Bʼaʼnpe bʼant tuʼn David tej tkubʼ t-ximen qa mlaytoq tzikʼ tnaʼl, moqa oktoq kʼokel xqʼuqin tuʼn Qman Dios? ¿Atpe tkʼuʼj tiʼja? At nim xjal kwest in nela toj kywitz tuʼn tkubʼ kyximen qa at tkʼuʼj Dios kyiʼj aju at nimxix tipumal. ¿Tiquʼn?

Tnejel, tuʼnju in kubʼ kyximen qa nimxix te Dios toklen ex mlayx che kanin xjal tiʼj. Nimxix toklen Dios tuʼnju aj ttzaj tqʼoʼn twitz kyiʼj kykyaqil tnam ik in che el toj twitz «ik tzaʼn jun txut aʼ, nneʼl txutpaj tiʼj tkubʼil, ex ik kyten ik tzaʼn chʼin tpujil txʼotxʼ in kyaj ten tuj bʼalans» (Isaías 40:15). Axpe ikx at jun xjal ajtzʼibʼil ex mintiʼ in nokslan tiʼj Dios tzaj tqʼamaʼn jlu: «Nimxix in jaw qnimsan qibʼ qa in kubʼ qximen qa at jun Dios aju in ximen qiʼj ex at tkʼuʼj tiʼjju in bʼant quʼn».

Tkabʼ, tuʼnju at junjun in kynaʼn qa mintiʼ in tzaj tqʼoʼn Dios twiʼ kyiʼj tuʼnju at junjun nya bʼaʼn o kubʼ kybʼinchaʼn. Jun techel, at jun xjal Jim tbʼi tqʼama jlu: «Tkyaqil ambʼil in chin naʼntoqe Dios tuʼn tten mujbʼabʼil toj wanmiye ex tuʼn njakʼunte wibʼe, noqtzun tuʼnj, kukx tzaj nqʼoje jun maj ex juntl maj, tuʼntzunju, kubʼ nximane qa nya bʼaʼn taʼ wanmiye ex mlayx bʼant tuʼn ntzaj onine tuʼn Dios».

¿Najchaqxixpe taʼ Dios kyiʼj xjal tuʼn ttzaj tqʼoʼn twiʼ kyiʼj? ¿Tiʼxixtzulo in tnaʼn kyiʼj xjal tuʼnju aj ilqe? Jaku kanet tzaqʼwebʼil quʼn tukʼe onbʼil tuʼn Dios. O tzaj tqʼoʼn Dios Tyol qe —aju Xjan Uʼj— ex in tzaj tqʼuqbʼaʼn qkʼuʼj aj ttzaj tqʼamaʼn qa at tkʼuʼj kyiʼj xjal ex qa nya najchaq, moqa nya laqʼche, taʼ tiʼj teyile te junjun qe. «Ax tok», chi Tyol Dios, «ate Dios mya najchaq taʼ ttxlaj junjun qe» (Hech. 17:27). Kyoj qeju kyaje xnaqʼtzbʼil che ul, ok qo xnaqʼtzal tiʼj qa ax tok at tkʼuʼj Dios tiʼj teyele te junjun qe ex tiʼj alkye tten o tzaj tyekʼun Dios qa at tkʼuʼj kyiʼj xjal ik tzeʼn teya.