1. ¿Alkye nimxix toklen toj qwitz tuʼn qajbʼen te Dios?

¿O TZʼOK tqʼoʼnxi teya twitz tiʼj tbʼi Dios, aju Jehová, tiʼj jun ja moqa tiʼj jun tiʼ toj museo? Qa oje, olo tzalaja tiʼj ex ole tzʼetz twitza tiʼj. Aqoʼ testigos de Jehová, nimxix toklen tbʼi Dios toj qwitz tuʼn qajbʼen te. Twitz tkyaqil Txʼotxʼ, mintiʼ juntl tnam in tzaj naʼn tbʼi Dios tiʼj ik tzeʼn twitz qe qiʼj. Noqtzun tuʼnj, ojtzqiʼn quʼn qa nya oʼkx tuʼn t-xi qqʼamaʼn qa iqʼinju bʼibʼaj lu quʼn.

2. ¿Tiʼ il tiʼj tuʼn tbʼant quʼn tuʼnju o tzaj qʼoʼn qoklen tuʼn tok tbʼi Dios qiʼj?

² Miʼn kubʼ qximen qa ok ktzalajel Jehová qiʼj noq tuʼnju in najbʼen tbʼi quʼn. Il tiʼj tuʼn qanqʼin ik tzeʼn in tzaj tqʼamaʼn. Tuʼntzen jlu, aʼyeju ateʼkx toj ttnam Jehová in tzaj qʼamaʼn jlu kye: «Kypaʼmil kyibʼe tiʼj mya bʼaʼn» (Sal. 34:14). Tzaj tqʼamaʼnxix apóstol Pablo xnaqʼtzbʼil lu tej tkubʼ ttzʼibʼen: «Kykyaqiljo o chi nimin tiʼj, il tiʼj tuʼn tel kypaʼn kyibʼ tiʼj il» (kjawil uʼjit 2 Timoteo 2:19, ATM). Aqoʼ testigos de Jehová ojtzqiʼn qwitz qa in xi qqʼamaʼn tbʼi Jehová. Noqtzun tuʼnj, ¿tzeʼn jaku kubʼ qyekʼun qa in nel qpan qibʼ tiʼj nya bʼaʼn?

3, 4. ¿Alkye taqikʼ Tyol Dios ateʼ junjun xjal at kynabʼil tiʼj Tyol Dios ma bʼet-xi ambʼil in che ximen tiʼj, ex tiquʼn?

³ Aju taqikʼ Tyol Dios xi ttzʼibʼen apóstol Pablo te Timoteo, aju tkuʼx toj 2 Timoteo 2:19, in yolin tiʼj qa «ate Dios o kubʼ qʼoʼnte tqʼuqiljo Ttanim», moqa simyent. Ex tiʼjtzun simyet lu tzʼibʼink kabʼe tqanil. Aju tnejel tqanil in tzaj tqʼamaʼn qa «tojtzqiʼnqexix te Diosjo, aye o chi ok te te», a jlu atz in jatz toj Números 16:5 (ik tzeʼn in tzaj yekʼun toj xnaqʼtzbʼil ma kyaj). «Ex tkabʼ; kykyaqiljo o chi nimin tiʼj, il tiʼj tuʼn tel kypaʼn kyibʼ tiʼj il», tiʼj chʼintl taqikʼ Tyol Dios lu ateʼ junjun xjal at kynabʼil tiʼj Tyol Dios ma bʼet-xi ambʼil in che ximen tiʼj. ¿Tiquʼn?

⁴ Aʼyeju yol e ajbʼen tuʼn apóstol Pablo in tzaj tyekʼun qa jatz tiʼn qe yol lu toj juntl taqikʼ Tyol Dios. Noqtzun tuʼnj, mintiʼ jun taqikʼ Tyol Dios ikxix tten ik tzeʼn jlu toj jun taqikʼ Tyol Dios kubʼ tzʼibʼen toj yol hebreo. ¿Jatumel jatz tiʼn apóstol Pablo qe yol: «Kykyaqiljo o chi nimin tiʼj, il tiʼj tuʼn tel kypaʼn kyibʼ tiʼj il»? Tej naʼmxtaq ttzaj tqʼamaʼn jlu, tzaj tqʼamaʼn aju tkuʼx toj Números capítulo 16, aju in yolin tiʼj tej tok Coré te ajqʼoj. ¿Tojxpe Números capítulo 16 jatz tiʼn apóstol Pablo aju chʼintl yol lu?

5-7. ¿Tiʼchaq ikʼ toj tqʼijlal Moisés aju at toklen tukʼe aju tkuʼx toj 2 Timoteo 2:19? (Qʼoʼnka twitza tiʼj tnejel tilbʼilal.)

⁵ In tzaj tqʼamaʼn Tyol Dios qa ok tmojbʼan tibʼ Datán ex Abiram, aʼye kabʼe tkʼwaʼl Eliab, tukʼe Coré tuʼn kykubʼ nej kywitz txqantl tuʼn kyqʼojin tiʼj Moisés ex Aarón (Núm. 16:1-5). Aʼye qe jlu mintiʼ xi kynimen toklen Moisés otoq tzaj tqʼoʼn Dios ex el kyikʼun kywitz txqantl. Ax tok kukx e anqʼin qe nya bʼaʼn xjal lu toj ttnam Jehová ex jakutoq tzaj nya bʼaʼn kyuʼn tiʼj kyamiwbʼil junjun tukʼe Jehová. Noqtzun tuʼnj, tej tpon ambʼil tuʼn ttzaj tyekʼun Jehová alkye axix tok in najbʼen te ex alkye otoq tzʼel tpan tibʼ tiʼj, tzaj tqʼoʼn Jehová jun kawbʼil.

⁶ In tzaj tqʼamaʼn Tyol Dios jlu: «Atzunte Qman tzaj ttzaqʼweʼn te Moisés ex tma: —Qʼmanxa kye kykyaqil aj Israel tuʼn kyel laqʼeʼ kyiʼj qe ja xbʼalun jatum kyokxsaʼn Coré, Datán ex Abiram. Jawtzun weʼ Moisés ex xiʼ jatum ateʼtoq Datán ex Abiram ex e ok lpeʼ qe kytijil xjal aj Israel tiʼj. Xitzun tmaʼn Moisés kye tnam xjal kyjaʼ: —Kyel laqʼeʼye kyiʼj kyja xjal jumajx mya bʼaʼn qe, ex miʼn tzʼok kymakoʼne jun tiʼxti at kye, tuʼntzun mya ajun kyeye tuʼn kynaje tuʼn tlaj kyil. E jeʼltzun laqʼeʼ tnam xjal kyiʼj kyja Coré, Datán ex Abiram» (Núm. 16:23-27). E kyim tuʼn Jehová kykyaqil qeju nya bʼaʼn xjal. Atzun kye ax tok e ajbʼen te Jehová e kyaj anqʼin, tuʼnju kubʼ kyyekʼun qa in nel kyikʼon nya bʼaʼn tej tel kypan kyibʼ kyiʼj qeju otoq tzʼel kypan kyibʼ tiʼj Jehová.

⁷ ¡Ojtzqiʼn tuʼn Jehová tiʼ tkuʼx toj qanmi! In nel tnikʼ qa ax tok moqa nya ax tok in qo ajbʼen te. Noqtzun tuʼnj, aʼyeju e ajbʼen te Jehová toj ambʼil aju, iltoq tiʼj tuʼn tkubʼ kybʼinchaʼn naj jun tiʼ ex tuʼn tel kypan kyibʼ kyiʼj qeju nya bʼaʼn xjal. Tej ttzaj tqʼamaʼn apóstol Pablo qe yol «kykyaqiljo o chi nimin tiʼj, il tiʼj tuʼn tel kypaʼn kyibʼ tiʼj il», atzlo el tiʼn tiʼjju in tzaj qʼamaʼn toj Números 16:5, 23-27. Qa ikju, in mojeʼ jlu tukʼeju tqʼama apóstol Pablo tej tqʼama qa «ojtzqiʼn tuʼn» Jehová «alkye qeju tekuxix» (2 Tim. 2:19).

8. Qa in najbʼen bʼibʼaj Jehová quʼn ex atoʼkx toj ttnam Jehová, ¿tiʼ mastl il tiʼj tbʼant quʼn?

⁸ Ajbʼen aju ikʼ toj tqʼijlalil Moisés tuʼn apóstol Pablo tuʼn t-xi tnaʼn te Timoteo qa iltoq tiʼj tuʼn tok tilil tuʼn, tuʼn tok t-xqʼuqin tamiwbʼil tukʼe Jehová. Nya oʼkx tuʼn tten jun xjal toj ttnam Dios. Ik tzeʼn toj tqʼijlal  Moisés, nya oʼkxtoq tuʼn tajbʼen bʼibʼaj Jehová tuʼn Coré ex kyuʼn qeju e ok lepeʼ tiʼj. Kykyaqil qeju ax tok in che ajbʼen te Jehová, il tiʼj tuʼn tok tilil kyuʼn tuʼn tel kypan kyibʼ «tiʼj il». ¿Tiʼtoq t-xilen jlu te Timoteo? ¿Ex tiʼ xnaqʼtzbʼil in tzaj tqʼoʼn te ttnam Jehová aju kawbʼil tzaj tqʼoʼn Pablo?

9. ¿Tiʼ tzaj kyiʼj tnejel okslal kyuʼn qe yol «mintiʼ kynabʼl» ex noqx gan qe?

⁹ In tzaj tqʼamaʼn Tyol Dios alkyeqe junjun nya bʼaʼn il tiʼj tuʼn tel kypan kyibʼ okslal tiʼj. Jun techel, kyoj qeju yol ateʼ kytxlaj qe yol ateʼkux toj 2 Timoteo 2:19, xi tqʼamaʼn apóstol Pablo jlu: «Qʼmanxa kye tuʼn miʼn kyjaw qʼojl tiʼj ju yol noqx gan» ex «paʼmil tibʼa kyiʼj qe xjal mya nimal Dios qe ex noqx gan kyyol» (kjawil uʼjit 2 Timoteo 2:14, 16, 23). At junjun kyxol qeju ateʼtoq toj Ja te Chmabʼil kubʼ kyxnaqʼtzaʼn aju nya bʼaʼn xnaqʼtzbʼil. Ex at junjuntl kubʼ kyxnaqʼtzaʼn junjun xnaqʼtzbʼil aju in che qʼojin txqantl okslal tiʼj. Atlo maj mintiʼxixtoq jun yol in tzaj tqʼamaʼn Tyol Dios tiʼj kyxnaqʼtzbʼil, noqtzun tuʼnj, okx qʼoj kyxol okslal tuʼn. Tuʼntzunju, xi tqʼamaʼn apóstol Pablo jlu: «Miʼn tzʼok tmojtzaʼna kyyol xjal mintiʼ kynabʼl ex mintiʼ chʼin bʼaʼn kyuʼn», moqa mintiʼ chʼin kyojtzqibʼil.

10. ¿Tiʼ kbʼantel quʼn qa ma qo ok weʼ twitz jun xjal o tzʼel tpan tibʼ tiʼj Jehová?

¹⁰ Toj ambʼil jaʼlo, nyalo tkyaqil maj qo okel weʼ kywitz qeju o tzʼel kypan kyibʼ tiʼj Jehová. Noqtzun tuʼnj, qa ma tzaj xnaqʼtzaʼn aju mintiʼ tkuʼx toj Tyol Dios, aju jaxku tumel jaku tzaj, il tiʼj tuʼn tel qikʼun. Ex nya bʼaʼn tuʼn qok ten yolil kyukʼe qeju o tzʼel kypan kyibʼ tiʼj ttnam Dios, mintiʼ tuʼn qyolin kyukʼe ex mintiʼ tuʼn t-xi qtzaqʼweʼn kyyol in kubʼ kyqʼoʼn toj Internet ex jaxku tumel. Axpe ikx qa oʼkx qajbʼil tuʼn qonin kyiʼj xjal lu, qa ma qo yolin kyukʼe, jaku miʼn tzʼokx qbʼiʼntl aju kawbʼil ma kubʼ qxnaqʼtzaʼn toj Tyol Dios. Aqoʼ ajbʼel te Jehová, in nel qikʼun tkyaqil kyxnaqʼtzbʼil qeju o tzʼel kypan kyibʼ tiʼj Jehová.

11. ¿Tiʼ juntl jaku tzaj tiʼn qʼoj kyxol okslal, ex tzeʼn jaku kubʼ kyqʼoʼn ansyan tbʼanel techel?

¹¹ Nya oʼkx kyxnaqʼtzbʼil qeju o tzʼel kypan kyibʼ tiʼj Jehová jaku tzaj tiʼn qʼoj kyxol okslal, ax ikx at junjuntl tiʼchaq. Jun techel, qa junxitl t-xim jun okslal tukʼe juntl okslal tiʼj alkye jun tbʼanel saqchbʼil, jaku tzʼok kyyol te «mintiʼ kynabʼl» ex te noqx gan. Ax tok, qa at jun in saqʼchan ex taj tuʼn kysaqchan txqantl tiʼj jun saqchbʼil nya bʼaʼn toj twitz Jehová, mintiʼ tuʼn t-xi kyqʼoʼn ansyan ambʼil te maske ma tzaj jun qʼoj tuʼnju kbʼantel kyuʼn (Sal. 11:5; Efes. 5:3-5). Noqtzun tuʼnj, il tiʼj tuʼn tok kyxqʼuqin kyibʼ ansyan tuʼn miʼn kyok ten qʼamalte aju kyex kyximbʼetz. Il tiʼj tuʼn t-xi kybʼiʼnxix aju kawbʼil in tzaj qʼoʼn kye ansyan: «Kkypastorin oke qe t-ẍneʼl Dios o che kyaj qʼoʼn tuj kykwente [...]. Ex miʼn kubʼ kyximane tuʼn kyoke te kyajaw qeju ateʼ tuj kykwente, noq oʼkx tuʼn kyoke te jun yekʼbʼil tuʼn kyok lpeʼ ẍneʼl kyiʼje» (1 Ped. 5:2, 3; kjawil uʼjit 2 Corintios 1:24).

12, 13. a) ¿Tiʼ in bʼant kyuʼn testigos de Jehová aj tjaw kyjyoʼn jun tten saqchbʼil, ex alkyeqe taqikʼ Tyol Dios jaku che ajbʼen tiʼj jlu? b) ¿Alkye tten jaku che ajbʼen junjun taqikʼ Tyol Dios ateʼ toj taqikʼ 12 toj junjuntl tten qanqʼibʼil?

¹² Mintiʼ in tzaj tqʼamaʼn ttnam Dios alkyeqe pelicula, videojuego, uʼj moqa bʼitz il tiʼj tuʼn kyel qikʼen. ¿Tiquʼn? Tuʼnju in tzaj tqʼamaʼn Tyol Dios qa teyele te junjun il tiʼj tuʼn tkubʼ t-xnaqʼtzaʼn tnabʼil tuʼntzen tel tnikʼ «tiʼj alkyeju bʼaʼn ex alkyeju mya bʼaʼn» (Heb. 5:14). Jaku che ajbʼen qe kawbʼil ateʼkux toj Tyol Dios quʼn tuʼn tel qnikʼ tiʼj alkye jun tbʼanel saqchbʼil kyjawil qjyoʼn. Toj tkyaqil tten qanqʼibʼil, il tiʼj tuʼn tel qnikʼ «tiʼj alkyeju bʼaʼn tuj twitz Qajaw» (Efes. 5:10). In tzaj t-xnaqʼtzaʼn Tyol Dios qa aju wibʼaj toj jun ja at chʼin toklen tuʼn miʼn t-xi tqʼoʼn ambʼil tuʼn kysaqchan toj tja tiʼj nya bʼaʼn saqchbʼil (1 Cor. 11:3; Efes. 6:1-4).

¹³ Aʼyeju taqikʼ Tyol Dios lu, nya oʼkx at kyajbʼen tuʼn tel qnikʼ tiʼj alkyeqe tbʼanel saqchbʼil. Ax ikx at kyajbʼen tuʼn tel qnikʼ  tiʼj alkye tten tuʼn tok qxbʼalumin qibʼ, alkye tten tuʼn tbʼaj qbʼinchen qibʼ, tiʼ kbʼantel quʼn tuʼn miʼn ttzajxix qyabʼ ex junjuntl aju jaku tzaj yol tiʼj. Kyjuʼtzun, qa at jun tiʼ mintiʼ in tzaj tqʼamaʼn Tyol Dios tiʼj, ax ikx mintiʼ te ttnam Jehová jun tyol in tzaj tqʼamaʼn tiʼj, quʼn «aju tmajen Qajaw mya bʼaʼn tuʼn tqʼojin, noq oʼkx tuʼn tok mans kyukʼil kykyaqil» (2 Tim. 2:24).

14. ¿Alkye techel yolin apóstol Pablo tiʼj tuʼn ttzaj tyekʼun qa il tiʼj tuʼn miʼn tok qmojbʼan qibʼ kyukʼe nya bʼaʼn xjal?

¹⁴ ¿Alkye juntl tten jaku tzʼel kypan kyibʼ «tiʼj il» aʼyeju «o chi nimin tiʼj» Jehová? Aju qa mintiʼ sok kymojbʼan kyibʼ kyukʼe qeju in kubʼ kybʼinchaʼn nya bʼaʼn. Tuʼn jlu in nel qnikʼ tiquʼn tej tkubʼ tqʼoʼn apóstol Pablo techel tiʼj simyent kubʼ tqʼoʼn Dios, yolin tiʼj juntl techel. Tqʼama qa «tuj jun nintz ja», nya oʼkx «at makbʼil qʼan pwaq» ex «saq pwaq» ttxʼotxʼil, sino «ax ikx at makbʼil tzeʼ» ex «txʼotxʼ» ttxʼotxʼil, ex qa «at junjun makbʼil tbʼanilxix, ex at junjun myaxix tbʼanil» (2 Timoteo 2:20, 21). Xi tqʼamaʼn apóstol Pablo kye okslal tuʼn tel kypan kyibʼ tiʼj junjun makbʼil «myaxix tbʼanil» qe.

15, 16. ¿Tiʼ xnaqʼtzbʼil in tzaj tqʼoʼn qe aju techel tiʼj jun «nitz ja», moqa matij ja?

¹⁵ ¿Tiʼ tzʼelpena techel kubʼ tqʼoʼn apóstol Pablo? Aju «nintz ja», moqa nintzkuʼ ja, in nok te techel ttnam Dios, aʼyetzen «makbʼil», moqa aʼyeju in che ajbʼen toj jun ja, in che ok te kyechel teyele junjun okslal. Toj jun ja, at junjun tiʼchaq jaku che bʼaj tzʼilix kyuʼn junjuntl tiʼchaq nya bʼaʼn qe moqa qa ma che kubʼ qʼet toj junjun tembʼil aju tzʼil taʼ. Qa at jun tajaw ja nya taj tuʼn kytzʼilix qe tmakbʼil aʼyeju saq qe, ik tzeʼn qeju in che ajbʼen tuʼn tbʼinchet wabʼj, il tiʼj tuʼn miʼn kyok tmojbʼan kyukʼe txqantl makbʼil aʼyeju tzʼilqe.

¹⁶ Ax ikx qeju in che ajbʼen te Jehová toj ambʼil jaʼlo, aʼyeju in nok tilil kyuʼn tuʼn tten kyanqʼibʼil saq, mintiʼ tuʼn tokxix kymojbʼan kyibʼ kyukʼe junjun kyxol qeju ateʼ toj ttnam Dios, aʼyeju nya kyajbʼil tuʼn  kyjapun tkawbʼil Jehová kyuʼn (kjawil uʼjit 1 Corintios 15:33). Qa in tzaj qʼamaʼn qe tuʼn miʼn tok qmojbʼan qibʼ kyukʼe junjun kyxol qeju ateʼktz toj ttnam Dios, mas il tiʼj tuʼn tel qpan qibʼ kyiʼj qeju mintiʼ ateʼktz toj ttnam Dios, aʼyeju oʼkx tok kykʼuʼj tiʼj pwaq, mintiʼ in xi kyniman tyol kyman, mintiʼ in japun kyyol, sbʼul qe, mintiʼ in chewix kykʼuʼj, in nel kyikʼun aju bʼaʼn, in che ok meltzʼaj kyiʼj kyukʼil ex mas tok kykʼuʼj tiʼj achbʼil ex mya tiʼj Dios (2 Tim. 3:1-5).

17. ¿Alkye tten kubʼ kyyekʼun qeju ajbʼel te Jehová qa in nel kyikʼun nya bʼaʼn?

¹⁷ In tzaj tqʼamaʼn Tyol Dios tiʼxix bʼant kyuʼn qeju bʼaʼn che nimen tyol Jehová tej t-xi tqʼamaʼn kye «aj Israel tuʼn kyel laqʼeʼ kyiʼj qe ja xbʼalun jatum kyokxsaʼn Coré, Datán ex Abiram», ex in tzaj tqʼamaʼn qa «e jeʼltzun laqʼeʼ naj» (Núm. 16:24, 27, TNM). Mintiʼ jawje kykʼuʼj tuʼn tbʼant kyuʼn ex mintiʼ e ok ten ximel tnejel qa ok moqa mlay. Ax ikx in tzaj tqʼamaʼn Tyol Dios alkyexix tten xi kybʼiʼn aju tzaj qʼamaʼn kye. I el «laqʼeʼ naj [...] kyiʼj kyja» aj il. Ten nimxix kyajbʼil qeju e ajbʼen tuʼn tkyaqil kykʼuʼj te Jehová tuʼn t-xi kybʼiʼn tyol tukʼe tkyaqil kyanmi. Kubʼxix kyyekʼun qa in che ajbʼentoq te Jehová ex qa in neltoq kyikʼen aju nya bʼaʼn. ¿Tiʼ jaku tzʼel qkanoʼn tiʼj techel lu?

18. ¿Alkyetoq taj apóstol Pablo tuʼn ttzaj tqʼamaʼn tej t-xi tqʼamaʼn te Timoteo tuʼn tel oq «tiʼj kyachbʼil kuʼxun»?

¹⁸ Qa il tiʼj tuʼn tok qxqʼuqin qamiwbʼil tukʼe Jehová, il tiʼj tuʼn tbʼant naj quʼn ex tuʼn tkyaqil qkʼuʼj. Atzun jlu tajtoq apóstol Pablo tuʼn ttzaj tqʼamaʼn tej t-xi tqʼamaʼn jlu te Timoteo: «Tel oqa tiʼj kyachbʼil kuʼxun» (2 Tim. 2:22). Toj ambʼil lu, otoq chʼiy Timoteo, junlo 30 abʼqʼi qʼiʼn tuʼn. Noqtzun tuʼnj, at maj aju «kyachbʼil kuʼxun» mintiʼ in nel maske, moqa inchq, otoq chʼiy jun xjal. Tej tok weʼ Timoteo kywitz qeju achbʼil lu, el tpan tibʼ kyiʼj. Toj juntl yol, el tpan tibʼ Timoteo «tiʼj il». Ax ikx chʼixmi ax yolju tzaj tqʼamaʼn Jesús tej tqʼama: «Qa tuʼn tbʼaqʼ twitza kbʼel tzʼaqa tuj il, qʼiʼmetza ex xoʼmixa» (Mat. 18:9). Toj ambʼil jaʼlo, aʼyeju okslal kyajbʼil tuʼn t-xi kybʼiʼn kawbʼil lu ex kyajbʼil tuʼn tok kyxqʼuqin kyamiwbʼil tukʼe Dios, jurat naj in xi kynimen yol lu tuʼn tkyaqil kykʼuʼj.

19. ¿Tiʼ o bʼaj kyximen junjun okslal tuʼn tbʼant kyuʼn tuʼn miʼn tnaj kyamiwbʼil tukʼe Jehová?

¹⁹ At junjun kyxol qeju ma che kʼan, moqa ma che kʼwan, qʼeʼn tej naʼmxtoq kyok te testigo de Jehová o kubʼ kyximen tuʼn miʼn t-xi kykʼaʼn nix chʼintl qʼeʼn. At junjuntl in nel kyikʼun junjun tten saqchbʼil aʼyeju bʼaʼnqe, noqtzun tuʼnj, in kubʼ kyximen qa jaku pon kykʼuʼj tiʼj nya bʼaʼn tuʼn (Sal. 101:3). Jun techel, tej naʼmxtoq tok jun erman te testigo de Jehová, in xiʼtoq kyoj junjun tembʼil te bʼixbʼil jatumel in che yaẍin xjal, moqa in che kyʼaʼjin. Atzun tej tel tnikʼ tiʼj Tyol Dios, kubʼ t-ximen tuʼn miʼn tbʼixintl, axpe ikx kyoj junjun bʼixbʼil in nok kyuʼn testigos de Jehová, tuʼntzen miʼn ttzaj juntl maj nya bʼaʼn tajbʼil moqa tuʼn miʼn ttzaj juntl maj nya bʼaʼn t-ximbʼetz tiʼjju ikʼ tiʼj. Ax tok, in xi kykʼaʼn okslal chʼin qʼeʼn, in che bʼixen, ex at junjun tiʼchaq in bʼant kyuʼn aju in tzaj tqʼamaʼn Tyol Dios qa bʼaʼn qe. Noqtzun tuʼnj, qkyaqilx il tiʼj tuʼn tok tilil quʼn tok qxqʼuqin qamiwbʼil tukʼe Jehová ex tuʼn qkolin tiʼj.

20. At maj kwest tuʼn tel qpan qibʼ «tiʼj il», noqtzun tuʼnj, ¿tiʼ in nok tqʼuqbʼaʼn qkʼuʼj?

²⁰ Jun tbʼanel qoklen aju iqʼin tbʼi Dios quʼn, noqtzun tuʼnj, il tiʼj tuʼn qaqʼunan tiʼj. Il tiʼj tuʼn tel qikʼun «il» ex tuʼn tel qpan qibʼ tiʼj (Sal. 34:14). Ax tok, at maj kwest tuʼn tbʼant jlu quʼn, noqtzun tuʼnj, in nok qeʼ qkʼuʼj aj tok qbʼiʼn qa kukx in che ok tkʼujlaʼn Jehová qeju «o chi ok te te» ex qeju in che bʼet kyoj tbʼe aʼyeju tzʼaqliqe (2 Tim. 2:19, ATM; kjawil uʼjit 2 Crónicas 16:9a).