¿TIQUʼN AT JUNJUN MINTIʼ IN NOK QEʼ KYKʼUʼJ TIʼJ? At nim xjal kyajxix wen tuʼn ttzaj qʼuqbʼaʼn kykʼuʼj, noqtzun tuʼnj, in kubʼ kyximen qa nya bʼaʼn tuʼn t-xi kyqanin onbʼil te Dios tuʼn kyex twitz nya bʼaʼn. At jun xuʼj Raquel tbʼi, tqʼama jlu: «Aj nximane tiʼj nimxix kyajlal xjal twitz tkyaqil Txʼotxʼ aʼyeju mas nimxix nya bʼaʼn in tzaj kyiʼj, mas tal chʼintl toklen nya bʼaʼn in tzaj wiʼje toj nwitze, ex tuʼntzun jlu, ya mintiʼtl in xi nqanine onbʼil te Dios».

¿TIʼ IN TZAJ T-XNAQʼTZAʼN TYOL DIOS? O bʼant jun tiʼ nimxix toklen tuʼn Dios tuʼn tonin ex tuʼn ttzaj tqʼuqbʼaʼn kykʼuʼj xjal. Qkyaqilx o qo ul itzʼji tukʼe il, aju ik tten ik tzeʼn jun yabʼil mintiʼ qʼanbʼil te. Tuʼntzunju, mintiʼ in che japun tkyaqil tkawbʼil Dios quʼn. Noqtzun tuʼnj, «ate Dios ma qo tkʼujla ex tzaj t-samaʼn aju Tkʼwaʼl tuʼn tok te chojbʼil qil» (1 Juan 4:10). Tuʼnju ok Jesús te chojbʼil, in tzaj tqʼoʼn Dios ambʼil qe tuʼn tkubʼ tnajsaʼn qil, tuʼn tten jun qnabʼil bʼaʼn, ex tuʼn qanqʼin te jumajx toj jun Txʼotxʼ jatumel at mujbʼabʼil. * Noqtzun tuʼnj, aju chojbʼil tzaj tqʼoʼn Dios, ¿noq jun yekʼbʼil jlu tiʼj tkʼuʼj Dios at kyiʼj kykyaqil xjal, moqa ax ikx tiʼja?

Qo ximen tiʼjju ikʼ tiʼj apóstol Pablo. O tzalajxix tuʼnju chojbʼil bʼant tuʼn Jesús ex kyjuʼtzun kubʼ ttzʼibʼen jlu: «[Aju] Tkʼwaʼl Dios in kʼujlanjtze tuʼn, ex xi tqʼon tibʼ tuʼn tkyim tuʼntzun nklete» (Gálatas 2:20). Otoq tzikʼ nim ambʼil tkyimlen Jesús tej tok apóstol Pablo te okslal, noqtzun tuʼnj, aju chojbʼil tzaj tqʼoʼn Dios ik ela toj twitz ik tzeʼn jun oyaj te.

Aju chojbʼil o bʼant tuʼn Jesús, ax ikx jun oyaj o tzaj tqʼoʼn Dios teya tuʼn ttzaj tyekʼun qa nimxix toklena toj twitz. Aju oyaj lu jaku «qʼuqbʼanjtz» tkʼuʼja tuʼn «te jumajx» ex jaku qeʼ tkʼuʼja tuʼn «tiʼj jun bʼaʼn tzul tqʼoʼn Dios» ex tuʼn tonin tiʼja tuʼn tyolina bʼaʼn ex tuʼn tkubʼ tbʼinchaʼna aju bʼaʼn (2 Tesalonicenses 2:16, 17).

Noqtzun tuʼnj, ma tzikʼ chʼixmi kabʼe mil abʼqʼi tkyimlen Jesús. ¿Tiquʼn jaku txi qqʼamaʼn qa kukx at tkʼuʼj Dios qiʼj jaʼlo?