Ximana tiʼj jlu: in xi tqʼamaʼn jun tatbʼaj te tkʼwaʼl jlu: «Ma bʼet nim, nim ambʼil, kubʼ tbʼinchaʼn Dios Txʼotxʼ ex tkyaqilju at twitz. Ax ikx kubʼ tbʼinchaʼn Qʼij, Xjaw ex qe cheʼw». In kyaj ten kʼwaʼl ximel jun rat ex in xi tqanin jlu te ttat: «Tat... ¿alkyetzun kubʼ bʼinchante Dios?».

In xi ttzaqʼweʼn tatbʼaj jlu: «Mix aʼl jun kubʼ bʼinchante Dios. Kukx o tzʼanqʼin te». Toj ambʼil lu, in qeʼ te kʼwaʼl tkʼuʼj tiʼj tzaqʼwebʼil. Noqtzun tuʼnj, aj tchʼiy, kukx in ximen tiʼj jlu. Mintiʼ in nel tnikʼ tiʼj tiquʼn mix aʼl jun kubʼ bʼinchante Dios. Quʼn axpe ikx tkyaqilju at twitz kyaʼj ex twitz Txʼotxʼ e kubʼ bʼinchaʼn. Kukx in nximen tiʼj jlu: «¿Jatumel tzaj Dios?»

¿Tiʼ in tzaj tqʼamaʼn Tyol Dios tiʼj jlu? Axju ik tzeʼn xi ttzaqʼweʼn mambʼaj te tkʼwaʼl, aju xqo yolin tiʼj. Kubʼ ttzʼibʼen Moisés jlu: «Nman Dios [...] Tej naʼnxtoq tbʼinchet enter twitz txʼotxʼ, atxix ojtxi ex tuj tkyaqil tabʼqʼiyil te jumajx, oʼkx aya Dios» (Salmo 90:1, 2). Chʼixmi ax jlu tqʼama Isaías, aju t-sanjel Dios: «¿Mintiʼpetzun bʼiʼn kyuʼne? ¿Naʼnxpetzun kybʼinteye? Ate Qman atzunte Dios, mintiʼ bʼajsbʼil te, ate o bʼinchante tkyaqil twitz txʼotxʼ» (Isaías 40:28). Ax ikx in tzaj tyekʼun uʼj kubʼ ttzʼibʼen Judas qa at Dios atxix «ojtxi ex jaʼlo ex tuj tkyaqil tabʼqʼiyil te jumajx» (Judas 25).

Aqeju taqikʼ Tyol Dios lu in tzaj kyyekʼun qa «ate Dios Rey tuj tkyaqil tabʼqʼiyil», ik tzeʼn tqʼama apóstol Pablo (1 Timoteo 1:17). Toj juntl yol, kukx o ten, jniʼxku ambʼil jaku qo meltzʼaj toj ambʼil ojtxe. Ex kukx ktel (Apocalipsis 1:8). Mintiʼ ul itzʼji Dios ex mlay bʼaj, atzun jun tbʼanel tten Dios jlu.

¿Tiquʼn kwest in nela toj qwitz tuʼn tel qnikʼ tiʼj jlu? Tuʼnju noq chʼin ambʼil in qo anqʼin, junxitl tten ambʼil toj qximbʼetz twitz toj t-ximbʼetz Jehová. Jun techel, aju mil abʼqʼi toj qwitz, noq jun qʼij in nel toj twitz Jehová tuʼnju kukx o tzʼanqʼin te (2 Pedro 3:8). Qo ximen tiʼj techel lu: aju jun ẍplon, moqa ẍtʼiktuʼl (saltamonte) in nanqʼin 50 qʼij qa nim ambʼil sanqʼin. ¿Jakupe tzʼel tnikʼ tiʼj ambʼil aj qanqʼin 70 moqa 80 abʼqʼi? Mlaylo tzʼel tnikʼ tiʼj. Ikxtzun qtenju, quʼn in tzaj tqʼamaʼn Tyol Dios qa ik qten ik tzeʼn jun ẍplon qa ma kubʼ qmojbʼan qibʼ tukʼe aju Bʼinchal qe. Mintiʼx in kanun qnabʼil tiʼj te tnabʼil (Isaías 40:22; 55:8, 9). Tuʼntzunju, at junjun tichaq tiʼj Dios mintiʼ in nel qnikʼ tiʼj.

Aju xnaqʼtzbʼil qa mintiʼ bʼajsbʼilte Dios kwest jaku tzʼela toj qwitz, noqtzun tuʼnj, jaku tzʼelx chʼin qnikʼ tiʼj qa ma qo ok ten ximel tiʼj jlu. Noqwit at jun xjal kubʼ bʼinchante Dios, alo xjal lu Bʼinchal tkyaqil. Noqtzun tuʼnj, in tzaj tqʼamaʼn Tyol Dios qa a Jehová «bʼinchante tkyaqil» (Apocalipsis 4:11). Ax ikx ojtzqiʼn quʼn qa ten Dios jun ambʼil atz jatumel mintiʼtoq kyaʼj ex Txʼotxʼ (Génesis 1:1, 2). Ya attoqtl Bʼinchal Txʼotxʼ ex kyaʼj atxix ojtxe, noqwit nya ikju, ¿alkyewtlo tten ul kyaʼj ex Txʼotxʼ? Ex ya attoqtl tej naʼmxtoq tkubʼ bʼinchaʼn alkyexku juntl at tnabʼl, ik tzeʼn oʼkxku jun Tkʼwaʼl Dios ex qe anjel (Job 38:4, 7; Colosenses 1:15). Tuʼn jlu in nelxix qnikʼ tiʼj qa ten Dios tjunalx tej naʼmxtoq tok ten bʼinchal tkyaqil. Mintiʼx jun kubʼ bʼinchante Dios tuʼnju mintiʼx juntl xjal ten nix juntl tiʼ ten tej tten Dios tjunalx.

Axju qchwinqlal ex tkyaqilju at twitz kyaʼj ex twitz Txʼotxʼ in tzaj tyekʼun qa at jun Dios aju mintiʼ in kyim. Aju Bʼinchal tkyaqilju at twitz kyaʼj ex aju kubʼ tqʼoʼn ipumalj kyiʼj jlu tuʼn kukx kyyukchi toj tumel kukx o ten te jumajx. Oʼkx te bʼant tuʼn, tuʼn t-xi tqʼoʼn kychwinqlal qeju txqantl itzʼqe ex in che anqʼin (Job 33:4).