¿TIQUʼN AT JUNJUN MINTIʼ IN NOK QEʼ KYKʼUʼJ TIʼJ? At jun xnaqʼtzbʼil etz kyuʼn xjal kʼitzqeku atz jatumel tzaj tyekʼun qa at nimxix millón (100,000,000,000) planeta toj qgalaxia. Aj qok ten ximel tiʼj jlu, in tzaj tyekʼun qa nimxix ex nimaqxix qeju planeta ateʼkx twitz kyaʼj. Tuʼntzunju, at nim xjal in kubʼ kyximen jlu: «At nimxix tipumal Dios, ¿tiquʼn tzul tqʼoʼn twitz kyiʼj qe tal xjal ateʼ toj jun tal Txʼotxʼ ik tzeʼnj qe tal Qtxʼotxʼ, moqa qplaneta?».

¿TIʼ IN TZAJ T-XNAQʼTZAʼN TYOL DIOS? Nya oʼkx o tzaj tqʼoʼn Dios Tuʼjil Tyol qe ex yajxitl tuʼn qel naj tiʼj tkʼuʼj. In tzaj ttziyen jlu: «Kxel nqʼoʼne consej bʼaʼn teya» (Salmo 32:8).

Ximana tiʼjju ikʼ tiʼj Agar, aju jun xuʼj anqʼin kyoj abʼqʼi tej atxtoq kabʼelo mil abʼqʼi tuʼn tul Jesús. Xi oq Agar najchaq toj tzqij txʼotxʼ tuʼnju ok ten Sarai, aju tpatrón Agar, bʼinchal nya bʼaʼn tiʼj. El txalpaj Agar, noqtzun tuʼnj, ¿tuʼntzulo jlu ya mintiʼ tzaj tqʼoʼntl Dios twitz tiʼj? In tzaj tqʼamaʼn Tyol Dios qa «ok noj aju t-anjel Qman tiʼj tuj tzqij txʼotxʼ» ex qa ok tqʼuqbʼaʼn tkʼuʼj tej t-xi tqʼamaʼn jlu te: «O tbʼi Qman aju yajbʼil teya», chi anjel te. Ex xi tqʼamaʼn Agar jlu te Jehová: «Aya Dios in chin tkeʼyin[a]» (Génesis 16:4-13).

Aju Dios in keʼyin, moqa in kaʼyin, ax ikx in xqʼuqin tiʼja. Jun techel, aju jun tbʼanel txubʼaj, in che ok tkeʼyin kykyaqil tal, noqtzun tuʼnj, mas in che ok t-xqʼuqin qeju mas tal chʼin kyabʼqʼi tuʼnju mas kyaj kʼujlabʼil ex mas kyaj tuʼn kyok xqʼuqin kyuʼn kytat. Ax ikxtzun qe, mas in qo ok t-xqʼuqin Qman Dios qa mintiʼxix qipun ex qa in qo bʼisen. In tzaj tqʼamaʼn Qman Jehová jlu: «Atzun najl qine tuj jun lugar najchaq tjaw ex xjan, pero ax ikx atine tukʼil ju xjal mans ex ma tzʼajtz tiʼj tanmi, ax ikx in xi nkyuwsaʼne tkʼuʼj ex in xi nqʼuqbʼaʼne tkʼuʼj» (Isaías 57:15).

Noqtzun tuʼnj, jakulo kubʼ t-ximanx teya jlu : «¿Tzeʼn in chin elaye toj twitz Dios? ¿Atzpe in tzaj tqʼoʼn twitz tiʼjju in kykeʼyin txqantl, moqa atz tiʼj wanmiye ex in nel tnikʼ wiʼje?».