OQʼ APÓSTOL Pedro wen tuʼnju otoq kubʼ tewin qa ojtzqiʼn Jesús tuʼn; iltoq tiʼj tuʼn tok tilil tuʼn tuʼn tjaw twabʼan tibʼ toj tokslabʼil. Noqtzun tuʼnj, kukx tajtoq Jesús tuʼn tajbʼen apóstol Pedro tuʼn tuʼn tok tqʼuqbʼaʼn kykʼuʼj qeju t-xnaqʼtzbʼen. Tuʼntzunju, otoq txi tqʼamaʼn jlu te: «Oktzun tjaw twabʼan tibʼa juntl maj [moqa ‹ajtzin tmeltzʼaj juntl majla toj tnimbʼila›, ATM], kyuwsama qe termaniya» (Luc. 22:32, 54-62). Ok apóstol Pedro kyxol okslal te tnejel syent abʼqʼi ik tzeʼn jun tqan ja (Gál. 2:9). Ax ikx toj ambʼil jaʼlo, aʼyeju o che okxi te ansyan jaku che ok juntl maj te ansyan ex jaku che tzalaj juntl maj aj tok kyqʼuqbʼaʼn kykʼuʼj kyerman.

Atlo junjun kyxol qeju mintiʼtl kyoklen te ansyan jaku kynaʼ qa mintiʼx kyajbʼen. Aju erman Julio tbʼi, * aju ok te mas te 20 abʼqʼi te ansyan toj tnam Bolivia, tzaj tqʼamaʼn jlu: «Chʼixmi tkyaqilju wanqibʼile atztoq in nok nqʼoʼne tiʼj tuʼn tkubʼ nbʼinchaʼn ntene kyiʼj chikʼbʼabʼil, tiʼj tuʼn nxiʼye visitaril qe erman ex tuʼn nxiʼye qʼuqbʼal kykʼuʼj. Ex noq minabʼen (de repente), ya mintiʼtl xbʼant jlu wuʼne ex in kyaj tene mintiʼx jun tiʼ jakutoq bʼant wuʼne. Kwest ela ambʼil lu toj nwitze». Toj ambʼil jaʼlo o tzʼok juntl maj Julio te ansyan.

Aju t-xnaqʼtzbʼen Jesús Santiago tbʼi, kubʼ ttzʼibʼen jlu: «Aqeye wermaniye, qa ma tzaj junxilchaq joybʼil kyiʼje, tzʼokwit te nim tzalajbʼil kyeye» (Sant. 1:2). Atz yolin Santiago tiʼj nya bʼaʼn in tzaj qiʼj tuʼnju aj il qoʼ ex tuʼnju in qo ajbʼen te Dios. Yolin tiʼj nya bʼaʼn achbʼil ex tiʼj alkye tten at maj mas in nok qqʼoʼn qwitz tiʼj kyxilen txqantl (Sant. 1:14; 2:1; 4:1, 2, 11). Aj qtzaj kawin tuʼn Qman Jehová, jaku qnaʼ nya bʼaʼn, noqtzun tuʼnj, nya il tiʼj tuʼn tel tiʼn tzalajbʼil qe (Heb. 12:11).

Qa o tzʼel qʼiʼn jun qoklen toj Ja te Chmabʼil, bʼaʼn tuʼn tok qqʼoʼn qwitz tiʼj jniʼ qʼuqbʼil qkʼuʼj at ex qyekʼunx  te Jehová qa kʼujlaʼn quʼn. Ax ikx bʼaʼn tuʼn qximen tiʼj tiquʼn qajtoq qoklen aju. ¿Tuʼnpe in qo ximentoq oʼkx qiʼjx? ¿Moqa tuʼnju kʼujlaʼn Jehová quʼn ex el qnikʼ qa te Jehová qe erman ex il tiʼj tuʼn kyokxix xqʼuqit toj tumel? (Hech. 20:28-30.) Aʼyeju ermano o che okxi te ansyan ex kukx in che ajbʼen te Dios in xi kyyekʼun kye kykyaqil, axpe ikx te Satanás qa ax tok at kykʼuʼj tiʼj Jehová.

Tej t-xi kawin ajkawil David tuʼnju otoq kubʼ tbʼinchaʼn junjun nimaq il, xi tkʼamoʼn kawbʼil ex kubʼ najsaʼn til. Yajxitl xi tbʼitzin jlu: «At tzalajbʼil kye xjal in kubʼ najsaʼn kyil ex in kubʼ maqsiʼn kyil. At tzalajbʼil te xjal aju mlay tzaj naʼntl til tuʼn Qman ex mintiʼtl sbʼubʼl tuj tanmi» (Sal. 32:1, 2). Aju kawbʼil xi qʼoʼn te onin tiʼj tuʼn tok te jun tbʼanel xjal ex tuʼn tok te jun tbʼanel xqʼuqil tiʼj ttnam Dios.

Chʼixmi kykyaqil qeju erman in che ok juntl maj te ansyan mas in che ok te jun tbʼanel xqʼuqil twitz toj tnejel maj. «Jaʼlo jaku chin oninxixe kyiʼj qeju in che el txalpaj», chi jun kyxol qeju o tzʼok juntl maj te ansyan. Ex at juntl tzaj tqʼamaʼn jlu: «Jaʼlo mas nim toklen woklene toj nywitze aju tuʼn wajbʼene kye erman».

Kubʼ ttzʼibʼen jun salmista jlu: «Bʼaʼna Nman ex in kubʼ tnajsaʼna kyil xjal» (Sal. 86:5). Tuʼntzunju, mintiʼ tuʼn tkubʼ qximen qa ya mlayx tzʼok qʼuqeʼ juntl maj tkʼuʼj Dios tiʼj jun xjal o kubʼ tbʼinchaʼn jun matij il. At jun ermano Ricardo tbʼi, aju el qʼiʼn toklen te ansyan ex otoq tzʼajbʼen te ansyan toj nim abʼqʼi, tzaj tqʼamaʼn jlu: «Otoq tzaj nimxix nbʼise tuʼnju in nel tzpete. Toj nim ambʼil kubʼ nximane qa mintiʼx wajbʼene ex tuʼn jlu, nyatoq waje tuʼn woke juntl maj te ansyan. In chin tzajtoq xobʼe tuʼnju kubʼ nximane qa ya mlay tzʼok qeʼ juntl maj kykʼuʼj erman wiʼje. Noqtzun tuʼnj, tuʼnju ngane tuʼn wonine kyiʼj txqantl, in xi nqʼoʼntoqe xnaqʼtzbʼil kye xjal, in noktoq nqʼuqbʼaʼne kykʼuʼj erman toj Ja te Chmabʼil ex in chin nexe pakbʼal kyukʼe. Tkyaqil jlu onin wiʼje tuʼn tkubʼ naj nxobʼile, ex toj ambʼil jaʼlo o chin oke juntl maj te ansyan».

Qa at jun ermano ma kux tkʼuʼn qʼoj toj tanmi, mas kwest kʼelel toj twitz tuʼn tok juntl maj te ansyan. Mas bʼaʼn tuʼn tel qkanoʼn techel kyaj tqʼoʼn David, aju iltoq tiʼj tuʼn tel oq twitz nya bʼaʼn ajkawil Saúl. At nim maj  kubʼ qʼoʼn ambʼil twitz tuʼn tok tbʼinchaʼn nya bʼaʼn tiʼj Saúl, noqtzun tuʼnj, mintiʼ taj tuʼn tbʼant tuʼn (1 Sam. 24:4-7; 26:8-12). Ex tej tkyim Saúl toj jun qʼoj, jaw oqʼ tuʼn tbʼis tiʼj tkyimlen Saúl ex tqʼama qa «kʼujlaʼnxix qe» Saúl tukʼe Jonatán, aju tkʼwaʼl, ex qa «nim kygan xjal kyiʼj» (2 Sam. 1:21-23). Mintiʼ kux tkʼuʼn David qʼoj toj tanmi.

Qa toj teya twitz junxitl sela jun tiʼ toj kywitz txqantl moqa in tnaʼna qa ma tzʼok bʼinchaʼn jun nya bʼaʼn tiʼja, miʼn txi tqʼoʼna ambʼil tuʼn tkux tkʼuʼna qʼoj toj tanmiya ex miʼn ximanxixa tiʼj. Jun techel, a William, aju ok junlo 30 abʼqʼi te ansyan toj Gran Bretaña, kux tkʼuʼn qʼoj toj tanmi kyiʼj junjun ansyan tej tel qʼiʼn toklen te ansyan. ¿Tiʼ onin tiʼj tuʼn tten juntl maj t-ximbʼetz toj tumel? Ax tzaj tzaqʼwente jlu: «Nim onin uʼj te Job wiʼje. Qa onin Jehová tiʼj Job tuʼn tten juntl maj tbʼanel kyxol kyukʼe oxe tukʼil, mas jakutoq tzʼonin Jehová wiʼje tuʼn tten juntl maj tbʼanel qxole kyukʼe ansyan okslal qe» (Job 42:7-9).

Qa aya xi qʼamante tuʼn tel iqʼin toklena te xqʼuqil kye ẍneʼl, moqa rit, bʼaʼn tuʼn t-ximana tiʼj tiquʼn xi tqʼamaʼna. ¿Otoq tzaj bʼaj tkʼuʼja tuʼn junjun nya bʼaʼn tzaj tiʼja? ¿At junjuntl tiʼchaq mas ok tqʼoʼn tkʼuʼja tiʼj? ¿Tzaj tbʼisa tuʼnju nya tzʼaqli qe erman? Noq alkyexku tiquʼn kyaj tqʼoʼna toklena, bʼaʼn tuʼn ttzaj tnaʼna qa tej tten toklena te ansyan mas jakutoq tzʼajbʼena kye erman te junxichaq tten. In tentoq kyipumal erman kyuʼn tchikʼbʼabʼila, in neltoq kykanoʼn erman techel in kubʼ tqʼoʼna ex ajtoq t-xiʼya qʼuqbʼal kykʼuʼj erman kyja in nonintoq kyiʼj tuʼn tikʼx junjun nya bʼaʼn kyuʼn. Ax ikx tej ansyan teya in tzalajtoq tanmi Jehová tiʼj tbʼanel aqʼuntl in bʼanttoq tuʼna ax ikx teya in tzalajtoq tanmiya tiʼj (Prov. 27:11).

O tzʼonin Jehová kyiʼj nimku ermano tuʼn kytzalaj juntl maj ex tuʼn tten juntl maj kyajbʼil tuʼn t-xi kyiʼn twitz aqʼuntl toj Ja te Chmabʼil. Qa el iqʼin toklena tuʼn jun tiʼ bʼant tuʼna moqa axa xi qʼamante tuʼn tel iqʼin toklena, bʼaʼn tuʼn t-ximana tuʼn t-xi qʼoʼn juntl maj toklena «te nejenel kyxol okslal» (1 Tim. 3:1). Kukx xi tqanin apóstol Pablo te Dios tuʼn tokxix kyojtzqiʼn okslal te Colosas alkyexix tajbʼil Dios. ¿Tiquʼn? Tqʼama jlu: «Tuʼntzun kybʼete bʼaʼnxix ik tzaʼn tajbʼil Qajaw, ex tuʼn ttzalaj Qajaw kyiʼje tuj tkyaqil» (Col. 1:9, 10). Qa ma txi qʼoʼn juntl maj toklena te ansyan, qaninxa te Jehová tuʼn ttzaj tqʼoʼn tipumala, tpasensa ex tzalajbʼil toj tanmiya. Kyoj qeju bʼajsbʼil tqʼijlal jaʼlo, tajxix ttnam Dios tuʼn t-xi onin kyuʼn tbʼanel xqʼuqil. ¿Jaku bʼant ex taj teya tuʼn tok tqʼuqbʼaʼna kykʼuʼj termana?