At jun xuʼj Smita tbʼi, * te toj tnam Daca (Bangladés) ex te junlo 35 abʼqʼi, tbʼanel xjal te ex at tkʼuʼj kyiʼj xjal. Ojtzqiʼn twitz kyuʼn xjal qa tbʼanel aqʼunal te, qa jun xuʼjilbʼaj te aju in tzalaj ex aju taj (tgan) tuʼn tonin kyiʼj xjal tuʼn tel kynikʼ tiʼj Dios. Noqtzun tuʼnj, noq minabʼen (de repente) ok kybʼiʼn toj tja ex qe tamiw qa otoq tzaj jun tyabʼ aju bʼiʼx kyim tuʼn tej naʼmxtaq tjapun jun seman.

Ax ikx te James tukʼe t-xuʼjil, aju jun mejebʼleʼn te junle 35 abʼqʼi qe, chʼixmi junx kymod ik tzeʼn te Smita. Toj jun ambʼil, i eʼx visitaril kyamiw toj kyaq txʼotxʼ jatumel in kux bʼaj qʼij toj tnam Estados Unidos. Naqtzun tuʼnj, ya mintiʼtl (tiloʼtel) e meltzʼaj toj kyja atz toj tnam Nueva York. Tuʼnju tej in che bʼettoq toj bʼe, ok tchokarin tibʼ kykar ex bʼiʼx e kyaj ten qeju kʼujlaʼn qe kyuʼn ex qeju kyukʼil toj aqʼuntl toj nimxix bʼis.

Nya il tiʼj tuʼn qxiʼ najchaq, moqa laqʼche, tuʼn tok qqʼoʼn qwitz tiʼj nimxix nya bʼaʼn ex tiʼj nimxix kʼixkʼoj at toj ambʼil jaʼlo. Kyoj nimku (bʼampo) tnam, in che kyim xjal ax ikx qe soldad aj kyok qe qʼoj, in nok bʼinchaʼn nya bʼaʼn kyiʼj tbʼanel xjal ex in che kubʼ bʼiyoʼn. Tkyaqil qʼij in tzaj jun nya bʼaʼn ex in tzaj jun yabʼil tiʼj alkyexku xjal, te alkyexku tabʼqʼi ex te alkyexku tten tanqʼibʼil. Aj ttzaj jun xitbʼil tuʼnx twitz Txʼotxʼ bʼiʼx in kubʼ tnajsaʼn junjun tnam. Ax ikx at nim ikʼbʼil tiʼj kyyajil, moqa kyiyjil, junjuntl xjal ex in nok bʼinchaʼn nya bʼaʼn kyiʼj xjal jaʼxku tumel. Axlo ikx teya o tzaj jun nya bʼaʼn tiʼja.

Tuʼntzunju, in qo ximen kyiʼj qe xjelbʼitz lu:

• ¿Tiquʼn in tzaj nya bʼaʼn kyiʼj tbʼanel xjal?

• ¿Ape Dios in tzaj qʼonte nya bʼaʼn lu?

• ¿Tjunalxpe nya bʼaʼn in tzaj, moqa ax xjal in kubʼ bʼinchante?

• ¿Tuʼnpe karma, moqa toj juntl yol, tuʼnju bʼant quʼn toj juntl qchwinqlal ten ojtxe, in tzaj nya bʼaʼn qiʼj?

• Qa at jun Dios nimxix tipumal (tbʼalor), ¿tiquʼn mintiʼ in che ok t-xqʼuqin qeju tbʼanel xjal aj ttzaj nya bʼaʼn?

• ¿Kpolpetzulo jun qʼij jatumel miʼn tzajtl kʼixkʼoj ex nya bʼaʼn qiʼj?

Tuʼn kytzaqʼwet qe xjel (pregunta) lu, il tiʼj tuʼn tel qnikʼ tiʼj kabʼetl xjel, aju: ¿Tiquʼn in tzaj nya bʼaʼn kyiʼj kykyaqil xjal?, ex ¿tiʼ kbʼantel tuʼn Dios?