¿TIQUʼN AT JUNJUN MINTIʼ IN NOK QEʼ KYKʼUʼJ TIʼJ? At nim xjal in kubʼ kyximen qa najchaq taʼ Dios kyiʼj. «A weye toj nxim, aju qa jun Dios te aju bʼinchal tkyaqil», chi jun xuʼj te tnam Irlanda ex in bʼet tkyaqil seman toj iglesia. Ex in tzaj tqʼamaʼntl jlu: «Noqtzun tuʼnj, mintiʼ ojtzqiʼn Dios lu wuʼne. Mintiʼ in nnaʼne qa in chin nok laqʼeye ttxlaj».

¿TIʼ IN TZAJ T-XNAQʼTZAʼN TYOL DIOS? Atlo maj jaku qnaʼ qa najchaq atoʼ ttxlaj Dios, noqtzun tuʼnj, mlay qo kyaj ttzaqpiʼn Dios. Kubʼ tqʼoʼn Jesús jun techel tiʼj alkye tten in qo ok t-xqʼuqin Dios tej tqʼama jlu: «Qa at jun xjal at jun syent t-ẍneʼl, ex qa ma kyaj tzpet jun, ¿mlaypelo che kyaj tqʼoʼn qeju 99 twi witz, ex kxeʼl jyolte aju otoq kyaj tzpet?». ¿Tiʼ in tzaj tyekʼun jlu qe? In tzaj ttzaqʼweʼntl Jesús: «Kyjaʼtzun, aju Kymane at tuj kyaʼj myatzun tajbʼil tuʼn tnaj jun kye qeju tal chʼin lu» (Mateo 18:12-14).

Kykyaqil «qeju tal chʼin lu» nim kyoklen toj twitz Dios. ¿Alkye tten in xiʼ Dios «jyolte aju otoq kyaj tzpet»? Ik tzeʼn saj tqʼamaʼn taqikʼ Tyol Dios tkubʼ ttxlaj tbʼi xnaqʼtzbʼil, in che tzaj tiʼn Dios qe xjal ttxlaj.

Qo xnaqʼtzan tiʼj alkye tten ax Dios in jyon tiʼj teyele junjun tuʼn t-xi laqʼeʼ ttxlaj. Toj tnejel syent abʼqʼi, xi t-samaʼn Dios jun okslal, aju Felipe tbʼi, onil te jun xjal nim toklen te tnam Etiopía aju in bʼettoq toj tkarwaj ex tajtoq tuʼn tel tnikʼ tiʼj jun yol kyaj qʼamaʼn toj Tyol Dios (Hechos 8:26-39). Ex onin Dios tiʼj apóstol Pedro tuʼn t-xiʼ tja jun nejenel kye soldad te tnam Roma aju in naʼntoq Dios ex in noktoq tilil tuʼn, tuʼn tajbʼen te Dios (Hechos 10:1-48). Ax ikx xi tyekʼun Dios tbʼe apóstol Pablo kyukʼex tukʼil tuʼn kypon tiʼjxi tnam te Filipos. Toj tnam lu, ok kyojtzqiʼn jun xuʼj Lidia tbʼi aju «Naʼl Dyos», ex aju «jqet tanmi tuʼn» Jehová «tuʼn tkubʼ tbʼiʼnxiʼxjuʼ nxitmaʼn» apóstol Pablo (Hechos 16:9-15, XT).

Toj tkyaqil qeju techel lu, ok tilil tuʼn Jehová tuʼn t-xi qʼet ambʼil kye qeju in che jyon tiʼj tuʼn tok ojtzqiʼn kyuʼn. Toj ambʼil jaʼlo, ¿alkyeqe teya toj twitz in che pon kyja xjal ex in che jyon kyiʼj xjal atz jatumel ateʼ tuʼn kyyolin tiʼj Tyol Dios? Nim xjal jaku tzaj kytzaqʼweʼn qa aqe testigos de Jehová. Tuʼntzunju, ximana tiʼj jlu: «¿Nyapetzulo qe jlu in che ajbʼen tuʼn Dios tuʼn tjyon wiʼje?». Awt Dios tzaj tzaqʼwente tnaʼj Diosa tuʼnju in nok tilil tuʼna tuʼn t-xi laqʼeʼya ttxlaj.  *