Tej tyolin Jesús jun maj tiʼj Ttat atz Jerusalén, el toj qʼanchaʼl qa nya ax tok qe xnaqʼtzbʼil in xi kyxnaqʼtzaʼntoq nejenel kye okslabʼil (Juan 8:12-30). Tuʼn jlu in nel qnikʼ qa nim toklen tuʼn qjyon tqanil kyiʼj xnaqʼtzbʼil nimen kyuʼn xjal tiʼj Dios. Tqʼama Jesús jlu: «Qa kukx ma txi kybʼiʼne nyole, axix tok che okele te nxnaqʼtzbʼene; kʼelel kynikʼe tiʼj ju yol axix tok, ex che tzoqpetele tuʼnju yol axix tok» (Juan 8:31, 32).

Tej tqʼama Jesús «qa kukx ma txi kybʼiʼne nyole», tzaj tyekʼin tzeʼn jaku tzʼel qnikʼ tiʼj qa ax tok jun xnaqʼtzbʼil moqa miʼn. Aj ttzaj qʼamaʼn jun tiʼ teya tiʼj Dios, bʼaʼn tuʼn tkubʼ t-xjelina jlu: «¿Atpe toklen jlu tukʼilju kyaj t-xnaqʼtzaʼn Jesús ex tukʼilju in tzaj tqʼamaʼn Biblia?». Bʼaʼn tuʼn t-xnaqʼtzana tiʼj Tyol Dios tuʼn tel tnikʼa tiʼj qa ax tok aju o txi qʼamaʼn teya, ik tzeʼn bʼant kyuʼn xjal e bʼin tiʼj apóstol Pablo (Hechos 17:11).

Atzun jlu bʼant tuʼn Marco, Rosa ex Raimunda, aqeju ma qo yolin kyiʼj, xi tzyet tuʼn kyxnaqʼtzan tiʼj Tyol Dios kyukʼil testigos de Jehová. ¿Tiʼ el kynikʼ tiʼj?

Marco: «Ajbʼen Tyol Dios tuʼn jun testigo de Jehová tej ttzaj tqʼoʼn tzaqʼwebʼil tiʼj qxjele tukʼil nxuʼjile. Chebʼe chebʼe chʼiy qkʼujlabʼile tiʼj Jehová ex mas ok qkʼujlaʼn qibʼe tukʼil nxuʼjile».

Rosa: «Kubʼ nximane qa kyyol xjal tkuʼx toj Tyol Dios ex qa noq e ajbʼen yol kyuʼn tuʼn ttzaj kychikʼbʼaʼn alkye Dios. Pero tej tbʼet ambʼil, kanet tzaqʼwebʼil kyiʼj nxjele toj Biblia. Atzun jaʼlo, in nok nqʼoʼne Jehová te jun Dios axix tok, aju jaku tzʼok qeʼ nkʼuʼje tiʼj».

Raimunda: «Xi nqanine te Dios tuʼn tonin wiʼje tuʼn tel nnikʼe tiʼj. Yajxitl, xi tzyet tuʼn qxnaqʼtzane tiʼj Biblia tukʼil nchmile. Onin jlu qiʼje tuʼn tel qnikʼe tiʼj Jehová ex nimxix o tzalaje tej tel qnikʼe kyiʼj tbʼanel tmod».

Nya oʼkx in tzaj tyekʼin Biblia alkyeqe nya ax tok yol o che tzaj qʼamaʼn tiʼj Dios, sino ax ikx in tzaj tyekʼin alkyeqe tbʼanel tmod. Ex in nonin Biblia qiʼj tuʼn «tel qnikʼ tiʼj t-xtalbʼil Dios ma tzaj tqʼoʼn qe» (1 Corintios 2:12). Tuʼntzunju, tbʼanel tuʼn tel tnikʼa tiʼj tiʼ in tzaj t-xnaqʼtzaʼn Biblia tiʼj Dios, tiʼj t-ximbʼetz at kye xjal ex tiʼjju kbʼajel toj ambʼil tzul. Jaku jaw tuʼjina mas tqanil kyiʼj xnaqʼtzbʼil lu toj qtembʼile te Internet www.pr418.com/mam, atz jatumel in tzaj tqʼamaʼn «Qe xnaqʼtzbʼil toj Tyol Dios > Qe xjel tiʼj Tyol Dios». Ax ikx, jaku txi tqanina jun t-xnaqʼtzbʼila te jun testigo de Jehová. Qa ma bʼant tuʼna, kʼelel tnikʼa tiʼj qa jaku tzʼok tkʼujlaʼna Dios.