kyiʼj aj kawil ex qa jakutoq tzʼaj nqʼoʼne t-xel nya bʼaʼn. Tuʼntzunju, kubʼ nximane tuʼn tjaw wuʼjine Tyol Dios njunalxe. Tej tbʼaj wuʼjine, el nnikʼe tiʼj qa oʼkx qe testigos de Jehová in xi kybʼinchaʼn aju bʼant kyuʼn tnejel okslal.

Onin xnaqʼtzbʼil tiʼj Tyol Dios wiʼje tuʼnju el nnikʼe tiʼj qa iltoq tiʼj tuʼn tbʼant nimku chʼixpubʼil wuʼne, ik tzeʼn tuʼn ya miʼn kyajbʼen nya bʼaʼn yol wuʼne, tuʼn miʼn nsichʼine tiʼj tabaco ex tuʼn tel npan wibʼe kyiʼj tiʼchaq at toklen kyukʼil aj kawil. Kwest o che ela chʼixpubʼil lu te weye, pero chebʼe chebʼe o che bʼant wuʼne noq tuʼn tonbʼil Jehová.

Kwest o tzʼela te weye tuʼn tkubʼ nyekʼine tbʼanel nmode. Tuʼntzunju, kukx in xi nqanine onbʼil te Dios tuʼn tonin wiʼje tuʼn ncrontrolarin wibʼe. Nim o che onin taqikʼ Tyol Dios wiʼje ik tzeʼn Proverbios 16:32, aju in tzaj tqʼamaʼn jlu: «Mas bʼaʼn qa mya jurat in qo jaw qʼojl twitzju tuʼn qok kyuw qkʼuʼj; mas bʼaʼn qa ma qjakʼunte qibʼ quʼnx qibʼ twitzju tuʼn tkubʼ tiʼj jun tnam quʼn».

Toj 1991, in bautisarine toj cárcel toj jun tonel tuʼntzun woke te testigo de Jehová . Tej tikʼ jun abʼqʼi, etz tzaqpiʼn junjun qeye toj pres, ex o xi samaʼne toj tnam España tuʼnju ateʼtoq junjun toj qjaye atz. Tej npone España, in xiʼye kyoj kychmabʼil testigos de Jehová ex nim e tzalaj tej npone ex kubʼ kyyekʼin tbʼanel kymod wukʼile. Nya oʼkxju, ax ikx e onin wiʼje tuʼn tbʼaj nchʼexpuʼne wanqʼibʼile.

AʼYEJU TBʼANEL O CHE TZAJ NKʼAMOʼNE: Toj ambʼil jaʼlo, in chin tzalaje tuʼnju in qo ajbʼene te Dios junx tukʼil nxuʼjile ex qe nmeʼjele. Ax ikx, at jun tbʼanel woklene tuʼnju in nel npaʼne ambʼil tuʼn t-xi nxnaqʼtzaʼne axix tok tiʼj Tyol Dios kye xjal. Aj nximane tiʼjju bʼaj wiʼje ojtxe, in tzaj nnaʼne qa chʼixme in kyime tej kuʼxun qine, pero ax ikx in xi nqʼoʼne chjonte tiʼjju kʼiwlabʼil o tzaj nkʼamoʼne atxix toj ambʼil aju. Nya oʼkx at wanqʼibʼile, sino ax ikx at jun qʼuqbʼil nkʼuʼje. Waje tuʼn tul Paraíso o tzaj ttziyen Dios, jatumel kxel bʼinchaʼn tiʼj nya bʼaʼn ex ya miʼn qo kyim (Apocalipsis 21:3, 4).

[Yol]

«In jaw tzalaje tej tel nnikʼe tiʼj qa at tbʼi Dios».

[Foto]

Qgane tukʼil nchmile tuʼn t-xi qxnaqʼtzaʼne Tyol Dios kye xjal t-ẍkyin kywiʼ.