Tajbʼil Dios tuʼn t-xi qqʼamaʼn te aju nya bʼaʼn in nikʼ qiʼj tukʼe tkyaqil qkʼuʼj (Lucas 18:1-7). In tzaj tbʼiʼn aju in xi qqʼamaʼn te tuʼnju at tkʼuʼj qiʼj. Tbʼanelxix Qtat at toj kyaʼj tuʼnju in qo tzaj ttxkoʼn tuʼn qyolin tukʼil. ¿Tajbʼil teya tuʼn tyolina tukʼil? (Uʼjinxa Filipenses 4:6.)

Aju naʼj Dios, nya noq jun tten tuʼn t-xi qqanin onbʼil, ax ikx a jun ttenju tuʼn qxi laqʼeʼ tiʼj Dios (Salmo 8:3, 4). Tkyaqil maj aj t-xi qqʼamaʼn te aju in qnaʼn, in chʼiy qamiwbʼil tukʼe. (Uʼjinxa Santiago 4:8.)

Nya taj Dios tuʼn tkyaj qqʼoʼn qe yol toj qwiʼ aʼyeju che xel qqʼamaʼn te ex nya taj tuʼn kyajbʼen qeju nimaq kyxilen yol quʼn. Ax ikx mintiʼ in tzaj tqʼamaʼn qa ilxix tuʼn t-xi qbʼinchaʼnxix jun tten qxmilal aj qnaʼn Dios. Quʼn aju tajbʼil aju tuʼn t-xi qqʼamaʼn te aju tkuʼx toj qanmi (Mateo 6:7). Jun techel tiʼj jlu aju ikʼ toj kyqʼijlalil aj Israel ojtxe, xi tqʼamaʼn Ana te Dios aju jun nya bʼaʼn in nikʼtoq tiʼj toj tja. Yajxitl, tej tok tbʼis te tzalajbʼil, naʼn Dios tuʼn t-xi tqʼoʼn chjonte. (Uʼjinxa 1 Samuel 1:10, 12, 13, 26, 27 ex 2:1.)

¡Jun tbʼanelxix qoklen jlu! Jaku qo yolin tukʼil Bʼinchal qe tiʼjju nya bʼaʼn in nikʼ qiʼj. Ax ikx jaku jaw qnimsaʼn ex jaku txi qqʼoʼn chjonte tiʼj tkyaqilju in bʼant tuʼn. Miʼn tzʼel naj tiʼj qkʼuʼj aju tbʼanel qoklen lu. (Uʼjinxa Salmo 145:14-16.)