Michelle: Jeʼk Sofía, tbʼanel tuʼnju ma kaneta wuʼne ja.

Sofía: Chjonte, ax ikx weye in chin tzalaje tuʼnju ma tzula.

Michelle: Tej qyolin juntl maj, xi nqʼamaʼne teya tiʼ in kubʼ tnaʼn Dios aj ttzaj nya bʼaʼn qiʼj. * Ex tzaj tqʼamaʼna weʼye qa o tzʼel nim ambʼil in kubʼ t-xjelina jlu, ex mas ximana tiʼj xjel lu tej ttzaj aksident tiʼj ttxuʼya. Pero, ¿tzeʼntzun taʼ?

Sofía: At maj bʼaʼn in nex tqʼij ex at maj nyaxix bʼaʼn, pero jaʼlo bʼaʼn taʼ.

Michelle: Tbʼanel qa bʼaʼn taʼ. Atlo maj kwest tuʼn tten qipumal aj ttzaj jun yabʼil tiʼj jun toj qja.

Sofía: Ikju, ex at maj in kubʼ nxjeline jniʼ ambʼil kukx kʼikʼex yajbʼil quʼn.

Michelle: Toj tumel aju in kubʼ t-xjelina. Bʼalo naʼnx tuʼna tej t-xi nqanine jlu teya, ¿tiquʼn kukx in tzaj tqʼoʼn Dios ambʼil tuʼn tten yajbʼil maske at tipumal tuʼn tel tiʼn?

Sofía: Naʼnx wuʼne.

Michelle: Naʼmxtoq tel qnikʼ tiʼj tzaqʼwebʼil in tzaj tqʼoʼn Tyol Dios, waje tuʼn ttzaj qnaʼn junjun tiʼ o qo yolin tiʼj.

Sofía: Weno.

Michelle: Tej qyolin juntl maj, o yolin tiʼj jun tmajen Dios anqʼin toj ambʼil ojtxe, aju xiʼ tqanin te Dios tiquʼn kukx tzaj tqʼoʼn ambʼil tuʼn tten yajbʼil. Maske xi tqanin jlu, mintiʼ tzaj tqʼoj Dios tiʼj ex mintiʼ kubʼ t-ximen qa otoq naj qʼuqbʼil tkʼuʼj.

Sofía: Ikju, naʼmxtoq tok nbʼine jlu.

Michelle: Ax ikx, el qnikʼ tiʼj qa in tzaj tbʼis Jehová aj ttzaj nya bʼaʼn qiʼj. Ex in tzaj tqʼamaʼn Biblia tiʼ kubʼ tnaʼn Dios tej kyok weʼ tmajen twitz nya bʼaʼn: «Tuj tkyaqil yajbʼil tzaj kyiʼj, ax ikx te o yajlanjtz». * ¿Mintiʼpe in tzaj tqʼuqbʼaʼn qkʼuʼj aj tel qnikʼ tiʼj qa in tzaj tbʼis Dios aj ttzaj nya bʼaʼn qiʼj?

Sofía: In tzaj tqʼuqbʼaʼn qkʼuʼj.

Michelle: Ikju, ex el qnikʼ tiʼj qa at nim tipumal Dios tuʼn tkubʼ tnajsaʼn tkyaqilju in tzaj tiʼn yajbʼil qiʼj.

Sofía: Pero qa at tipumal Dios, ¿tiquʼntzun naʼmx tkubʼ tnajsaʼn tkyaqil nya bʼaʼn?

Michelle: Weno, tnejel qo xnaqʼtzaʼn tiʼj uʼj te Génesis. ¿Ope tzʼok tbʼina aju bʼaj tiʼj Adán ex Eva?

Sofía: Ikju, tzaj xnaqʼtzaʼn weye toj catecismo. Xiʼ tqʼamaʼn Dios kye tuʼn miʼn txi kyloʼn twitz jun tzeʼ, pero mintiʼ e nimen te.

Michelle: Tbʼanel. Tnejel qo xnaqʼtzaʼn tiʼjju xiʼ tqʼamaʼn Dios kye tej naʼmxtoq tbʼaj jlu, ex at toklen tukʼilju nya bʼaʼn in tzaj kyiʼj xjal. Najsama, ¿jakupe jaw tuʼjina Génesis, capítulo 3, versículo 1 a 5?

Sofía: Bʼaʼn, in tzaj tqʼamaʼn jlu: «Atzunte lobʼaj mastoq jawni twitz kywitz kykyaqil txkup ateʼ tuj kʼul, aqeju otoq che bʼant tuʼn Qman Dios. Xitzun tqanin lobʼaj te xuʼj kyjaʼ: —¿Maj o tzaj tmaʼn Dios kyeye tuʼn miʼn t-xi kyloʼne twitz tkyaqil tzeʼ kyxol awal lu?. Chi lobʼaj.  Xitzun ttzaqʼweʼn xuʼj te lobʼaj kyjaʼ: — Bʼaʼn t-xi qloʼne kywitz tzeʼ kyxol awal lu,  atzun tiʼj twitz tzeʼ tkubʼ tuj tmij awal tzaj tmaʼn Dios kyjaʼ: Miʼn txi kyloʼne ex miʼn tzʼok kymakoʼne, tuʼntzun miʼn kykyime, chi Dios qeye.  Xitzun tmaʼn lobʼaj te xuʼj kyjaʼ: — Mlay che kyime.  Porke ojtzqiʼn tuʼn Dios, ok t-xi kyloʼne twitz tzeʼ lu, kjaqetel kynabʼle, che okele ik tzaʼn te Dios ex kʼelel kynikʼe tiʼj bʼaʼn ex tiʼj mya bʼaʼn, chi lobʼaj».

Michelle: Chjonte, qo xnaqʼtzaʼn kyiʼj versículo lu. Tnejel in tzaj tqʼamaʼn qa yolin jun lobʼaj moqa jun kan tukʼil Eva. Ex in tzaj tqʼamaʼn juntl uʼj toj Tyol Dios qa ajbʼen jun kan tuʼn Satanás tuʼn tyolin tukʼil Eva. * Toj ambʼil aju, xi tqʼanin Satanás te Eva tiquʼn otoq tzaj tqʼamaʼn Dios kye tuʼn miʼn txi kyloʼn twitz tzeʼ. ¿Tiʼ xi tqʼamaʼn Dios tuʼn tbʼaj tiʼj Adán ex Eva qa mintiʼ ma che nimen te?

Sofía: Qa ok che kyimeltoq.

Michelle: Ikju, tej tbʼaj jlu, tqʼama Satanás jun nya ax tok yol tiʼj Dios. Tqʼamatl jlu: «Mlay che kyime». Tuʼn jlu, tajtoq tuʼn ttzaj tqʼamaʼn qa in nikʼan Dios yol.

Sofía: Naʼmxtoq tok nbʼine plaj txʼolbʼabʼil lu.

Michelle: Tej tqʼama Satanás qa in nikʼan Dios yol, xi tiʼn ambʼil tuʼn tel nikʼbʼaj tiʼj qa ax tok aju otoq tqʼama. ¿Ojtzqiʼn tuʼna tiquʼn?

Sofía: Mintiʼ ojtzqiʼn wuʼne.

Michelle: Tuʼn tel qnikʼ tiʼj jlu, qo ximen tiʼj jun techel. Qa ma txi nqʼamaʼne teya qa at mas wipumale twitza. ¿Tzeʼn jaku tzʼel qnikʼ tiʼj qa ax tok aju otoq txi nqʼamaʼne teya?

Sofía: Aj tkubʼ tyekʼina qa ax tok at tipumala, ik tzeʼn aj tjaw tiʼna jun matij iqtz.

Michelle: Ikju. Tuʼn tbʼant jlu, teyele junjun jaku jaw tiʼn iqtz tuʼntzun tel qnikʼ tiʼj alkye at mas tipumal.

Sofía: In nel nnikʼe tiʼj.

Michelle: ¿Yajtzun qa ma txi nqʼamaʼne teya qa nya ax tok yolina? Junxitl te jlu, ¿ax tok?

Sofía: Junxitl.

Michelle: Ikju, tuʼnju in xi tiʼn ambʼil tuʼn tel nikʼbʼaj tiʼj qa ax tok tyol jun xjal.

Sofía: Ikju.

Michelle: Tuʼntzunju, il tiʼj tuʼn tikʼ ambʼil tuʼn tel kynikʼ txqantl tiʼj qa ax tok yolina moqa miʼn.

Sofía: Toj tumel tbʼinx.

Michelle: Qkeʼyin juntl maj aju in tzaj qʼamaʼn toj uʼj te Génesis. ¿Tqʼamape Satanás qa at mas tipumal twitz Dios?

Sofía: Mintiʼ.

Michelle: Noqwit tqʼama jlu, bʼiʼxwitlo kubʼ tyekʼin Dios qa at mas tipumal twitz. Noqtzun tuʼnj, toj ambʼil aju tqʼama Satanás qa nya ax tok yolin Dios. Ok ik tzeʼn xi tqʼamaʼn jlu te Eva: «Aʼyine in chin qʼamante axix tok yol, atzunte Dios mintiʼ».

Sofía: Naʼmxtoq nximane tiʼj jlu.

Michelle: Tuʼnju at tnabʼil Dios, xi tqʼoʼn ambʼil tuʼn tel nikʼbʼaj tiʼj qa ax tok aju tqʼama Satanás moqa miʼn. Iktzun tten, jakutoq tzeʼl nikʼbʼaj tiʼj alkye nikʼan yol.

Sofía: Tej tkyim Eva el nikʼbʼaj tiʼj alkyetoq in yolin axix tok.

Michelle: Ikju, el nikʼbʼaj tiʼj, noqtzun tuʼnj, ax ikx at toklen aju tqʼama Satanás kyukʼil junjuntl tiʼchaq. Qqʼonk qwitz juntl maj tiʼj versículo 5, ¿alkye juntl tiʼ xi tqʼamaʼn Satanás te Eva?

Sofía: Xi tqʼamaʼn qa kjaqeteltoq kynabʼil.

Michelle: Ikju. Ax ikx tqʼama jlu kye: «Che okele ik tzaʼn te Dios ex kʼelel kynikʼe tiʼj bʼaʼn ex tiʼj mya bʼaʼn». Kyuʼn yol lu tqʼama Satanás qa el tiʼn Dios ambʼil kye xjal tuʼn kytzalaj tiʼj jun tbʼanel tiʼ.

Sofía: ¡Aah!

Michelle: Ax ikx, jun matij nya ax tok yol jlu.

Sofía: Mintiʼ in nel nnikʼe tiʼj.

Michelle: Tajtoq Satanás tuʼn t-xi tqʼamaʼn te Eva qa mas tbʼanel che tel xjal qa mintiʼ ma kawin Dios kyibʼaj. Ax ikx, el tnikʼ Jehová tiʼj qa mas bʼaʼn tuʼn t-xi tqʼoʼn ambʼil te Satanás tuʼn tkubʼ tyekʼin qa ax tok aju tqʼama moqa miʼn. Tuʼntzunju, xi tqʼoʼn Jehová ambʼil te Satanás tuʼn tkawin tibʼaj Txʼotxʼ toj chʼin ambʼil ex tuʼn jlu at nim nya bʼaʼn jaʼlo. * Pero at tbʼanel tqanil.

Sofía: ¿Tbʼanel tqanil?

Michelle: Ikju, in tzaj tqʼamaʼn Biblia qa nqayin taʼ Jehová kyiʼj xjal in che ikʼ toj kʼixkʼoj. Qqʼonk qwitz tiʼjju kubʼ ttzʼibʼin aj kawil David toj Salmo 31:7. Ok weʼ twitz nim nya bʼaʼn toj tanqʼibʼil, pero qqʼonk qwitz tiʼjju xi tqʼamaʼn te Dios. ¿Jaku jaw tuʼjina?

Sofía: Jaku, in tzaj tqʼamaʼn: «Chin tzalajele nim tuʼnju at tkʼujlalila wiʼje. Ma tila qe nbʼise, ojtzqiʼn tuʼna aju kʼixkʼoj in tzaj wiʼje».

Michelle: Ik tzeʼn ma jaw quʼjin, maske ok weʼ David twitz nim nya bʼaʼn, tzalaj tuʼnju el tnikʼ tiʼj qa ok tqʼoʼn Jehová twitz tiʼjju bʼaj tiʼj. Yajtzun teya, ¿in kubʼpe tnaʼna tzalajbʼil aj tel tnikʼa tiʼj qa in nok tqʼoʼn Jehová twitz tiʼjju in bʼaj tiʼja ex tiʼjju in kubʼ tnaʼna maske mintiʼ in nel kynikʼ txqantl tiʼj jlu?

Sofía: Ikju, in chin tzalaje.

Michelle: Ax ikx, in tzaj tqʼamaʼn Tyol Dios qa kʼelel tiʼn Jehová tkawbʼil Satanás ex tkyaqilju nya bʼaʼn in tzaj qiʼj, axpe ikx qeju nya bʼaʼn o tzaj kyiʼje. Waje tuʼn t-xi nyekʼine teya tiquʼn jaku tzʼok qeʼ qkʼuʼj tiʼj qa ya chʼix tel tiʼn Dios tkyaqil nya bʼaʼn. * ¿Jakupe chin ule tukʼila toj juntl seman?

Sofía: Bʼaʼn, jaku tzula.