1, 2. ¿Tiʼ xi tqʼamaʼn Jehová te Moisés tuʼn tbʼant tuʼn, ex tiʼ xi ttziyen te?

XIMINXA qa ma txiʼya twitz ajkawil mas nim toklen twitz tkyaqil Txʼotxʼ tuʼn tyolina te t-xel ttnam Jehová. ¿Tiʼ teya jaku tnaʼ? Jakulo tzaj salin tiʼja, jakule tzaj xobʼa ex jakule tnaʼya qa mlay bʼant tyolina. ¿Alkye tten jaku kubʼ tbʼinchaʼn ttena tuʼn tbʼant tyolina toj tumel? ¿Tiʼ jaku bʼant tuʼna tuʼn t-xi tqʼoʼna tipumal yol kxel tqʼamaʼna tuʼnju ma txi samaʼna tuʼn Dios nimxix tipumal?

² Ik bʼaj tiʼj Moisés ik tzeʼnj jlu. Xi tqʼamaʼn Jehová te Moisés, aju xjal «mas mans kywitz mastl xjal twitz txʼotxʼ», tuʼn t-xiʼ twitz Faraón tuʼn kyetz ttzaqpiʼn ttnam Dios tjaqʼ kykawbʼil aj Egipto (Núm. 12:3). Nya bʼaʼn xjal te Faraón ex in jaw tnimsan tibʼ (Éx. 5:1, 2). Noqtzun tuʼnj, tajtoq Jehová tuʼn t-xi tqʼamaʼn Moisés te Faraón tuʼn kyetz ttzaqpiʼn nim millón aj Israel aʼyeju majenqetoq toj tnam Egipto. Tuʼntzunju, in nel qnikʼ tiquʼn xi tqʼanin Moisés jlu te Jehová: «¿Ti woklene tuʼn nxiʼye twitz Faraón ex tuʼn kyetz wiʼne aj Israel tuj Ejipt?». Tnaʼ Moisés qa mlaytoq bʼant tuʼn tyolin tukʼe Faraón. Noqtzun tuʼnj, xi ttziyen Jehová te qa nyatoq tjunal ktel. Xi tqʼamaʼn jlu te: «Txiʼya, porque chin tele tukʼila» (Éx. 3:9-12).

3, 4. a) ¿Tiquʼn tzaj xobʼ Moisés? b) ¿Tiʼ jaku qnaʼ aju chʼixmi ik tten ik tzeʼn tnaʼ Moisés?

³ ¿Tiquʼn tzaj xobʼ Moisés? Tuʼnju kubʼ t-ximen qa mlaytoq  tzʼokx kʼamoʼn tuʼn Faraón ex qa mlaytoq kubʼ tbʼiʼn Faraón jun t-sanjel Jehová. Ax ikx tzaj xobʼ tuʼnju kubʼ t-ximen qa mlaytoq txi kynimen aj Israel qa a Jehová otoq jaw jyonte tuʼn kyetz qʼiʼn toj Egipto. Kyjuʼtzun xi tqʼamaʼn jlu te Jehová: «Yajtzun qa miʼn ẍinx kyniman, qa miʼn ẍinx kybʼiʼn, ex qa ma kyma kyjaʼ: Mintiʼ o kubʼ tyekʼun tibʼ Qman twitza, qa che chi» (Éx.3:15-18;4:1).

⁴ Mlaylo txiʼ teya yolil twitz jun ajkawil nim toklen. Noqtzun tuʼnj, ¿atpe maj kwest in nela toj twitza tuʼn tyolina tiʼj Dios ex tiʼj Tkawbʼil kye xjal, axpe ikx kye xjal ojtzqiʼn qe tuʼna? Aju xi ttzaqʼweʼn Jehová te Moisés ex aju bʼaj yajxitl in tzaj tyekʼun jun tbʼanel xnaqʼtzbʼil qe qkyaqilx.

5. a) ¿Tiʼ kubʼ tqʼoʼn Jehová toj tqʼabʼ Moisés? (Qʼoʼnka twitza tiʼj tnejel tilbʼilal.) b) ¿Alkye tten chʼiy qʼuqbʼil tkʼuʼj Moisés tuʼn jlu?

⁵ Tej t-xi tqʼamaʼn Moisés te Jehová tiquʼn in tzaj xobʼtoq, bʼaj xnaqʼtzaʼn tuʼn Jehová tuʼn tkubʼ tbʼinchaʼn tten. In tzaj tqʼamaʼn Tyol Dios jlu: «Tzajtzun tqanin Qman te: —¿Titzun qʼiʼn tuʼna tuj tqʼabʼa? Xi ttzaqʼweʼn Moisés: —Jun kyʼaqoʼch, chi Moisés. Tzaj tmaʼn Qman te kyjaʼ: —Xoʼnxa twitz txʼotxʼ. Xitzun t-xoʼn Moisés twitz txʼotxʼ, o chʼexpaj naj ex ok te jun lobʼaj. Atzunte Moisés, el oq tiʼj. Tzajtzun tmaʼn Qman te Moisés: —Nuqpinx tqʼabʼa, ex tzyuntza tjeʼ, chi Dios. Xi tnuqpiʼn Moisés tqʼabʼ ex tzaj ttzyuʼn; o chʼexpaj naj, ex oktl te kyʼaqoʼch tuj tqʼabʼ. Tzaj tmaʼn Qman te kyjaʼ: —Tuʼntzun jlu kʼokex kyniman qa ax tok o kubʼ nyekʼun wibʼe twitza, aqine Dios» (Éx. 4:2-5). Tuʼn tipumal Dios ok jun kyʼaqoʼch, moqa jun tzeʼ, te jun kan. Tukʼe jlu kubʼ tyekʼun Jehová qa a otoq tzaj samante Moisés ex qa a otoq txi qʼonte toklen. Xi tqʼamaʼn Jehová jlu te Moisés: «Qʼinxa aju kyʼaqoʼch lu, porque tuʼntzun jlu che bʼantel qe techal tuʼna, chi Dios» (Éx. 4:17). Tukʼe onbʼil xi qʼoʼn toj tqʼabʼ Moisés, ten qʼuqbʼil tkʼuʼj tuʼn tbʼant tyolin twitz Faraón te t-xel ttnam Dios (Éx. 4:29-31; 7:8-13).

6. a) ¿Tiʼ il tiʼj tuʼn tten toj qqʼabʼ aj qpakbʼan, ex tiquʼn? b) ¿Tiquʼn tqʼama apóstol Pablo qa «aju tyol Dios itzʼte ex at tipumal»?

⁶ Aj qxiʼ qʼamal Tyol Dios kye xjal, jaku tzaj qanin lu qe: «¿Titzun qʼiʼn tuʼna tuj tqʼabʼa?». Chʼixmi tkyaqil maj iqʼin Tyol Dios quʼn toj qqʼabʼ ex ya bʼantnitl qten tuʼn tajbʼen quʼn. Ax tok at junjun xjal in kubʼ kyximen qa aju Tuʼjil Tyol Dios naq jun uʼjxi, noqtzun tuʼnj, nya ik ttenju, quʼn a jlu Tyol Jehová o kubʼ tzʼibʼen, aju in najbʼen tuʼn, tuʼn ttzaj yolin qe (2 Ped. 1:21). Toj Xjan Uʼj lu ateʼkux tkyaqilju o tzaj ttziyen Jehová tiʼjju kbʼantel tuʼn Tkawbʼil. Kyjuʼtzun kubʼ ttzʼibʼen apóstol Pablo jlu: «Aju tyol Dios itzʼte ex at tipumal» (kjawil uʼjit Hebreos 4:12). ¿Tiquʼn tzaj tqʼamaʼn qa «aju tyol Dios itzʼte»? Tuʼnju tkyaqilju in tzaj ttziyen Jehová in japun twiʼ, ex a Jehová in nbʼinchante tuʼn tjapun twiʼ (Is. 46:10; 55:11). Qa ma tzʼel tnikʼ jun xjal tiʼj jlu, aju in kux tuʼjin toj Tyol Dios in ten «tipumal» toj tanqʼibʼil.

7. ¿Tzeʼn jaku t-xi qpakbʼaʼn «ju yol axix tok tujxix tumel»?

⁷ Ikju, o kubʼ tqʼoʼn Jehová Tyol toj qqʼabʼ, aju Xjan Uʼj. Tukʼe jlu jaku kubʼ qyekʼun qa aju tqanil in xi qiʼn axix tok ex qa atz tzajni tukʼil Jehová. Tuʼntzunju, mintiʼ in netz qwitz tiʼj tiquʼn, tej otoqxi t-xi ttzʼibʼen apóstol Pablo uʼj kye aj Hebreo, xi tqʼoʼn nabʼl lu te Timoteo: «Tuʼn t-xi tpakbʼaʼna ju yol axix tok tujxix tumel» (2 Tim. 2:15). Ax ikx qe, ¿tzeʼn jaku japun nabʼl lu quʼn? Ok kjapunel quʼn qa ma che jaw qjyoʼnxix junjun taqikʼ Tyol Dios che xel quʼjin kye xjal, tuʼntzun tkuʼpin tiʼj kyanmi xjal. Aʼyeju tal uʼj i etz toj 2013 o che bʼaj bʼinchaʼn tuʼn tbʼant jlu quʼn.

8. ¿Tiʼ tzaj tqʼamaʼn jun ansyan qʼil twitz aqʼuntl toj pakbʼabʼil kyiʼj akʼaj tal uʼj?

⁸ Kykyaqil akʼaj tal uʼj junx bʼinchabʼin kye, tuʼntzunju, qa ma tzʼel qnikʼ alkye tten tuʼn tajbʼen jun quʼn, ok kʼelel qnikʼ alkye tten tuʼn kyajbʼen kykyaqil tal uʼj. At jun ansyan qʼil twitz aqʼuntl toj pakbʼabʼil te Hawái (Estados Unidos) tzaj ttzʼibʼen jlu: «Mintiʼ ul toj qximbʼetze qa tbʼanel qexix tal uʼj lu aj qpakbʼan kyojele kyja xjal ex jatumel in che bʼet xjal, tbʼanelxix qe». ¿Tiquʼn tbʼanelxix qe ex nya kwest tuʼn kyajbʼen? O tzʼel tnikʼ ermano lu qa aju bʼinchabʼin kye tal uʼj lu in nonin kyiʼj xjal tuʼn ttzaj naj kytzaqʼweʼn xjel, ex in nonin tuʼn t-xi tzyet tuʼn qyolin kyukʼe. In tzaj tqʼamaʼn ermano lu qa tbʼanel qe tal uʼj lu tuʼnju xjel tok tiʼj tnejel t-xaq ex tuʼnju at nim tumel tuʼn t-xi tzaqʼwet, quʼn iktzun tten mintiʼ in tzaj bʼaj tkʼuʼj xjal tiʼj qa nya bʼaʼn ttzaqʼwebʼil.

9, 10. a) ¿Tzeʼn in qo tzaj kyonin tal uʼj tuʼn tajbʼen Tyol Dios quʼn? b) ¿Alkyeqe tal uʼj mas o che ajbʼen tuʼna, ex tiquʼn?

⁹ Teyele junjun tal uʼj in tzaj tyekʼun tuʼn t-xi quʼjin jun taqikʼ Tyol Dios aju o jawxix jyoʼn. Jun techel, aju tal uʼj ¿Kpolpetzele jun qʼij jatumel miʼn tzajtl yajbʼil qiʼj? Noq alkyexku tzaqʼwebʼil xjaw tjyoʼn xjal, qa aju «ok», «miʼn» moqa aju «oklo», jaku txiʼya toj juntl t-xaq tal uʼj lu ex oʼkx jaku txi tqʼamaʼna jlu: «A jlu in tzaj tqʼamaʼn Tyol Dios». Ex jaku txi tuʼjina Apocalipsis 21:3, 4.

¹⁰ Ax ikx aj tajbʼen quʼn aju tal uʼj ¿Tiʼ teya t-xim tiʼj Xjan Uʼj?, noq alkyexku kyxol qeju oxe tzaqʼwebʼil saj ttzaqʼweʼn xjal, oʼkx jaku t-xi tqʼamaʼna jlu te: «In tzaj tqʼamaʼn Tyol Dios qa tkyaqilju tqanil tzʼibʼan toj ‹a Dios o qʼmante›». Ex jaku txi tqʼamaʼna: «Aju taqikʼ Tyol Dios lu in tzaj tqʼamaʼn mastl tqanil». Ex jaku jaw tjaqoʼna Tyol Dios ex uʼjinxa 2 Timoteo 3:16, 17.

11, 12. a) ¿Tiʼ tzul tqʼoʼn tzalajbʼil teya toj pakbʼabʼil? b) ¿Alkye tten jaku che onin tal uʼj tiʼja tuʼn tmeltzʼaja yolil tiʼj Tyol Dios kyukʼe xjal?

¹¹ Aju tzul tqʼamaʼn xjal, tzul tyekʼun qa jaku txi uʼjit ex qa jaku kubʼ xnaqʼtzet chʼintl tqanil tkuʼx toj tal uʼj. Noq tiʼxku xbʼaj, ok ktzalajela qa ma txi tqʼoʼna tal uʼj te xjal ex qa ma txi tuʼjina jun taqikʼ Tyol Dios, maske noq jun moqa kabʼe versículo toj tnejel maj. Toj juntl maj jaku meltzʼaja tuʼn kukx kyyoline tiʼj jlu.

¹² Kyoj mankbʼil, moqa kyoj bʼajsbʼil,  kyxaq tal uʼj lu tkubʼ jun txol yol aju in tqʼamaʼn: «Ximana tiʼj jlu». Tjaqʼ txol yol lu tkubʼ junjun xjel ex junjun taqikʼ Tyol Dios aju jaku tzʼajbʼen tuʼna aj tmeltzʼaja yolil tukʼe xjal. Ik tzeʼn toj tal uʼj ¿Tiʼ teya t-xim tiʼj ambʼil tzul? at xjel lu: «¿Alkye tten che tel xjal toj tbʼanel tuʼn Dios?», ex tkubʼ Mateo 6:9, 10 ex Daniel 2:44. Atzunte tal uʼj ¿Jakupe che jaw anqʼin juntl maj kyimni?, tkubʼ aju xjel: «¿Tiquʼn in qo tijen ex in qo kyim?», ex tkubʼ Génesis 3:17-19 ex Romanos 5:12.

13. ¿Tzeʼn jaku che ajbʼen tal uʼj quʼn tuʼn t-xi tzyet mastl xnaqʼtzbʼil tiʼj Tyol Dios?

¹³ Jaku che ajbʼen qe tal uʼj tuʼna tuʼn t-xi tzyet xnaqʼtzbʼil tiʼj Tyol Dios kyukʼil xjal. Toj mankbʼil t-xaq tkubʼ jun Código QR. * Aj tkubʼ escanearit código lu toj junjun yolbʼil, in qo okx tiʼn toj qtembʼil te Internet atz jatumel in tzaj yekʼun jun video aju in txoken tiʼj xjal tuʼn t-xnaqʼtzan tiʼj Tyol Dios. Ax ikx aʼyeju tal uʼj lu in tzaj tqʼamaʼn tuʼn tkubʼ xnaqʼtzet junjun xnaqʼtzbʼil toj uʼj Tbʼanel tqanil tzajni tukʼil Dios. Jun techel tiʼj jlu aju tal uʼj ¿Alkyexix in kawin kyibʼaj xjal twitz Txʼotxʼ? in tzaj tqʼamaʼn tuʼn tkubʼ uʼjit xnaqʼtzbʼil 5, ex aju tal uʼj ¿Tiʼ il tiʼj tuʼn tten qe tuʼn qtzalaj kyukʼe toj qja? in tzaj tqʼamaʼn tuʼn qxiʼ toj xnaqʼtzbʼil 9. Qa ma che ajbʼen tal uʼj quʼn ik tzeʼn in tzaj qʼamaʼn qe, ok kbʼantel tuʼn tajbʼen Tyol Dios quʼn aj qyolin kyukʼe xjal toj tnejel maj ex aj qmeltzʼaj kyukʼil. Ex a jlu jaku tzʼonin qiʼj tuʼn t-xi tzyet mastl xnaqʼtzbʼil tiʼj Tyol Dios. ¿Tiʼ mastl jaku tzʼonin tiʼja tuʼn tajbʼen Tyol Dios tuʼna toj tumelxix aj tpakbʼana?

14, 15. ¿Alkye tten jaku tzʼel qkanoʼn tmod apóstol Pablo aj qex pakbʼal?

¹⁴ Tej tpakbʼan apóstol Pablo, ok tilil tuʼn tuʼn tel tnikʼ tiʼjju in nikʼ kyiʼj «nimku xjal» (kjawil uʼjit 1 Corintios 9:19-23). ¿Tiquʼn? Ax tzaj tzaqʼwente tej tkubʼ ttzʼibʼen jlu: «Tuʼn nkambʼanteye qe xjal judiy; [...] qeju ateʼ tjaqʼ tley» Moisés, «qeju mintiʼ tley Moisés kyukʼil» ex «qeju mintiʼ kyipun». Tajbʼiltoq apóstol Pablo tuʼn tok «te tkyaqil [...] kyxol kykyaqil xjal, tuʼntzun kyklet junjun» toj nimku tumel (Hech. 20:21). ¿Alkye tten jaku tzʼel qkanoʼn tmod apóstol Pablo aj tkubʼ qbʼinchaʼn qten tuʼn qex pakbʼal Tyol Dios kye «kykyaqil xjal»? (1 Tim. 2:3, 4.)

¹⁵ Tkyaqil xjaw in netz junjun nabʼl toj uʼj Aju Taqʼun Dios in Bʼant Quʼn tiʼj tzeʼn jaku qo pakbʼan. Ex jaku che ajbʼen tuʼna. ¿Yajtzun qa junxitl xnaqʼtzbʼil kyaj xjal tuʼn tel kynikʼ tiʼj atz jatumel in pakbʼana? Qa ikju, bʼaʼn tuʼn t-ximana tiʼj alkye jun xnaqʼtzbʼil tbʼanel kʼelel toj kywitz. Bʼaʼn tuʼn t-ximana tiʼj jlu: «¿Tiʼ in nikʼ kyiʼj xjal atz jatumel chin pakbʼale? ¿Alqiʼj mas in tzaj bʼaj kykʼuʼj?». Aj tbʼant jlu tuʼna, jaku ximana tiʼj jun taqikʼ Tyol Dios jaku tzʼonin kyiʼj. At jun ansyan in bʼet kyojele Ja te Chmabʼil in tzaj tqʼamaʼn aju in bʼant tuʼn tukʼe t-xuʼjil tuʼn tajbʼen Tyol Dios kyuʼn: «Chʼimxi kykyaqil xjal in tzaj kyqʼoʼn ambʼil tuʼn t-xi quʼjin jun versículo qa naq chʼin ambʼil sajbʼen ex qa bʼiʼx xi qqʼamaʼn kye tiʼ qaj tuʼn t-xi qqʼamaʼn kye. Aj kybʼaj qqʼolbʼeʼne, ex ya otoq jaw qjaqoʼne Tyol Dios, in xi quʼjine jun taqikʼ Tyol Dios kye». Qo xnaqʼtzan tiʼj junjun xnaqʼtzbʼil, junjun xjel, ex junjun taqikʼ Tyol Dios aju o tzʼonin toj pakbʼabʼil. Bʼaʼn tuʼn kyajbʼen tuʼna.

16. ¿Alkye tten jaku tzʼajbʼen Isaías 14:7 quʼn toj pakbʼabʼil?

¹⁶ Qa najliya atz jatumel at nim bʼiybʼel ex nim nya bʼaʼn, jaku txi tqʼamaʼna jlu: «¿Kpolpetzulo jun qʼij jatumel kykyaqil periódico tzul kyqʼoʼn tqanil qa tkyaqil twitz Txʼotxʼ at toj mujbʼabʼil, mintiʼtl nya bʼaʼn toj, ex kykyaqil xjal in che tzalaj? Atzun jlu in tqʼamaʼn Tyol Dios toj Isaías  14:7. Axpe ikx, in tzaj ttziyen Tyol Dios qa ok kpol ambʼil jatumel qo tel toj mujbʼabʼil». Ex yajxitl jaku txi tuʼjina jun taqikʼ Tyol Dios jatumel in tzaj ttziyen Dios jlu.

17. ¿Tzeʼn jaku tzʼajbʼen Mateo 5:3 aj qyolin tukʼe jun xjal tiʼj Tyol Dios?

¹⁷ ¿Najliya jatumel kwest tuʼn tkambʼet pwaq tuʼn qanqʼin? Qa ikju, jaku txi tqanina jlu kye xjal: «¿Jteʼtzulo pwaq il tiʼj tuʼn tkambʼet tuʼn jun xjal tuʼn ttzalaj junx kyukʼe toj tja?». Aj ttzaj ttzaqʼweʼn xjal, qʼamanxa jlu te: «At junjun xjal mas twitz jlu in kambʼet kyuʼn, noqtzun tuʼnj, kukx mintiʼ in che tzalaj kyukʼe toj kyja. Tuʼntzunju, ¿tiʼxix il tiʼj tuʼn tten qe tuʼn qtzalaj?». Jakutzun t-xi tuʼjina Mateo 5:3 ex jaku txi tqʼamaʼna qa jaku txi tqʼoʼna jun xnaqʼtzbʼil te.

18. ¿Tzeʼn jaku tzʼajbʼen Jeremías 29:11 tuʼn tok qqʼuqbʼaʼn kykʼuʼj xjal?

¹⁸ ¿Tzma in nikʼ jun nya bʼaʼn atz jatumel najliya? Qa ikju, jaku txi tqʼamaʼna jlu: «Ma chin ule tjaya tuʼn t-xi nqʼamaʼne junjun yol teya aju jaku tzʼok tqʼuqbʼaʼn tkʼuʼja [uʼjinxa Jeremías 29:11]. ¿Ma txi tbʼiʼna tzeʼn tajbʼil Dios tuʼn ttena? Taj tuʼn ttena ‹bʼaʼn› ex tuʼn tten qʼuqbʼil tkʼuʼja. In qo tzalaj tuʼnju taj Dios tuʼn qtzalaj. Noqtzun tuʼnj, ¿jakutzulo bʼant tuʼn qtzalaj?». Jaku txi tyekʼuna jun xnaqʼtzbʼil tkuʼx toj uʼj Tbʼanel tqanil aju in yolin tiʼj jlu.

19. ¿Alkye tten jaku tzʼajbʼen Apocalipsis 14:6, 7 quʼn aj qyolin kyukʼe xjal at kyokslabʼil?

¹⁹ Qa najliya atz jatumel at kyokslabʼil xjal, jaku txi tqʼamaʼna jlu: «Noqwit tzul jun anjel yolil tukʼila, ¿jakutzulo txi tbʼiʼna? [Uʼjinxa Apocalipsis 14:6, 7.] In tzaj tqʼamaʼn anjel lu tuʼn qnimen te Dios, noqtzun tuʼnj, ¿alkye Dios in yolin tiʼj tzalu? Ax anjel in tzaj onin qe aj ttzaj tqʼamaʼn qa aju ‹bʼinchal kyaʼj, tukʼix txʼotxʼ›. ¿Alkyetzulo xjal lu?». Jaku txi tuʼjina Jeremías 33:2 aju in tzaj tqʼamaʼn: «Aqine Dios aju bʼinchalte txʼotxʼ, bʼaj nbʼinchaʼne ex kubʼ nqʼoʼne tujxix tlugaril, aqine Jehová nbʼiye». Ex jaku txi tchikʼbʼaʼna chʼintl tqanil tiʼj Qman Jehová.

20. a) ¿Tzeʼn jaku tzʼajbʼen Proverbios 30:4 tuʼn t-xi qyekʼun tbʼi Dios te jun xjal? b) ¿Atpe jun versículo mas o tzʼoninxix tiʼja toj pakbʼabʼil?

²⁰ Jaku txi tzyet tuʼn tyolina tukʼe jun kuʼxin kyjalu: «Wajbʼile tuʼn t-xi wuʼjine jun taqikʼ Tyol Dios teya aju nim toklen [uʼjinxa Proverbios 30:4]. ¿Alqiʼj in yolin jlu? Nyatz in yolin tiʼj jun xjal, sino tiʼj aju Bʼinchal qe. * ¿Tzeʼn jaku tzʼel qnikʼ tiʼj tbʼi? Waje tuʼn t-xi nyekʼune teya toj Tyol Dios».

21, 22. a) ¿Alkye tten jaku tzʼonin jun taqikʼ Tyol Dios o jaw jyoʼnxix tuʼn tchʼexpaj tanqʼibʼil jun xjal? b) ¿Tiʼ teya kbʼantel tuʼn toj pakbʼabʼil?

²¹ Mintiʼ ojtzqiʼn quʼn alkye tten jaku tzʼonin jun taqikʼ Tyol Dios tiʼj jun xjal aju o jaw jyoʼnxix. Jun techel, at kabʼe xuʼj testigos de Jehová te Australia e pon pakbʼal te jun xuʼj. Jun kye kyxol xi tqʼanin jlu te xuʼj: «¿Ojtzqiʼn tuʼna alkye tbʼi Dios?». Ex xi tuʼjin Salmo 83:18 te. Tqʼama xuʼj jlu: «¡Ya mintiʼtl bʼant nyoline! Tej kyikʼ bʼet, xi wiʼne nkaroye tuʼn nxiʼye toj jun kʼaybʼil Tyol Dios aju at tzmax 56 kilómetros tiʼj njaye. Kux njyoʼne tbʼi Dios kyoj junjuntl Tyol Dios ex toj jun pujbʼil yol. Tej tel nnikʼe tiʼj qa Jehová tbʼi Dios, in nximane tiʼj alkyeqe junjuntl tiʼchaq mintiʼ ojtzqiʼn wuʼne». Tej tbʼet chʼintl ambʼil, ok ten xuʼj lu tukʼe aju kʼokeltoq te tchmil xnaqʼtzal tiʼj Tyol Dios, ex yajxitl, jaw aʼ kywiʼ, moqa e bʼyan.

²² In chʼexpaj kyanqʼibʼil qeju in che uʼjin tiʼj Tyol Dios ex in chʼiy qʼuqbʼil kykʼuʼj tiʼjju in tzaj ttziyen Jehová (kjawil uʼjit 1 Tesalonicenses 2:13). Aju in tzaj tqʼamaʼn Tyol Dios mas at tipumal twitz alkyexku jun qyol jaku txi qqʼamaʼn tuʼn tkuʼpin toj kyanmi xjal. Itzʼ taʼ Tyol Dios ex at nim tipumal. ¡Tzʼajbʼenx quʼn tkyaqil maj qa jaku bʼant!