At pornografía jaxku tumel. * In kanet kyuʼn xjal toj televisión, toj bʼitz, toj Internet (kyoj tembʼil jatumel in xi kycompartirin xjal foto), kyoj tqanil, kyoj película, kyoj revista, kyoj videojuego, kyoj teléfono ex kyiʼj xbʼalun in che bʼant kyuʼn xjal. Ya tbʼanel in nela pornografía toj kywitz xjal, tuʼnju mas in nok kyqʼoʼn kywitz tiʼj jlu toj ambʼil jaʼlo (qʼonka twitza tiʼj recuadro  «Junjun tqanil tiʼj pornografía»).

In chʼexpaj kyximbʼetz xjal at tiʼj pornografía. Kubʼ ttzʼibʼin profesora Gail Dines jlu: «Toj ambʼil jaʼlo, mas nya bʼaʼn qe kyilbʼilal xjal in che etz yekʼin. Toj ambʼil ojtxe, e ok qʼoʼn te pornografía, atzun jaʼlo, in tzaj kyqʼamaʼn xjal qa bʼaʼn qe».

¿Tiʼ teya t-ximbʼetz tiʼ jlu? ¿Jakupe tzaj nya bʼaʼn kyiʼj xjal tuʼn pornografía moqa mlay? Tqʼama Jesús jlu: «Tkyaqil tzeʼ bʼaʼn, in tqʼoʼn twitz bʼaʼn; atzunju tzeʼ mya bʼaʼn, in tqʼoʼn twitz mya bʼaʼn» (Mateo 7:17). ¿Tiʼtzun in tzaj tuʼn pornografía? Tuʼn tel qnikʼ tiʼj jlu, qo xnaqʼtzan kyiʼj oxe tiʼchaq.

AJU IN TZAJ KYQʼAMAʼN XJAL AT KYOJTZQIBʼIL TIʼJ JLU: In che naqʼet xjal tuʼn tok kykeʼyin pornografía, tuʼntzunju in tzaj kyqʼamaʼn junjun investigador ex terapeuta qa ik tten jlu ik tzeʼn aj tsichʼen jun xjal tiʼj crack (jun tumel tzeʼn in bʼaj bʼinchaʼn cocaína).

Otoq naqʼet Brian * tuʼn tok tqʼoʼn twitz tiʼj pornografía toj Internet, ex tqʼama jlu: «Ya mlaytoq kyaj ntzaqpiʼne. Ok ik tzeʼn otoq bʼaj droga wuʼne. Tzaj nim nchʼixwiye, at maj in chin luʼline ex in choʼn nwiʼye tuʼn jlu. Xi tiʼn ambʼil tuʼn tkyaj ntzaqpiʼne».

Aʼyeju xjal ma che naqʼet tuʼn tok kykeʼyin pornografía ya mintiʼ in xi kyqʼamaʼn qa in bʼant jlu kyuʼn. Mintiʼ in che yolin kyukʼil txqantl, in tzaj kychʼixwi, in che yolin nya ax tok yol, in nel kypan kyibʼ kyiʼj txqantl, in tzaj bʼaj kykʼuʼj, in tzaj depresión kyiʼj ex in tzaj kyqʼoj. Ax ikx at junjun in kubʼ kyximen tuʼn tkubʼ kybʼyon kyibʼ. In tzaj tqʼamaʼn Sergio jlu aju kukxtoq in kutz tiʼn pornografía toj tteléfono: «El npan wibʼe kyiʼj txqantl ex tzaj bʼajxix nkʼuʼje. Kubʼ nnaʼne qa mintiʼ wajbʼene, qa at nim wile, qa njunalxe atine ex qa mlayxtoq chin exe twitz nya bʼaʼn. Mintiʼ in jyone onbʼil tuʼnju tzaj nim nchʼixwiye ex in tzaj xobʼe».

Ax ikx, qa noq jun rat sok kyqʼoʼn xjal kywitz tiʼj pornografía moqa noq minabʼen, jaku tzaj nim nya bʼaʼn kyiʼj tuʼn. In xnaqʼtzan doctora Judith Reisman tiʼjju in bʼaj kyiʼj xjal in nok kyqʼoʼn kywitz tiʼj pornografía ex toj jun tqanil xi tqʼoʼn te jun comité del Senado te Estados Unidos, tqʼama jlu: «Aqeju tilbʼilal tiʼj pornografía in che kyaj toj kywiʼ xjal, kwest tuʼn tikʼ tnaʼl kyuʼn, in nok tbʼinchaʼn nya bʼaʼn tiʼj kycerebro [...] ex kwest tuʼn tetz jlu toj kywiʼ». Qʼiʼn 19 abʼqʼi tuʼn jun txin Susan tbʼi aju noq minabʼen ok tqʼoʼn twitz tiʼj pornografía toj Internet ex otoq naqʼet tiʼj. In tzaj tqʼamaʼn jlu: «O che kyaj tilbʼilal toj nwiʼye. In che tzaj nnaʼne toj ambʼil jatumel nya ximen maj wuʼne. In kubʼ nximane qa mlayx che etz kykyaqil tilbʼilal lu toj nwiʼye».

TOJ CHʼIN YOL: In che ok xjal te majen tuʼn pornografía ex in tzaj tiʼn nim nya bʼaʼn kyiʼj (2 Pedro 2:19).

AJU IN TZAJ KYQʼAMAʼN XJAL AT KYOJTZQIBʼIL TIʼJ JLU: «In che naj mejebʼleʼn ex qe ja xjal tuʼn pornografía» (The Porn Trap [Qe tsbʼubʼil pornografía], kubʼ ttzʼibʼin Wendy ex Larry Maltz).

In tzaj nya bʼaʼn kyiʼj xjal ex tiʼj kymejebʼleʼn tuʼn pornografía...

• ... aj tnaj qʼuqbʼil kykʼuʼj ex kykʼujlabʼil kyxolx (Proverbios 2:​12-17).

• ... aj kyximen oʼkx kyiʼjx, aj tel kypan kyibʼ tiʼj kyukʼil ex aj tnaj tzalajbʼil in kubʼ kynaʼn aj kykubʼ kuẍeʼ tukʼil kyukʼil (Efesios 5:​28, 29).

• ... aj kyximen tiʼj nya bʼaʼn kyajbʼil ex kyiʼj tiʼchaq nya ax tok (2 Pedro 2:14).

• ... aj tok ky-obligarin kyukʼil tuʼn tbʼant junjuntl tiʼchaq nya bʼaʼn kyuʼn aj kykubʼ kuẍeʼ (Efesios 5:​3, 4).

• ... aj tok kyqʼoʼn kywiʼ ex kyajbʼil tiʼj juntl xjal ex nya tiʼj kyukʼil (Mateo 5:28).

In tzaj tqʼamaʼn Tyol Dios qa nya bʼaʼn tuʼn tsbʼun jun xinaq tiʼj t-xuʼjil moqa jun xuʼj tiʼj tchmil (Malaquías 2:16). ¿Tiquʼn? Tuʼnju qa ma txi tjyoʼn jun xjal juntl t-xuʼjil moqa in xi tjyoʼn jun xuʼj juntl tchmil, jaku naj kymejebʼleʼn. Jaku tzʼel kypan kyibʼ moqa jaku kubʼ kydivorsiarin kyibʼ ex tuʼn jlu, in tzaj nim nya bʼaʼn kyiʼj kykʼwal.

In nok tbʼinchaʼn pornografía nim nya bʼaʼn kyiʼj kʼwal. In tzaj tqʼamaʼntl Brian jlu: «Tej qʼiʼntoq 10 abʼqʼi wuʼne e kanet junjun revista te pornografía wuʼne te nmane tej in chin saqchane tuʼn t-xi wewin wibʼe. In nok tene keʼyilte toj ewaj, maske mintiʼ el nnikʼe tiʼj tiquʼn tbʼanel ela qe tilbʼilal toj nwitze. Iktzun tten ok nqʼoʼn nwitze kyiʼj nya bʼaʼn tilbʼilal ex kukx bʼant jlu wuʼne tejxi nchʼiye». In tzaj kyyekʼin nim xnaqʼtzbʼil qa tuʼnju in nok kykeʼyin kʼwal pornografía jaku ten kyajbʼil tuʼn kykubʼ kuẍe kyukʼil nimku xjal ex naʼmxtoq tjapun kyabʼqʼi. Ax ikx, jaku kubʼ kyyekʼin nya bʼaʼn kymod, mintiʼ in che tzalaj ex in che ok te loc.

TOJ CHʼIN YOL: In nok pornografía ik tzeʼn veneno, tuʼnju in naj kʼujlabʼil tuʼn toj jun ja xjal ex in tzaj tiʼn nim kʼixkʼoj (Proverbios 6:27).

AJU IN TZAJ TQʼAMAʼN TYOL DIOS: «Kytzoqpinkje tkyaqilju mya bʼaʼn in kybʼinchaʼn xjal: Aju yaẍbʼil, ex ju ttzʼilil, tukʼix ju achbʼil mya bʼaʼn, tukʼix ju kyajbʼile mya bʼaʼn, tukʼix ju in pon kykʼuʼje tiʼj nimku; junx taʼ jlu ik tzaʼn in che kʼulune kywitz qe tilbʼilal» (Colosenses 3:​5).

Toj chʼin yol, in nel tikʼun Jehová * pornografía. Pero bʼaʼn tuʼn ttzaj qnaʼn qa o che kubʼ tbʼinchaʼn qe xjal tukʼil kyajbʼil tuʼn kykubʼ ten tukʼil juntl. Ex taj tuʼn kytzalaj kabʼe xjal o che kubʼ mojeʼ, tuʼn tkubʼ kynaʼn qa junx ateʼ kykabʼil ex tuʼn kytzalaj aj tul kykʼwal (Santiago 1:17).

Qa ikju, ¿tiquʼn in xi qqʼamaʼn qa nya bʼaʼn in nela pornografía toj twitz Jehová? Qo xnaqʼtzan tiʼj junjun tiquʼn.

• Ojtzqiʼn tuʼn Jehová qa jaku tzaj xitbʼil toj tanqʼibʼil jun xjal tuʼn pornografía (Efesios 4:​17-19).

• Kʼujlaʼn qoʼ tuʼn ex nya taj tuʼn ttzaj nya bʼaʼn qiʼj tuʼn pornografía (Isaías 48:​17, 18).

• Taj tuʼn tok t-xqʼuqin qe mejebʼleʼn ex qe ja xjal (Mateo 19:​4-6).

• Tajbʼil tuʼn qok te bʼaʼn xjal ex tuʼn tok qqʼoʼn kyoklen txqantl (1 Tesalonicenses 4:​3-6).

• Tajbʼil tuʼn tok qqʼoʼn toklen jatumel in qo kʼwalin ex jatumel in qo alin ex tuʼn kyajbʼen quʼn toj tumel (Hebreos 13:⁠4).

• Ojtzqiʼn tuʼn qa tuʼn pornografía mintiʼ in ten qximbʼetz toj tumel tiʼjju aj kykubʼ kuẍeʼ kabʼe xjal, sino in qo ximen qiʼjx tuʼn ex in ten qximbʼetz tiʼj ik tzeʼn te Satanás (Génesis 6:2; Judas 6, 7).

TOJ CHʼIN YOL: In naj tamiwbʼil jun xjal tukʼil Dios tuʼn pornografía (Romanos 1:24).

In tzaj qʼaqʼin tkʼuʼj Jehová kyiʼj qeju kyaj tuʼn tkyaj kytzaqpiʼn vicio lu. In tzaj tqʼamaʼn Tyol Dios jlu: «In qʼaqʼan tkʼuʼj Qman qiʼj ex in tzʼeʼy tkʼuʼj qiʼj; nim tpasens qiʼj ex nim tkʼujlalil. Porke ojtzqiʼn tuʼn alkye bʼanin qoʼ tiʼj: bʼaʼn tuʼn tquqil txʼotxʼ qoʼ» (Salmo 103:​8, 14). In txokin Dios kyiʼj qeju in kubʼ kyin kyibʼ tuʼn kyjyon onbʼil tukʼil «tuʼntzun ttzaj qʼaqʼan tkʼuʼj» kyiʼj ex tuʼn ttzaj kykʼamoʼn «jun xtalbʼil tuj tqʼijlalil» at-xix tajbʼen kye (Hebreos 4:16; qʼonka twitza tiʼj recuadro  «¿Tzeʼn jaku kyaj ttzaqpiʼn jun xjal pornografía?»).

At nim xjal in tzaj kykʼamoʼn onbʼil in tzaj tqʼoʼn Dios kye. ¿Ope tzʼonin jlu kyiʼj? Qqʼonk qwitz tiʼjju in tzaj tqʼamaʼn Tyol Dios kyiʼj junjun xjal kyaj kytzaqpiʼn junjun nya bʼaʼn kybʼinchbʼen otoq che naqʼet tiʼj. In tzaj tqʼamaʼn 1 Corintios 6:11 jlu: «Ma che txʼjete jaʼlo, ex ma che el paʼne tuʼn Dios tuʼn kyajbʼene oʼkx te, ex ma che ok qʼoʼne te tzʼaqlxix tuʼn Dios noq tuʼn Qajaw Jesús ex tuʼn T-xew Qdios». Ax in kubʼ kynaʼn xjal lu ik tzeʼn te Isaías tej tqʼama jlu: «Ate Dios in kolin wiʼje; qʼuql nkʼuʼje tiʼj, mlay chin xobʼe. Tiʼj Qman nnoʼk nklon wibʼe ex chin bʼitzale te; ma chin klete tuʼn» (Isaías 12:2).

O kyaj ttzaqpiʼn Susan pornografía ex in tzaj tqʼamaʼn jlu: «Oʼkx Jehová jaku tzʼonin qiʼj tuʼn tkyaj qtzaqpiʼn vicio lu. Qa ma txi qqanin te tuʼn ttzaj tyekʼin qbʼe ex tuʼn qtzaj tonin, ktel jun qanqʼibʼil saq ex jun tbʼanel qamiwbʼil tukʼil. Mlayx qo kyaj tkolin Jehová».