TBʼI XNAQʼTZBʼIL TOK TIʼJ T-XKʼOMIL | IN QO EL KYLAQʼBʼAʼN NYA AX TOK XNAQʼTZBʼIL TIʼJ DIOS
¿Jakupe tzʼok qkʼujlaʼn Dios?
«Kykʼujlame Qman Dios tuʼn tkyaqil kyanmiye ex tuʼn tkyaqil kykʼuʼje ex tuʼn tkyaqil kynabʼle. Atzun tnejel mandamyent jlu maʼxix toklen» (chi Jesús, abʼqʼi 33). *
Ateʼ nim xjal kwest in nela toj kywitz tuʼn tok kykʼujlaʼn Dios, tuʼnju in kubʼ kyximen qa mlay tzʼel kynikʼ tiʼj Dios, qa najchaq taʼ kyiʼj xjal ex qa nya bʼaʼn. Qʼonka twitza tiʼjju o kyqʼama junjun xjal:
«Maske in xiʼtoq nqanine onbʼil te Dios, kubʼ nximane qa najchaq taʼ wiʼje. Ok nqʼoʼne ik tzeʼn jun xjal mintiʼ in tnaʼn jun tiʼ ex qa mlay tzʼok qqʼoʼn qwitz tiʼj» (chi Marco te Italia).
«Kubʼ nximane tuʼn wajbʼene te Dios, pero kubʼ nnaʼne qa mlaytoq chin ok laqʼeʼye ttxlaj. Ax ikx kubʼ nximane qa oʼkx tajtoq tuʼn tkubʼ tqʼoʼn qkastiw ex qa mintiʼtoq tbʼanel tmod» (chi Rosa te Guatemala).
«Tej tal txin qine, kubʼ nximane qa oʼkx in nok tqʼoʼn Dios twitz kyiʼj qpaltil. Ax ikx, kubʼ nximane qa najchaq taʼ qiʼj, ok nqʼoʼne ik tzeʼn jun aj kawil in kawin ex mintiʼ in ximen kyiʼj t-xjalil» (chi Raimunda te Canadá).
Yajtzun teya, ¿in kubʼpe t-ximana qa mlay tzʼok qkʼujlaʼn Dios? Toj nimku abʼqʼi o che ximen xjal tiʼj xjel lu. Chʼixme kykyaqil xjal mintiʼtoq in che naʼna Dios toj Edad Media. ¿Tiquʼn? Tuʼnju in che xobʼtoq te. Jun xjal in jyon tqanil tiʼjju bʼaj ojtxe aju Will Durant tbʼi, tqʼama jlu: «¿Alkye tten jaku tzʼok laqʼeʼ jun xjal aj il naʼl Dios twitz jun qʼuqbʼil najchaq taʼ ex xobʼajil?».
¿Tiquʼn in kubʼ kyximen xjal jlu tiʼj Dios? ¿Tiʼ in tzaj t-xnaqʼtzan Biblia tiʼj jlu? ¿Maspe nya kwest tuʼn tok qkʼujlaʼn Dios qa ma tzʼok qojtzqiʼn?
