Olo tzʼok tbʼinxi teya kyoj junjun tqanil in che etz kyuʼn xjal twiz tkyaqil Txʼotxʼ qa at maj in najbʼen okslabʼil (nimbʼil) kyuʼn xjal tuʼn tkubʼ kybʼinchaʼn nya bʼaʼn. In bʼaj jlu tuʼnju nya kykyaqil okslabʼil tzajniqe tukʼe Dios (Mateo 7:15). Ikju, at nim xjal o che kubʼ sbʼuʼn. (Uʼjinxa 1 Juan 5:19.)

Noqtzun tuʼnj, in tzaj tqʼoʼn Dios twitz kyiʼj xjal aʼyeju kʼujlaʼn aju bʼaʼn kyuʼn ex aju axix tok (Juan 4:23). Tuʼntzunju in txoken Dios kyiʼj qeju tbʼanel xjal lu tuʼn tel kynikʼ tiʼjju axix tok tkuʼx toj Tuʼjil Tyol, aju Xjan Uʼj. (Uʼjinxa 1 Timoteo 2:3-5.)

Aʼyeju xjal ateʼ toj ttnam Dios jaʼlo, o che tzaj tiʼn Jehová toj nimku okslabʼil ex in chex t-xnaqʼtzaʼn tiʼj axix tok ex tuʼn tok kykʼujlaʼn kyibʼ kyxolx (Miqueas 4:2, 3). Kyjuʼtzun jaku tzʼel tnikʼa tiʼj axix tok okslabʼil aj tok tqʼoʼn twitza tiʼj alkye tten in nok kykʼujlaʼn kyibʼ kyxolx. (Uʼjinxa Juan 13:35.)

Aʼyeju axix tok in che ajbʼen te Dios atz in jatz kyiʼn kyxnaqʼtzbʼil ex aju alkye tten che anqʼil toj Tyol Dios (2 Timoteo 3:16). Ax ikx in xi kyqʼoʼn toklen tbʼi Dios (Salmo 83:18, TNM). Ex in xi kyqʼoʼn ambʼil tuʼn tkʼant kyspikʼumal, ik tzeʼn bʼant tuʼn Jesús tej tonin kyiʼj xjal (Mateo 5:16) Ax ikx in xi kyqʼamaʼn qa oʼkx tiʼj Tkawbʼil Dios jaku tzʼok qʼuqeʼ kykʼuʼj xjal (Daniel 2:44). Tuʼntzunju jaku tzʼel qnikʼ kyiʼj tuʼnju in cheʼx kyja xjal tuʼn kyyolin tiʼj tbʼanel tqanil tiʼj Tkawbʼil Dios. (Uʼjinxa Mateo 24:14 ex Hechos 5:42; 20:20.)