In tzaj tqʼamaʼnxix Tyol Dios tiʼ kbʼantel tuʼn Jehová ex Jesucristo, aju Tkʼwaʼl, tiʼj nya bʼaʼn o tzaj tuʼn Satanás aju Tajaw il. In tzaj tqʼamaʼn Tyol Dios jlu: «Tuʼntzun tlaj jlu ul aj Tkʼwaʼl Dios twitz Txʼotxʼ, tuʼntzun tkubʼ xitj tkyaqil taqʼunbʼen tajaw il» (1 Juan 3:8). Tkyaqilju nya bʼaʼn in bʼaj twitz Txʼotxʼ ex tkyaqilju nya bʼaʼn kybʼinchbʼen xjal kbʼel najsaʼn. Tqʼama Jesús qa aju «nkawin twitzjuʼ txʼotxʼ», ok kʼelex lajoʼn (Juan 12:31, Xjan Tuʼjil [XT]). Aj tel qʼiʼn Satanás, ok tzul jun tbʼanel akʼaj twitz Txʼotxʼ, ex ok kʼokel Txʼotxʼ te jun najbʼil atz jatumel ktel mujbʼabʼil (2 Pedro 3:13).

¿Tiʼ kbʼajel kyukʼe qeju nya kyaj tuʼn tkubʼ kychʼixpuʼn kymod ex kukx kyaj tuʼn tkubʼ kybʼinchaʼn aju nya bʼaʼn? Qo ximen tiʼjju jun tbʼanel qʼuqbʼil qkʼuʼj in tzaj qʼoʼn aj ttzaj tqʼamaʼn Tyol Dios jlu: «Qeju in che anqʼin tuj tumelxix ex mintiʼ kypaltil, kukx che anqʼil twitz txʼotxʼ; atzun qeju bʼinchal mya bʼaʼn ex qe aj il, bʼiʼx che elex lajoʼn tuj ex mintiʼ kyoklen tiʼj» (Proverbios 2:21, 22). Ya miʼn tentl kyipumal nya bʼaʼn xjal kyibʼaj txqantl. Toj ambʼil aju, chebʼe (chabʼa) che tzaqpajel tbʼanel xjal tjaqʼ tipumal il o kyaj qʼoʼn kyibʼaj (Romanos 6:17, 18; 8:21).

¿Alkye tten kbʼel tnajsaʼn Dios nya bʼaʼn toj Tbʼanel Najbʼil? Mlay tzʼel tiʼn ambʼil kye xjal tuʼn tjaw kyjyoʼn alkye kyajbʼil tuʼn tbʼant ex mlay che ok xjal tuʼn ik tzeʼn qe robot. Sino, ok che xel t-xnaqʼtzaʼn tbʼanel xjal toj tbʼe ex ok che xel t-xnaqʼtzaʼn tuʼn miʼn tkubʼ kyximentl aju nya bʼaʼn ex tuʼn miʼn tkubʼ kybʼinchaʼntl aju nya bʼaʼn.

¿Tiʼ kbʼantel tuʼn Dios tukʼe junjuntl nya bʼaʼn in tzaj? O tzaj ttziyen qa chʼixtl tpon ambʼil tuʼn tkawin Tkawbʼil twitz Txʼotxʼ. O jaw tjyoʼn Dios Jesucristo tuʼn tok te Ajkawil toj Tkawbʼil ex at tipumal Jesús tuʼn kyqʼanit yabʼ (Mateo 14:14). Ax ikx at tipumal Jesús tibʼajju xitbʼil tuʼnx twitz Txʼotxʼ (Marcos 4:35-41). Aju kʼixkʼoj «mintiʼ ximan» ex «noq minabʼen in tzaj», ok kʼelel (Ecclesiastés 9:12). Ya mlay tzajtl nya bʼaʼn kyibʼaj xjal tjaqʼ tkawbʼil Jesucristo (Proverbios 1:33).

Yajtzun qe nim millón tbʼanel xjal o che kyim, ¿tiʼ kbʼajel kyiʼj? Tej naʼmxtoq tjaw anqʼin Lázaro, aju tamiw Jesús, tqʼama Jesús qa ate chwinqlal ex qa tuʼn «kchi jawil anqʼinxjal kyxol kyimnin» (Juan 11:25, ATM ). Ikju, at tipumal Jesús tuʼn t-xi tqʼoʼn juntl maj kychwinqlal qeju o che kyim.

¿Tajbʼil teya tuʼn tanqʼina twitz jun Txʼotxʼ jatumel mlay tzajtl nya bʼaʼn kyiʼj tbʼanel xjal? Bʼaʼn tuʼn t-xnaqʼtzana tiʼj Tyol Dios tuʼn tel mastl tnikʼa tiʼj alkye axix Dios ex alkyeqe t-ximbʼetz at. Tuʼn tkyaqil kykʼuʼj testigos de Jehová ok che onil tiʼja tuʼn tel mastl tnikʼa. In qo txokene tiʼja tuʼn tkyaqil qkʼuʼje tuʼn tyolina tukʼe jun testigo de Jehová atz jatumel najliya moqa jaku txi ttzʼibʼena kye qeju bʼinchal uʼj lu.