1. ¿Tiʼju qajbʼil aqoʼ xjal, ex alkyeqe jaku che onin qiʼj?

AQOʼ xjal nimxix toklen toj qwitz tuʼn qten niqayin kytxlaj txqantl xjal. O tzʼel nikʼbʼaj tiʼj qa mas niqayin taʼ jun xjal ttxlaj juntl, qa at kykʼujlabʼil kyxol ex qa ojtzqiʼn kywitz. Qkyaqilx in qo tzalaj kyukʼil qe toj qja ex qe qamiw kyajbʼil qʼij, ex nim qoklen toj kywitz ex in qo kubʼ kybʼiʼn. Noqtzun tuʼnj, aju xjal qajbʼil tuʼn tten jun mas tbʼanelxix qamiwbʼel tukʼil aju Bʼinchal qe (Ecl. 12:1).

2. ¿Tiʼ in tzaj ttziyen Jehová qeʼ ex tiquʼn nim xjal mintiʼ in xi qe kykʼuʼj tiʼj jlu?

² In txokin Jehová qiʼj toj Xjan Uʼj tuʼn qpon laqʼeʼ ttxlaj ex in tzaj ttziyen qe qa ma bʼant jlu quʼn, ok «ktzajel laqʼeʼ» qtxlaj (Sant. 4:8). ¡Tbʼanelxix ximbʼetz lu! Noqtzun tuʼnj, nim xjal kwest tuʼn tok qʼuqeʼ kykʼuʼj qa tajbʼil Dios tuʼn ttzaj laqʼeʼ kytxlaj, tuʼnju in kubʼ kyximen qa mlay che ok laqʼeʼ ttxlaj Dios moqa in kubʼ kyximen qa najchaq taʼ kytxlaj. ¿Jakupetzulo tenxix jun qamiwbʼel niqayin tukʼil Jehová?

3. ¿Tiʼ bʼaʼn tuʼn tkubʼ qximen?

³ Bʼaʼn tuʼn tkubʼ qximen qa jaku qo ok laqʼeʼ ttxlaj Jehová tuʼnju in tqʼamaʼn qa «mya najchaq taʼ» kytxlaj qeju in che jyon tiʼj (kjawil uʼjit Hechos 17:26, 27 ex Salmo 145:18). Tajbʼil ju Qdios tuʼn qok laqʼeʼ ttxlaj ex tuʼn qok te tamiw, maske aj il qoʼ (Is. 41:8; 55:6). Iktzen ikʼ toj tanqʼibʼil jun aj bʼitzil aju kubʼ ttzʼibʼen  tiʼj Jehová: «Porque in tbʼiʼna aju qnaʼj Diose. Kykyaqil xjal in che ul tukʼila. At nim tzalajbʼil teju xjal in jaw t-skʼoʼna ex in pon tiʼna» (Sal. 65:2, 4). Atzun jaʼlo, qo xnaqʼtzal tiʼj jun techel tiʼj jun xjal ok laqʼeʼ ttxlaj Dios: aju ajkawil Asá. Ex qo ximen tiʼj aju in tzaj tqʼamaʼn Tyol Dios tiʼjju tnaʼ Jehová. *

4. ¿Alkye ju tbʼanil techil kubʼ tqʼoʼn ajkawil Asá kye qe xjal toj Judá?

⁴ Mintiʼ xi tqʼoʼn ajkawil Asá ambʼil tuʼn tbʼaj kytzʼilsaʼn xjal aju kʼulbʼil axix tok, el tiʼn ju mya bʼaʼn in kubʼ kybʼinchaʼn xjal toj tja Dios ik tzeʼn yaẍbʼil ex aju kʼulbʼil kywitz qe tilbʼilal, atzun kabʼe tiʼchaq jlu kubʼ kybʼinchaʼn xjal toj tkyaqil tnam (1 Rey. 15:9-13). Tuʼn tkyaqil tkʼuʼj bʼant jlu tuʼn: «Xi tmaʼn kye aj Judá tuʼn kyok lpeʼ tiʼj Qman aju Kydios qtzan kyxeʼchel, ex tuʼn kyjapun qe tley ex qe tmandamyent kyuʼn». Tzaj tkʼiwlaʼn Jehová qeju tnejel lajaj abʼqʼi tkawbʼil tukʼil mujbʼabʼil. Ojtzqintoq tuʼn Asá qa ten mujbʼabʼil jlu noq tuʼn Jehová. Kyjuʼtzun, xi tqʼamaʼn kye qe xjal najli toj Judá; «Ma qo niman te Qman aju Qdios ex bʼaʼn qten kyukʼil mastl nasyon» (2 Crón. 14:1-7). Kyoj qe xnaqʼtzbʼil tkubʼ kubʼni kʼelel qnikʼ tiʼ bʼaj.

5. ¿Tiʼ mya bʼaʼn tzaj aju ok tqʼuqbʼil tkʼuʼj Asá toj malbʼil tuʼn tiʼj Jehová, ex tiʼ bʼaj?

⁵ Qa ma kubʼ tqʼoʼn tibʼa te t-xel Asá. «At jun xjal aj Etiopía Zera tbʼi», tzaj qʼojlel kyiʼj aj Judá, ul jun millón soldad kyukʼix oxe syent karwaj in che ajbʼen toj qʼoj (2 Crón. 14:8-10). Atzun teya noq oʼkx at 580,000 soldad tukʼila. ¡Chʼixmi mas te kabʼe maj kyajlal qe! ¿Tiʼtzun jaku bʼant tuʼna? ¿Jaku kubʼ t-ximana tiquʼn ma tzaj tqʼoʼn Dios ambʼil te jlu? ¿Kʼokel qeʼ tkʼuʼja tiʼjxa, moqa kʼokel qeʼ tkʼuʼja tiʼj Jehová? Aju bʼant tuʼn Asá kubʼ tyekʼun qa at jun tbʼanil tamiwbʼil tukʼil Jehová ex qa ok qeʼ tkʼuʼj tiʼj. Xi tqanin jlu tuʼn tkyaqil tkʼuʼj: «Qo tonintza, porque tiʼja ma tzʼok qeʼ qkʼuʼje, ex tuʼn tipumala ma qo tzaje qʼojlel kyiʼj qe soldad lu. Nman, aya Qdiose, miʼn taqʼa ambʼil tuʼn tkubʼ tiʼja kyuʼn xjal». ¿Tzeʼn tzaj ttzaqʼweʼn Jehová aju tnaʼj Dios? «Tuʼn tipumal Dios kubʼ kyiʼj aj Etiopía tuʼn Asa.» ¡Kykyaqil qe ajqʼoj e bʼaj kyim toj qʼoj! (2 Crón. 14:11-13.)

6. ¿Tiʼ jaku tzʼel qkanoʼn tiʼj Asá?

⁶ ¿Tiquʼn xi qeʼxix tkʼuʼj Asá tiʼj Dios qa tzul onin tuʼn ex qa kʼonil tiʼj? Ik tzeʼn in tzaj tqʼamaʼn Tyol Dios, tuʼnju kubʼ tbʼinchaʼn Asá aju «bʼaʼn e ela tuj twitz Qman» ex kukx ajbʼen «te Qman tuʼn tkyaqil tanmi» (1 Rey. 15:11, 14). Ax ikx qe il tiʼj tuʼn qajbʼen te Jehová tuʼn tkyaqil qanmi. Nimxix toklen tuʼn tkubʼ qbʼinchaʼn jlu qa qajbʼil tuʼn tten jun tbʼanil qamiwbʼil tukʼil Jehová te jaʼlo ex toj ambʼil tzul. O kubʼ tqʼoʼn Jehová tnejel yekʼbʼil tuʼn qtzaj tonin tuʼn qpon laqʼeʼ ttxlaj. ¡Nimxix in xi qqʼoʼn chjonte te tiʼj jlu! Jaʼlo, qo xnaqʼtzal tiʼj alkye kabʼe tumel o qo tzaj tiʼn Jehová ttxlaj.

7. a) ¿Tiʼchaq o bʼant tuʼn Jehová tuʼn qpon laqʼeʼ ttxlaj? b) ¿Alkyexix in najbʼen tuʼn Jehová tuʼn qpon laqʼeʼ ttxlaj?

⁷ Kubʼ tyekʼun Jehová tkʼujlabʼil qiʼj tej tkubʼ tbʼinchaʼn Txʼotxʼ te tbʼanil. Ex tkyaqil qʼij in tzaj tyekʼun qa kʼujlaʼn qoʼ tuʼn tuʼnju itzʼ qoʼ (Hech. 17:28; Apoc. 4:11). Aju mas nim toklen in tzaj tqʼoʼn Jehová qe, aju onbʼil tiʼj Tyol (Luc. 12:42). Ax ikx in tzaj ttziyen qa in tzaj tbʼiʼn teyele te junjun tnaʼj Dios (1 Juan 5:14). Noqtzun tuʼnj, aju chojbʼil in najbʼenxix tuʼn Jehová tuʼn qpon laqʼeʼ ttxlaj, ex atzun yekʼbʼil nimxix toklen tiʼjju  tkʼujlabʼil at qiʼj (kjawil uʼjit 1 Juan 4:9, 10, 19). Tzaj t-samaʼn Jehová Tkʼwaʼl tzalu twitz txʼotxʼ tuʼntzun qetz tiʼn tjaqʼ il ex kyimen (Juan 3:16).

8, 9. ¿Tiʼ toklen Jesús at tuʼn kyjapen twiʼ t-ximbʼetz Jehová?

⁸ Ax ikx qe xjal e anqʼin tej naʼmxtoq tul Jesús ajbʼen chojbʼil tuʼn Jehová tuʼn kytzaj tkʼiwlaʼn. Atxix tej ttzaj ttziyen Jehová qa tuʼn tul jun Kolil kyiʼj xjal, ik ok jlu ik tzeʼn otoq tchjet ju chojbʼil tuʼn, tuʼnju ojtzqiʼnxixtoq tuʼn qa ok kjapunelxix twiʼ t-ximbʼetz (Gén. 3:15). Tej tikʼ nim abʼqʼi, xi tqʼoʼn apóstol Pablo chjonte te Dios «tuʼnju ma qo kolpet tuʼn Jesucrist». Ax ikx tqʼama jlu tiʼj Dios qa «mintiʼ kubʼ tqʼoʼn kykastiw xjal tuʼn tlaj kyil o kybʼincha ojtxe» (Rom. 3:21-26). Noq tuʼn Jesús, jaku qo pon laqʼeʼ ttxlaj Dios.

⁹ Noq oʼkx tuʼn tkyimlen Jesús jaku tzʼok ojtzqiʼn Jehová kyuʼn qe xjal mans ex jaku ten jun tbʼanil kyamiwbʼil tukʼil. ¿Tzeʼn in tzaj tyekʼunxix Tyol Dios jlu? Kubʼ ttzʼibʼin Pablo jlu: «In tzaj tyekʼun Dios qa at tkʼujlalil qiʼj, tuʼnju o kyim Crist te qxel tej aj ilxtoq qoʼ» (Rom. 5:6-8). Tzaj tqʼoʼn Jehová ex Jesús ju chojbʼil lu, nya tuʼnju otoq qoʼ kambʼan tiʼj, noq oʼkx tuʼnju kʼujlaʼn qoʼ kyuʼn. «Mlay tzul jun xjal wukʼile qa mya tuʼn nmane sul qʼin, aju tzaj samante weye», chi Jesús. Ex toj juntl maj tqʼama: «Mi aʼl jun xjal jaku pon tukʼil Dios Mambʼaj, qa mya wuʼne» (Juan 6:44; 14:6). Noqtzun tuʼnj, ¿tzeʼn in qo pon tiʼn Jehová ttxlaj noq tuʼn Jesús? In najbʼen ju xewbʼaj xjan tuʼn. Noq tuʼnju xewbʼaj xjan in qo pon tiʼn ttxlaj ex in qo tzaj tonin tuʼn kukx qten niqayin ttxlaj tuʼntzun qanqʼin te jumajx (kjawil uʼjit Judas 20, 21). Noqtzun tuʼnj, ok kʼelel qnikʼ tiʼj juntl tumel in najbʼen tuʼn Jehová tuʼn qpon tiʼn ttxlaj.

10. ¿Tzeʼn in qo tzaj tonin Xjan Uʼj tuʼn qok laqʼeʼ ttxlaj Dios?

¹⁰ Toj xnaqʼtzbʼil lu ma che ajbʼen versículo quʼn toj 14 uʼj tkuʼx toj Tyol Dios. Naqwit mintiʼ Tyol Dios, ¿tzeʼn jaku tzʼel qnikʼ tiʼj qa jaku qo pon laqʼeʼ ttxlaj Dios, aju Bʼinchal qe? ¿Tzeʼn jaku tzʼel qnikʼ tiʼj tiʼ t-xilen aju chojbʼil ex qa in qo pon tiʼn Jehová ttxlaj noq tuʼn Jesús? Ajbʼen xewbʼaj xjan tuʼn Jehová, tuʼn tkubʼ tzʼibʼet ju Xjan Uʼj, aju in tzaj qʼamante tzeʼn qe tmod Jehová at ex alkye qe t-ximbʼetz. Jun techel, toj Éxodo 34:6, 7 xi tqʼamaʼn Jehová te Moisés tzeʼn qe tmod at: «At nim tqʼaqʼbʼil nkʼuʼje, aqine nim in tzʼeʼy nkʼuʼje, yaj in tzaj ntxʼuʼjile, nim nkʼujlalile, ex axix tok chin yoline. At tqʼaqʼbʼil nkʼuʼje kyiʼj nimku kyiyjil xjal, ex in kubʼ nnajsaʼne kyil qeju in che bʼinchan mya bʼaʼn». ¿Alkye jun qe nya taj tuʼn t-xi laqʼeʼ ttxlaj jun xjal ikju? Ojtzqiʼn tuʼn Jehová qa mas xqo xnaqʼtzan tiʼj Tuʼjil Tyol, mas axix tok kʼelel toj qwitz ex mas kbʼel qnaʼn qa niqayin atoʼ ttxlaj.

11. ¿Tiquʼn kʼokil tilil quʼn tuʼn tkubʼ qxnaqʼtzan qe tmod Dios ex qe tbʼe? (Qʼoʼnka twitza tiʼj tnejel tilbʼilal.)

¹¹ Tuʼn tel chʼintl qnikʼ tiʼj tzeʼn tten jaku ten jun tbʼanil qamiwbʼil tukʼil Dios. Jaku kux qqʼoʼn qwitz tiʼj tqanil tkuʼx toj uʼj Acerquémonos a Jehová aju in tqʼamaʼn: «Tkyaqil amiwbʼil in tzaj qe tiʼjju ojtzqibʼil tiʼj jun xjal, aju at qe tbʼanil tmod ex nim kyoklen. Kyjuʼtzun, nim toklen tuʼn tkubʼ qxnaqʼtzan qe tmod ex qe tbʼe Dios, ik tzeʼn in tzaj tyekʼun Xjan Uʼj». Tzaj tqʼoʼn Jehová ambʼil tuʼn tkubʼ tzʼibʼin Tyol toj tumel tuʼntzun lwey tok toj qwiʼ. ¡Nimxix in xi qqʼoʼn chjonte te!

12. ¿Tiquʼn e ajbʼen qe xjal tuʼn Jehová tuʼn tkubʼ kytzʼibʼen Xjan Uʼj?

¹² Jakutoq che ajbʼen qe anjel tuʼn Jehová tuʼn tkubʼ kytzʼibʼin Xjan Uʼj, tuʼnju  ax ikx kye at kykʼuʼj qiʼj ex tiʼjju in kubʼ qbʼinchaʼn (1 Ped. 1:12). Noqwit aʼyeqe anjel e kubʼ tzʼibʼente tqanil tajbʼil Dios kye xjal mintiʼwtlo jun tpaltil kux kytzʼibʼen toj. Noqtzun tuʼnj, ¿Tenwtpetzulo kyximbʼetz ik tzeʼn te jun xjal? ¿Bʼantwitzulo ttzʼibet kyuʼn aju in tnaʼ jun xjal ex aju in nikʼ toj tanqʼibʼil? Mintiʼwtlo bʼant, ex ojtzqintoq jlu tuʼn Jehová. Tuʼntzunju, kubʼ t-ximen tuʼn tkubʼ kytzʼibʼin xjal aju Tuʼjil Tyol, iktzun tten bʼant tuʼn, tuʼn qnaʼnte aju tkuʼx toj Xjan Uʼj. Kyjuʼtzun, mya kwest in nok toj qwiʼ aju kubʼ kyximen ex tiʼ ikʼ toj kyanqʼibʼil qeju e kubʼ tzʼibʼinte Tyol Dios ex qe xjal e yolin tiʼj. Jaku tzeʼl qnikʼ tiʼjju nya bʼaʼn ela toj kywitz, tiquʼn jawje kykʼuʼj, tiquʼn e tzaj xobʼ, ex aju tej tkubʼ kybʼinchaʼn jun nya bʼaʼn, nya oʼkju, ax ikx jaku qo jaw tzalaj tiʼjju kytzalajbʼil ex tiʼjju e kambʼan tiʼj. Kykyaqil qe xjal e kubʼ tzʼibʼinte Tyol Dios ik kyten ik tzeʼn t-sanjel Dios Elías tbʼi, «ik ttzajlen ik tzaʼn qe», toj juntl yol, ik kynaʼ ik tzeʼn qe in qnaʼn jaʼlo (Sant. 5:17).

13. ¿Tiʼ in tnaʼna aj tjaw tuʼjina tnaʼj Dios Jonás?

¹³ Ximena tiʼjju tnaʼ Jonás, aju t-sanjel Dios, tej tel oq tiʼj toklen aju xi tqʼoʼn Dios te. ¿Jakupetzulo t-xi tqʼamaʼn jun anjel aju tnaʼ Jonás? Tuʼntzunju, mas bʼaʼn ax Jonás ajbʼen tuʼn Jehová tuʼn tkubʼ ttzʼibʼen aju ikʼ toj tanqʼibʼil. ¡Ex tbʼanil qe yol e jaw t-skʼoʼn! Jun techel, tej attoq max t-xe mar, tqʼama toj jun naʼj Dios «Tej nnaʼye chʼixtoq nkyime, ula tiʼj nkʼuʼje Nman» (Jon. 1:3, 10; 2:1-9).

14. ¿Tiquʼn jaku tzeʼl qnikʼ tiʼjju kubʼ ttzʼibʼin Isaías tiʼjx?

¹⁴ Ax ikx ximena tiʼjju kubʼ ttzʼibʼin Isaías. Tej tok tkeʼyin tipumal Dios in qoptzʼaj toj jun twitzikʼ, el tnikʼ tiʼj qa aj ilxix te ex tqʼama jlu: «Ay bʼekʼbʼil nwitze, chin kymele. Ma wile tuʼn nwitze aju Rey, aju Qman Tajaw Tkyaqil; atzun  weye xjal qine ex mi jun yol tuj tumel nneʼtz tuj ntziʼye, ex najl qine tuj jun tnam jatum mintiʼ jun xjal in yolin tuj tumel» (Is. 6:5). ¿Alkye jun anjel jaku kubʼ ttzʼibʼin qe yol lu? Kyjuʼtzun, atzun te Isaías bʼant ttzʼibʼijtz qe yol lu tuʼn, ax ikx qe tuʼnju aj il xjal qoʼ ik tzeʼn te, jaku tzeʼl qnikʼ tiʼjju tnaʼ.

15, 16. a) ¿Tiquʼn jaku tzʼelxix qnikʼ tiʼj aju in kynaʼn txqantl xjal? Naʼntza qe techel. b) ¿Tiʼ kʼonil qʼiʼj tuʼn qok laqʼeʼ mas ttxlaj Jehová?

¹⁵ ¿Jakupetzulo t-xi tqʼamaʼn jun anjel «mintiʼ woklene» ik tzeʼn tqʼama Jacob tiʼjx, moqa «aj il» ik tzeʼn te Pedro tnaʼ? (Gén. 32:10; Luc. 5:8.) ¿Jakupetzulo tzaj t-xobʼil jun anjel, ik tzeʼn qe t-xnaqʼtzbʼen Jesús? ¿Ilpetzulo tiʼj tuʼn tten kyipumal qe anjel tuʼn kypakbʼan tqanil bʼaʼn toj kʼixbʼisabʼil, ik tzeʼn bʼant tuʼn Pablo ex kyuʼn txqantl okslal? (Juan 6:19; 1 Tes. 2:2.) Mintiʼwtlo, tuʼnju mya xjal qe anjel ex tuʼnju tzʼaqli qe toj tkyaqil tten kyanqʼibʼil. Atzun qe, aj il xjal qoʼ. Kyjuʼtzun, aj ttzaj kyqʼamaʼn txqantl xjal aju in kynaʼn, lwey in nel qnikʼ kyiʼj. Aj tkubʼ quʼjin Tyol Dios, ax tok jaku qo tzalaj kyukʼil qe in che tzalaj ex jaku qo oqʼ kyukʼil qeju in che jaw oqʼ (Rom. 12:15).

¹⁶ Qa ma qo ximin tiʼjju in tzaj tqʼamaʼn Tyol Dios tiʼj tzeʼn tmod Jehová ten kyukʼil qeju tmajen e ajbʼenxix te ojtxi, ok kʼelel nimxix qnikʼ tiʼjju Qdios, aju tukʼil nim tkʼujlabʼil ex tpasens tzaj laqʼeʼ kytxlaj qe aj il xjal ojtxe. Qa ma bʼant jlu quʼn, ok kʼokel qojtzqiʼnxix Jehová wen ex kʼokel qkʼujlaʼn tuʼn tkyaqil qkʼuʼj. Ex tuʼn jlu, ok qnaʼ qa mas niqayin atoʼ ttxlaj (kjawil uʼjit Salmo 25:14).

17. a) ¿Tiʼ nabʼil xi tqʼoʼn Azarías te Asá? b) ¿Toj alkye ambʼil mintiʼ xi tbʼiʼn Asá aju nabʼil xi tqʼoʼn Azarías te, ex tiʼ tzaj tiʼj tuʼn jlu?

¹⁷ Tej otaqxi kambʼan ajkawil Asá kyiʼj qe soldad te tnam Etiopía, xi tqʼoʼn Azarías, aju t-sanjel Dios, jun tbʼanel nabʼil te ex kye xjal toj tnam: «Ate Qman at kyukʼile qa kukx ma che nimane te. Qa ma che qanine onbʼil te, che tzajel onine tuʼn, pero qa ma kyaj kykoline, ax ikx te, che kyjel koline tuʼn» (2 Crón. 15:1, 2). Noqtzun tuʼnj, bʼisbʼajilxix, tej tbʼet ambʼil ikʼ tnaʼl qe nabʼil lu tuʼn Asá. Tej tok tqʼoʼn twitz tiʼj qa chʼinxtoq tkubʼ tiʼj tuʼn ajkawil te Israel, aju tzajni kyiʼj 10 kʼloj kyiyjil aj Israel te jawni, xiʼ qanil onbʼil te tnam Siria. Mintiʼ xi tqanin juntl maj onbʼil te Jehová, sino ok tmujbʼan tibʼ tukʼil ju tnam Siria aju mintiʼtoq in najbʼen te Jehová. Tuʼntzun jlu, xi tqʼamaʼn Dios jlu te: «Atzun teya mintiʼ tnabʼla tuʼnju ma tbʼinchaya jlu. Kyjaʼtzun texju jaʼlo kukx kʼokel mastl qʼoj tukʼila» (2 Crón. 16:1-9). ¿Tiʼ in tzaj tyekʼun jlu qe?

18, 19. a) ¿Tiʼ kbʼantel quʼn qa ma qo el laqʼeʼ chʼin ttxlaj Jehová? b) ¿Tzeʼn jaku qo ok laqʼeʼ ttxlaj Jehová?

¹⁸ Miʼn t-xi qqʼoʼn ambʼil tuʼn tel qpan qibʼ tiʼj Jehová. Qa o tzʼel qpan chʼin qibʼ tiʼj, bʼaʼn tuʼn t-xi qnimin ju kawbʼil tqʼama Oseas 12:6: «Kyajtz meltzʼaje tukʼil Dios aju jaw skʼonte kyeye, ten kykʼujlalile ex kybʼinchame aju tzʼaqlxix, ex kukx qeʼk kykʼuʼje tiʼj Dios». Kukx qo laqeʼx ttxlaj Jehová aj qximen tukʼil nim kʼujlabʼil tiʼjju chojbʼil ex qqʼoʼnk tilil tuʼn tkubʼ qẍchʼiʼn Tyol Dios, a jlu kʼonil qiʼj tuʼn kukx qok laqʼeʼ mas ttxlaj Jehová (kjawil uʼjit Deuteronomio 13:4).

¹⁹ Jun ajbʼitzel kubʼ ttzʼibʼen jlu: «Atzun weye chin xel laqʼeʼye ttxlaj Dios, porque atzun mas bʼaʼn te weye» (Sal. 73:28). Tuʼntzunju, kukx qo xnaqʼtzan mas tiʼj Jehová. Iktzun tten, kʼelel mastl qnikʼ tiquʼn kʼokel qkʼujlaʼn. ¡Qa ma qo ok laqʼeʼ ttxlaj, ax ikx te tzul laqʼeʼ qtxlaj toj ambʼil jaʼlo ex te jumajx!