Junjun xjel in tzaj ttzaqʼweʼn Tyol Dios
¿Jaku qo tzaj kyonin anjel?
Ik tzeʼn toj ambʼil ojtxe e onin anjel tiʼj Daniel, aju jun tmajen Dios, ax ikx jaʼlo in che onin anjel tuʼn tok kybʼiʼn xjal Tyol Dios
Tej atxtoq nim ambʼil tuʼn tkubʼ tbʼinchaʼn Dios qe xjal, tnejel kubʼ tbʼinchaʼn qe anjel (Job 38:4, 7). Aʼyeju anjel nimxix kyipumal lu, in che ajbʼen te Dios. At maj, in che tzaj t-samaʼn Dios anjel tuʼn kyonin ex tuʼn kyxqʼuqin kyiʼj xjal in che bʼin te (Salmo 91:10, 11). Toj ambʼil jaʼlo, in che onin anjel kyiʼj xjal tuʼn tok kybʼiʼn tbʼanel tqanil aju in che pakbʼan t-xnaqʼtzbʼen Jesús tiʼj. (Uʼjinxa Apocalipsis 14:6, 7.)
¿Ape t-xilen jlu qa atz qo naʼl Dios kye anjel tuʼn qtzaj kyonin? Nya ik ttenju, quʼn aju naʼj Dios atzun jun tten tuʼn qkʼulin, moqa tuʼn tjaw qnimsaʼn Dios, ex in tzaj qʼamaʼn qe qa oʼkx te Dios tuʼn qkʼulin (Apocalipsis 19:10). Tuʼnju atz te Dios in che ajbʼen anjel, atz te in che bʼin, ex nya kye xjal. Tuʼntzunju, oʼkx qo naʼl Dios te Qman Dios ex toj tbʼi Jesús. (Uʼjinxa Salmo 103:20, 21 ex Mateo 26:53.)
¿Ateʼpe nya bʼaʼn anjel?
Ik tzeʼn kye xjal, e kubʼ bʼinchaʼn anjel tuʼn tjaw kyjyoʼn alkye kyajbʼil tuʼn tbʼant, qa aju bʼaʼn ex qa aju nya bʼaʼn. Noqtzun tuʼnj, bʼisbʼajilxix tuʼnju at nim anjel el kypan kyibʼ tiʼj Dios (2 Pedro 2:4). A Satanás tnejel anjel el tpan tibʼ tiʼj Dios; yajxitl, ax ikx el kypan kyibʼ txqantl anjel ex e ok te nya bʼaʼn anjel. Kʼitzqeku, i etz lajoʼn Satanás ex qe t-anjel toj kyaʼj ex e kutz xoʼn twitz Txʼotxʼ. (Uʼjinxa Apocalipsis 12:7-9.)
Atxix toj abʼqʼi 1914, ma chʼiy nimxix nya bʼaʼn ex bʼiybʼil. A jlu in tzaj tyekʼun qa noq chʼinxtl ambʼil at tuʼn tkubʼ tnajsaʼn Dios Satanás ex qe t-anjel. Oktzun kʼokel Txʼotxʼ tuʼn Dios te jun tbʼanel najbʼil. (Uʼjinxa Apocalipsis 12:12 ex 21:3, 4.)