«Mintiʼ o mojeʼ twi qximbʼetze tuʼn t-xi qqʼamaʼne qa at tbʼi Dios. Ex qa at, nya ojtzqiʼn quʼne alkye» (chi aj xnaqʼtzal David Cunningham toj tuʼj Theological Studies).

Ax Dios qʼamante jlu: «Aqine Jehová porke atzun nbʼiye» (Isaías 42:8). Aju bʼibʼaj Jehová a t-xilen «A in Nok te Tkyaqil» (Éxodo 3:14).

In tzaj tqʼamaʼn Biblia jlu: «Che kubʼsane twitz [Dios], kytxʼolbʼanxe kye qe nasyon aju ma tbʼincha, kymanxe kye tiʼj nim toklen tbʼi» (Isaías 12:4).

Ajbʼen tbʼi Dios tuʼn Jesús ex xi t-xnaqʼtzaʼn kye tdisípulo. Jun maj, naʼn Jesús Dios te Ttat ex tqʼama jlu: «O txi nyekʼune aju tbʼiya kye». ¿Tiquʼn bʼant jlu tuʼn? Tqʼamatl jlu: «Aju tkʼujlabʼila o tzaj tyekʼuna wiʼje bʼaʼn tuʼn tten kyukʼil ex tuʼn ntene junx kyukʼil» (Juan 17:26, TNM).

Tqʼama teólogo Walter Lowrie jlu: «Aju xjal mintiʼ ojtzqiʼn tbʼi Dios tuʼn, mlay tzʼel tnikʼ tiʼj alkyexix te [...] ex mlay tzʼok tkʼujlaʼn qa in kubʼ t -ximen qa noq jun ipumalj».

In bʼettoq Victor tkyaqil seman toj iglesia pero nyatoq ojtzqiʼn Dios tuʼn. Tqʼama jlu: «Tej tel nnikʼe tiʼj qa Jehová tbʼi Dios, ok jlu ik tzeʼn ok qojtzqiʼn qibʼe. Otoq tzʼok nbʼiʼne nim xjal in che yolin tiʼj Dios, pero pon qʼij tuʼn tok wojtzqiʼne. Ok Dios te weye ik tzeʼn jun xjal ex atxix toj ambʼil aju o tzʼok nqʼoʼne te wamiwe».

In nok laqʼeʼ Jehová kytxlaj xjal in che ximen tiʼj tbʼi ex in xi ttziyen jlu kye: «Ktzajel qʼaqʼan nkʼuʼje kyiʼj ik tzaʼn jun mambʼaj in tzaj tzʼeʼy tkʼuʼj tiʼj tkʼwaʼl in ajbʼen te» (Malaquías 3:16, 17). Ax ikx in che tzaj tkʼiwlaʼn Jehová qe xjal in najbʼen tbʼi kyuʼn. In tzaj tqʼamaʼn Tyol Dios jlu: «Kykyaqil qeju in che kubʼsan twitz Qman [Jehová], ok che kletel» (Romanos 10:13).