In jaw chʼiye atz toj tnam Warialda, Nueva Gales del Sur. Toj tal tnam lu attoq nim alumaj ik tzeʼn qe rit moqa karner, qe wakẍ ex attoq nim awal. Axpe ikx nya tzʼil tnam aju ex mintiʼxix nya bʼaʼn toj.

Lajaj qbʼaje ex aqine tnejel kʼwal, tuʼntzunju xi tzyet tuʼn waqʼunane tej qʼiʼntoq 13 abʼqʼi wuʼne tuʼntzun wonine kyiʼj toj njaye. Xi tzyet tuʼn waqʼunane kyoj rancho tuʼnju mintiʼ in xiʼye toj escuela. Ex tej qʼiʼntoq 15 abʼqʼi wuʼne ya otoq chin oke te jun aqʼunal tiʼj txʼotxʼ ex in kubʼtoq kyiʼj chej wuʼne aʼyeju ateʼ tjaqʼ kʼul.

Tej waqʼunane kyoj kojbʼil ateʼ junjun tiʼ bʼaʼn ex junjun tiʼ nya bʼaʼn ela toj nwitze. Jun kyxol qe tiʼ bʼaʼn ela toj nwitze aju aqʼuntl in bʼant wuʼne ex aju lugar jatumel in chin aqʼunane. Kyoj qonikʼen in chin kubʼtoq qeʼye tiʼj qʼaqʼ, in chin keʼyintoqe twitz kyaʼj tiʼj xjaw ex kyiʼj cheʼw akux in kubʼ nnaʼne aju kyqʼiqʼ puro kʼokʼj tuʼn kʼul. Ex in nok tene ximel tiʼj qa attoq jun bʼinchal tkyaqil qe tbʼanel tiʼchaq lu. Noqtzun tuʼnj, ateʼtoq qe nya bʼaʼn wukʼile toj aqʼuntl aqeju e yolin kyiʼj nya bʼaʼn yol, e sichʼin ex el nkanoʼne jlu kyiʼj.

Tej njapune twi 18 abʼqʼi, in xiʼye anqʼil atz Sydney. Kubʼ nximane tuʼn wokxe kyxol soldad, pero mintiʼ in okx qiʼne tuʼnju mintiʼ in nokxe toj escuela. Kanet jun waqʼune ex ax in kyaj tene jun abʼqʼi toj tnam aju. Atz e ok wojtzqiʼne tnejel maj qe testigos de Jehová. Tzaj nkʼamoʼne txokbʼil tzaj kyqʼoʼn wiʼje tuʼn nxiʼye kyoj kychmabʼil ex el nnikʼe tiʼj qa otoq kanet axix tok wuʼne.

Noqtzun tuʼn, tej tikʼ chin ambʼil kubʼ nximane tuʼn nmeltzʼaje kyoj kojbʼil. Ex in kyaj tene toj tnam Goondiwindi te Queensland. Kanet waqʼune, in kubʼ mojeʼye ex bʼisbʼajilxix tuʼnju xi tzyet tuʼn nkʼane qʼeʼn.

Ul itzʼj kabʼe qkʼwale tukʼil nxuʼjile. Tej tikʼ chin ambʼil, in ximane tiʼj tiʼtoq in bʼant wuʼne toj wanqʼibʼile. Toj ambʼil aju, tzaj nnaʼne aju otoq tzʼok nbʼiʼne toj chmabʼil atz Sydney ex kubʼ nximane tuʼn tbʼant jun tiʼ wuʼne.

Kanet jun ojtxe uʼj La Atalaya wuʼne. Atz kanet dirección tiʼj sucursal kye testigos de Jehová te tnam Australia wuʼne, ex xi ntzʼibʼine tuʼntzun ttzaj kyqʼoʼn onbʼil weye. Tuʼn jlu, ul jun testigo de Jehová visitaril weye, kubʼ tyekʼin tbʼanel tmod wukʼile ex xi tzyet tuʼn nxnaqʼtzane tiʼj Tyol Dios tukʼil.

Akux in chi xnaqʼtzane el nnikʼe tiʼj qa nim toklen tuʼn kybʼant chʼixpubʼil wuʼne toj wanqʼibʼile. Pon toj wanmiye aju in tzaj qʼamaʼn toj 2 Corintios 7:1, jatumel in tzaj qʼamaʼn qe tuʼn tbʼaj qsaqin «tkyaqilju in tzʼilsante qchibʼjal».

Kyaj ntzaqpiʼne tuʼn nkʼane nim qʼeʼn ex tuʼn nsichʼine. Pero kwest ela toj nwitze tuʼn tkyaj ntzaqpiʼne tuʼnju otoq chin naqʼete tiʼj. Noqtzun tuʼnj, wajtoqe tuʼn wajbʼene te Dios tuʼntzun ttzalaj wiʼje. Nim onin wiʼje aju consej tkuʼx toj Romanos 12:2, jatumel in tzaj tqʼamaʼn jlu: «Ex miʼn che ok lpeʼye tiʼj kynabʼl xjal mya bʼaʼn, noq oʼkx kychʼexpum kynabʼle tuʼn kyoke te akʼaj». El nnikʼe tiʼj qa iltoq tiʼj tuʼn kybʼant chʼixpubʼil wuʼne ex tuʼn tten ax nximbʼetze ik tzeʼn te Dios kyiʼj tiʼchaq nya bʼaʼn. Tuʼn tonbʼil Jehová e bʼant chʼixpubʼil wuʼne.

Noqtzun tuʼnj, aju mas kwest ela toj nwitze aju tuʼn miʼn nyolin kyiʼj nya bʼaʼn yol. Ojtzqiʼntoq wuʼne aju consej tkuʼx toj Efesios 4:29, jatumel in tzaj tqʼamaʼn jlu «Miʼn kymaye jun tkʼayil yol». Maske ikju, xi tiʼn ambʼil tuʼn t-xi nbʼiʼne consej lu. Ax ikx, nim onin wiʼje tej nximane tiʼj Isaías 40:26 jatumel in yolin kyiʼj cheʼw ex in tzaj tqʼamaʼn texto jlu: «Kyiʼn jaw kywitze twitz kyaʼj ex kykeʼyinxe: ¿Alkye o bʼinchante tkyaqil jlu? Aju ok qʼonte teyle junjun cheʼw tuj tlugar ex in che tzaj ttxkoʼn teyle junjun ik tzaʼn tbʼi tok. Mi aʼl jun nnikʼ tibʼaj ju txokbʼil te, tuʼnju at nim tipumal Dios ex in kawin tibʼaj tkyaqil». Qa at tipumal Dios tuʼn tkubʼ tbʼinchaʼn tkyaqilju at twitz kyaʼj ex twitz Txʼotxʼ, ax ikx jaku tzaj tqʼoʼn wipumale tuʼn kybʼant chʼixpubʼil wuʼne ex tuʼn ttzalaj wiʼje. Tuʼnju kukx in naʼne Dios ex tuʼnju kukx ok tilil wuʼne, bʼant tuʼn tkyaj ntzaqpiʼne qe nya bʼaʼn yol.

Tej waqʼunane kyoj rancho mintiʼ in yoline kyukʼil nim xjal tuʼnju nyatoq nim qbʼete in naqʼunan kyoj lugar aju. Noq tuʼnju xnaqʼtzbʼil tzaj nkʼamoʼne kyoj kychmabʼil testigo de Jehová bʼant tuʼn nyoline toj tumel. Ax ikx, onin wiʼje tuʼn tbʼant nyoline kyukʼil xjal tiʼj tbʼanel tqanil tiʼj Tkawbʼil Dios (Mateo 6:9, 10; 24:14).

Tzma in nikʼ junjun abʼqʼi ttzajlen qʼoʼn woklene te ansyan toj kʼloj okslal ex jun oklenj te weye tuʼn wonine kyiʼj erman. Jun kyxol qe kʼiwlabʼil o che tzaj nkʼamoʼne aju tuʼn qajbʼene te Jehová junx tukʼil nxuʼjile ex qe qkʼwale.

In xi nqʼoʼne chjonte te Jehová tuʼnju o tzaj tqʼoʼn ambʼil weye tuʼn tok wojtzqiʼne maske nya nim nxnaqʼtzbʼile etz (Isaías 54:13). Jaku t-xi nqʼamaʼne qa ax tok qe yol ateʼkux toj Proverbios 10:22, jatumel in tzaj tqʼamaʼn: «Aju kyʼiwbʼil tuʼn Qman, atzun in qʼonte qʼinumabʼl». Qkyaqile junx kyukʼil qe toj njaye, qaje tuʼn kukx tok qojtzqiʼne Jehová ex tuʼn qajbʼene te te jumajx.