TBʼI XNAQʼTZBʼIL TOK TIʼJ T-XKʼOMIL | IN QO EL KYLAQʼBʼAʼN NYA AX TOK XNAQʼTZBʼIL TIʼJ DIOS
Ok qʼoʼn Dios te nya bʼaʼn noq tuʼn jun nikʼaj yol
AJU IN TZAJ KYQʼAMAʼN XJAL
«Aj tkyim jun xjal bʼinchal il, bʼiʼx in xiʼ toj qʼaqʼ ex in bʼaj kʼixbʼisaʼn» (Catecismo de la Iglesia Católica). Ex ateʼ junjun nejenel kye okslabʼil in tzaj kyqʼamaʼn qa in nel tlaqʼbʼaʼn infierno qe xjal tiʼj Dios.
AJU IN TZAJ TQʼAMAʼN TYOL DIOS
«Aju in bʼinchan il, atzunju kymel» (Ezequiel 18:4). Ex aqeju «xjal kyimni qe, mintiʼ bʼaʼn kyuʼn» (Eclesiastés 9:5). Ik tzeʼn in nel qnikʼ tiʼj, aj tkyim jun xjal, ya mintiʼ in tnaʼn jun tiʼ. Tuʼntzunju, ¿tzeʼntzun tten kʼikʼex kʼixkʼoj tuʼn jun xjal toj qʼaqʼ te jumajx moqa tzeʼn jaku tzʼel laqʼbʼaʼn tiʼj Dios?
Toj Tyol Dios, aju yol hebreo ex griego in najbʼen tuʼn tkubʼ traducirit yol «infierno», atz in yolin jlu tiʼj tembʼil jatumel in che kux muqet xjal. Jun techel, tej ttzaj yabʼil tiʼj Job, tqʼama jlu te Dios: «Noqwit jaku chinx tewana tuj kynajbʼil kyimni» (Job 14:13). Moqa «toj infierno» ik tzeʼn in kubʼ traducirin toj La Sagrada Biblia, te Guillermo Jünemann. Nyatoq taj Job tuʼn tten toj jun lugar jatumel at kʼixkʼoj ex najchaq tiʼj Dios. Oʼkx tajtoq tuʼn tojlan toj muqbʼil.
¿TIQUʼN NIM TOKLEN TUʼN TEL TNIKʼA TIʼJ JLU?
Qa in kubʼ qximen qa in che kux tqʼoʼn Dios qe xjal toj qʼaqʼ, in qo el tpaʼn jlu tiʼj. In tzaj tqʼamaʼn Rocío jlu te tnam México: «Atxix tej tal txin qine tzaj xnaqʼtzaʼn weye qa at infierno. Tuʼn jlu tzaj tchi Dios wiʼje, kubʼ nximane qa mintiʼ tbʼanel tmod, qa at nim tqʼoj ex qa puro nya bʼaʼn te».
Tej tel tnikʼ Rocío tiʼjju in tzaj tqʼamaʼn Biblia tiʼj Dios ex tiʼjju in bʼaj kyiʼj xjal aj kykyim, onin jlu tiʼj tuʼn tchʼexpaj t-ximbʼetz. In tzaj tnaʼn jlu: «Kubʼ nnaʼne qa el qʼiʼn jun matij iqtz wibʼaje, el nnikʼe tiʼj qa taj Dios aju mas tbʼanel te qe, qa kʼujlaʼn qoʼ tuʼn ex qa jaku tzʼok nkʼujlaʼne. Atzun jaʼlo, in nok nqʼoʼne ik tzeʼn jun tbʼanel mambʼaj in che ok tkʼujlaʼn tkʼwal ex taj aju mas tbʼanel te kye» (Isaías 41:13).
Ateʼ nim xjal in che okslan noq tuʼnju in che xobʼ tuʼn kyxiʼ toj qʼaqʼ. Pero nya taj Dios tuʼn qajbʼen te noq tuʼnju in qo xobʼ te. Ax Jesús qʼamante jlu: «Kykʼujlamtzune Qman Dios tuʼn tkyaqil kyanmiye» (Marcos 12:29, 30). Ax ikx, aj tel qnikʼ tiʼj qa mintiʼ in kubʼ tbʼinchaʼn Dios jun nya bʼaʼn, in nonin jlu qiʼj tuʼn tok qeʼ qkʼuʼj tiʼj qa toj tumel che bʼantel tiʼchaq tuʼn aj tkubʼ tqʼoʼn kykastiw xjal toj ambʼil tzul. Ex ik tzeʼn tqʼama Elihú aju tamiw Job, ax ikx qe jaku txi qqʼamaʼn jlu tuʼn tkyaqil qkʼuʼj: «Ate Dios aju at tipumal tuʼn tbʼant tkyaqil tuʼn mintiʼ in tbʼinchaʼn jun mya bʼaʼn ex qa aju mya tzʼaqlxix» (Job 34:10).
