Atxix tej kʼwal qine ngane tuʼn tok nkeʼyine qe tzeʼ ex qe witz. Chʼixme tkyaqil maj in qoʼxtoqe kyukʼil toj njaye pasialil ttziʼ aʼ ex tjaqʼ tzeʼ jatumel najli qoʼye. In qo anqʼine toj tnam Jyväskylä, aju at toj tmij tnam Finlandia. Ax ikx ngane qe txkup. Tej kʼwal qine, wajtoqe tuʼn tjaw nchleʼne qe wiẍ ex qe txʼyan in che kanettoq wuʼne. Tej in jaw chʼiye, tzaj nbʼise tuʼnju ok nkeʼyine in noktoq bʼinchaʼn nya bʼaʼn kyiʼj txkup. Tuʼntzunju, okx nqʼon wibʼe tukʼil jun kʼloj xjal in kolin kyiʼj txkup. Junxtoq qximbʼetze at.

Ok tilil quʼne tuʼn t-xi qqʼoʼne tqanil kye xjal ex tuʼn qmanifestarine kyiʼj qeju in che kʼayin tiʼj ttzʼumil txkup ex kyiʼj qeju in che ajbʼen txkup kyuʼn toj laboratorio. Ex yajxitl, kubʼ qximane tuʼn tten jun kʼloj xjal tuʼn kyxqʼuqin kyiʼj txkup. Chʼixme tkyaqil maj, in tzajtoq kyqʼoj aj kawil qiʼje tuʼnju in bʼanttoq quʼne. Tuʼntzunju, nimku maj in xi qʼiʼne kywitz jwes ex in nokx qʼoʼne toj cárcel.

Ax ikx, in tzajtoq bʼaj nkʼuʼje kyuʼn junjuntl nya bʼaʼn in bʼaj kyxol xjal. Tuʼntzunju, okx nqʼon wibʼe kyoj junjun kʼloj xjal ik tzeʼn Amnistía Internacional ex Greenpeace, ex ok tilil wuʼne tuʼn wonine kyiʼj. Nya oʼkxju, ax ikx ok tilil wuʼne tuʼn wonine kyiʼj mebʼa xjal ex kyiʼj qeju mintiʼ kywa.

Noqtzun tuʼnj, tej tikʼ ambʼil el nnikʼe tiʼj qa mlaytoq bʼant tuʼn tkubʼ nchʼexpuʼne jun tiʼ. In che kyajtoq junjun nya bʼaʼn toj ttxolil quʼne, maske ikju, kukx attoq nya bʼaʼn. Attoq nim nya bʼaʼn twitz Txʼotxʼ, pero ni jun xjal in ximentoq tiʼj tuʼn tkyaj toj ttxolil. Tzaj nbʼise tuʼn jlu, pero ni jun tiʼ jakutoq bʼant wuʼne.

In tzajtoq bʼaj nkʼuʼje tuʼnju mintiʼ jun tiʼ jakutoq bʼant wuʼne, tuʼntzunju, ul Dios ex Tyol tiʼj nkʼuʼje. Otoq chin xnaqʼtzane kyukʼil testigos de Jehová ex ngantoqe tbʼanel kymod in kubʼ kyyekʼin wiʼje. Noqtzun tuʼnj, toj ambʼil aju naʼmxtoq tbʼant ntene tuʼn tchʼexpaj wanqʼibʼile.

Xi njyoʼne Tyol Dios attoq wukʼile ex xi tzyet tuʼn wuʼjine tiʼj. Tej tbʼant jlu wuʼne, chewix wanmiye tuʼn. Jaw wuʼjine junjun taqikʼ Tyol Dios in yolin tiʼj tuʼn qxqʼuqin kyiʼj txkup. Jun techel, in tzaj tqʼamaʼn Proverbios 12:10 jlu: «Aju xjal tzʼaqlxix in che ok tkwentin qe talun». Ax ikx, el nnikʼe tiʼj qa mintiʼ tpaj Dios tiʼj tkyaqil nya bʼaʼn in tzaj kyiʼj xjal. Sino in tzaj nya bʼaʼn kyiʼj tuʼnju mintiʼ in che ok lepeʼ kyiʼj tkawbʼil Dios. Kubʼ nnaʼne nim tzalajbʼil tej tel nnikʼe tiʼj qa kʼujlaʼn qoʼ tuʼn Dios ex qa at nim tpasens qiʼj (Salmo 103:​8-14).

Toj ambʼil aju, kanet jun cupón wuʼne aju tok tiʼj libro ¿Tiʼ in tzaj t-xnaqʼtzaʼnxix Tyol Dios? Kubʼ nnojsaʼne ex xi nsamaʼne toj correo. Tej tikʼ chʼin ambʼil, e pon kabʼe testigos de Jehová visitaril weʼye ex tzaj kyqanin weye qa wajtoqe tuʼn nxnaqʼtzane tiʼj Tyol Dios. Jurat naj xi nqʼamaʼne qa waje. Ax ikx in xiʼye kyoj chmabʼil. Chebʼe chebʼe ok nkʼujlaʼne aju in neltoq nnikʼe tiʼj toj Tyol Dios.

Bʼant nim chʼixpubʼil toj wanqʼibʼile noq tuʼn tonbʼil Tyol Dios. Kyaj ntzaqpiʼne tuʼn nsichʼine ex tuʼn nkʼane qʼeʼn. Bʼaj nbʼinchane wibʼe ex ya mintiʼ in yoline kyiʼj nya bʼaʼn yol. Axpe ikx ok nqʼoʼne kyoklen aj kawil (Romanos 13:1). Ax ikx, ok tilil wuʼne tuʼn njakʼunte wibʼe tuʼnju mintiʼtoq in bʼant jlu wuʼne ojtxe.

Pero aju mas kwest ela te weye, aju tuʼn tten nximbʼetze toj tumel kyiʼj qeju kʼloj xjal jatumel okx nqʼon wibʼe. Xi tiʼn ambʼil tuʼn tchʼexpaj nximbʼetze. Te tnejel, kubʼ nnaʼne qa otoq chin oke ik tzeʼn jun aj qʼoj kyiʼj. Noqtzun tuʼnj, el nnikʼe tiʼj qa oʼkx Tkawbʼil Dios jaku tzʼel qʼinte nya bʼaʼn in qo ok weʼ twitz. Tuʼntzunju, ok tilil wuʼne tuʼn wonine tiʼj ex tuʼn t-xi nyekʼine kye txqantl xjal (Mateo 6:33).

Tej nkoline kyiʼj xjal ex kyiʼj txkup, jurat el nnikʼe tiʼj qa bʼaʼn tmod jun xjal moqa nya. Ex tej tel nnikʼe tiʼj qa in bʼanttoq jun nya bʼaʼn tuʼn, ok tilil wuʼne tuʼn tkyaj toj ttxolil. Noqtzun tuʼnj, o tzʼonin Tyol Dios wiʼje tuʼn miʼn ttzaj nqʼoje kyiʼj xjal nya bʼaʼn, ex in nok tilil wuʼne tuʼn kyok nkʼujlaʼne kykyaqil xjal (Mateo 5:44). In kubʼ nyekʼine nkʼujlabʼile lu toj nimku tten. Jun techel, aj npakbʼane tiʼj tbʼanel tqanil tiʼj Tkawbʼil Dios. In chin tzalaje aj tok nkeʼyine qa in che tzalaj xjal tuʼn tbʼanel tqanil ex qa in ten mujbʼabʼil kyxol tuʼn. ¡Jun tbʼanelxix qʼuqbʼil kykʼuʼj jlu!

In chin tzalaje tuʼnju ya mintiʼ in nok nqʼoʼn nwiʼye kyiʼj nya bʼaʼn ex tuʼnju o che kyaj nqʼoʼne toj tqʼabʼ Jehová. Qʼuqli nkʼuʼje tiʼj qa mlayx txi tqʼoʼn Dios ambʼil tuʼn kukx tok bʼinchaʼn nya bʼaʼn kyiʼj xjal, kyiʼj txkup ex tiʼj Txʼotxʼ. Ex kʼajbʼel Tkawbʼil tuʼn tuʼn tel tiʼn tkyaqil nya bʼaʼn in che tzaj kyiʼj xjal (Isaías 11:1-9). Nya oʼkx in chin tzalaje tuʼnju o tzʼel nnikʼe tiʼj jlu, sino ax ikx tuʼnju jaku chin yoline tiʼj kyukʼil txqantl. Ya nya waje tuʼn tkubʼ nchʼexpuʼne jun tiʼ.