Kanet jun tiʼ mas tbʼanel kyuʼn
ATEʼ nim testigos de Jehová mintiʼ in kubʼ kyikʼsaʼn Navidad. ¿In tzajpe kybʼis tuʼnju mintiʼ in bʼant jlu kyuʼn? ¿In kubʼpe kyximen kykʼwal qa in xi kynajsaʼn jun tiʼ? Qbʼinx tiʼ in tzaj kyqʼamaʼn junjun testigo de Jehová te junxichaq tnam.
Eve
Aj ttzaj qnaʼn Jesús. «Tej naʼmxtoq woke te testigo de Jehová nya tkyaqil maj in chinxe toj iglesia, oʼkx ajtoq tkubʼ ikʼset Navidad moqa Xjan Qʼij. Pero mintiʼtoq in chin ximane tiʼj Jesús. Atzun jaʼlo mintiʼ in kubʼ wikʼsaʼne Navidad, pero in chinxe toj chmabʼil kabʼe maj toj seman ex in xi nyekʼine kye xjal tiʼ in tzaj t-xnaqʼtzaʼn Tyol Dios tiʼj Jesús» (EVE, AUSTRALIA).
Reuben
Tuʼn t-xi qqʼoʼn oyaj. «In kubʼ nnaʼne nim tzalajbʼil aj ttzaj qʼoʼn jun oyaj weye. Ax ikx, ngane tuʼn tkubʼ nbʼinchaʼne qe tarjeta moqa junjun dibujo tuʼntzun t-xi nqʼoʼne kye txqantl. Iktzun tten, jaku che tzalaj ex ax ikx weye» (REUBEN, IRLANDA DEL NORTE).
Emily
Tuʼn qonin kyiʼj qeju kyaj onbʼil. «In qo tzalaje tuʼn tkubʼ qbʼinchaʼne wabʼj kye qeju xjal yabʼ ateʼ. At maj, in xi qine jun postre kye, jun bʼyuj bʼech moqa jun oyaj tuʼntzun kytzalaj. Ex jaku bʼant jlu quʼne toj alkyexku ambʼil te abʼqʼi» (EMILY, AUSTRALIA).
Wendy
Tuʼn tok qchmon qibʼ kyukʼil toj qja. «Qa ma tzʼok qchmon qibʼ kyukʼil toj qja toj jun qʼij jatumel mintiʼ in kubʼ ikʼset jun ninqʼij, in tzaj tqʼoʼn jlu ambʼil tuʼn tok kyojtzqiʼn kʼwal qe kytío, qe kychman ex qe kyprimo. Ex tuʼnju in qo pone visitaril qe toj qjaye toj alkyexku qʼij, in nel kynikʼ tiʼj qa kʼujlaʼn qe quʼne» (WENDY, ISLAS CAIMÁN).
Sandra
Tuʼn qten toj mujbʼabʼil. «Mintiʼtoq ambʼil wiʼje tuʼn nximane tiʼj qa atoʼye toj mujbʼabʼil tuʼnju attoq nim tiʼchaq tuʼn tbʼant wuʼne toj Navidad. O tzʼel nnikʼe tiʼj tiʼ t-ximbʼetz Dios at kye xjal ex o kanet axix tok mujbʼabʼil wuʼne. Ex ojtzqiʼn wuʼne qa toj ambʼil tzul, che anqʼil qe wale toj jun tbʼanel najbʼil» (SANDRA, ESPAÑA).