1. ¿Tiquʼn nya tzma jaʼlo in nok kybʼiʼn tmajen Dios qa il tiʼj tuʼn ttzaj nya bʼaʼn kyiʼj?

¿TZMAPETZULO in nok qbʼiʼn qa ilxix tiʼj tuʼn tikʼx «nim yajbʼil», moqa nim nya bʼaʼn, kyuʼn tmajen Dios naʼmxtoq ttzaj qʼoʼn oyaj kye tuʼn kyanqʼin te jumajx? Nyalo tzma jaʼlo. Qa ma tzikʼ nim ambʼil moqa naʼmx tikʼ nim ambʼil toklen tojtzqiʼna axix tok, olo xnaqʼtzana tiʼj qa in tzaj nya bʼaʼn tuʼnju a Satanás in kawin kyibʼaj xjal (Apoc. 12:12).

2. a) ¿Alkye juntl nya bʼaʼn in tzaj kyiʼj okslal? (Qʼoʼnka twitza tiʼj tnejel tilbʼilal.) b) ¿Alkye in nok tilil tuʼn, tuʼn kyel ikʼen okslal, ex alkye tten ojtzqiʼn jlu quʼn?

² In tzaj junjun tiʼchaq qiʼj aju «axju in tzaj kyiʼj kykyaqil xjal» tuʼnju ax ikx aj il xjal qoʼ, noqtzun tuʼnj, ax ikx in tzaj juntl nya bʼaʼn qiʼj tuʼnju okslal qoʼ (1 Cor. 10:13). ¿Alkye juntl nya bʼaʼn? Aju ikʼbʼil tuʼnju in che japun tkawbʼil Dios quʼn. Xi tqʼamaʼn Jesús jlu kye qeju lepchiqeʼk tiʼj: «Aju majen mya mas nim toklen twitz tpatrón [...]. Qa ma chin yajlanjtze kyuʼn xjal, ax ikx kyeye che yajlanjtzele kyuʼn» (Juan 15:20). ¿Alkye in nok tilil tuʼn, tuʼn qel ikʼen? A Satanás, aju in tzaj tqʼamaʼn Tyol Dios qa «in tzanun ik tzaʼn jun bʼalun» ex in nok tilil tuʼn, tuʼn «t-xi tchyoʼn» qe tmajen Dios (1 Ped. 5:8). Tuʼntzunju, in najbʼen tiʼxku tuʼn, tuʼn  miʼn qajbʼen te Dios tuʼn tkyaqil qkʼuʼj. Qo xnaqʼtzan tiʼjju bʼaj tiʼj apóstol Pablo.

3-5. a) ¿Alkye nya bʼaʼn tzaj tiʼj apóstol Pablo toj tnam Listra? b) ¿Tiquʼntzun xi tqʼuqbʼaʼn apóstol Pablo kykʼuʼj qe t-xnaqʼtzbʼen Jesús tukʼe jun tqanil qa tzul nim nya bʼaʼn kyiʼj?

³ Nim maj tzaj nya bʼaʼn tiʼj apóstol Pablo tuʼnju ajbʼen te Dios (2 Cor. 11:23-27). Jun maj, tzaj nya bʼaʼn tiʼj toj tnam Listra. Tej otoqxi kubʼ tqʼanin apóstol Pablo jun kox, jaw nimsaʼn apóstol Pablo ex Bernabé, aju attoq tukʼil, ex e ok qʼoʼn te jun dios kyuʼn xjal aʼyeju in che tzalaj wen. ¡E ok ten apóstol Pablo ex Bernabé qʼamalte kye xjal tuʼn miʼn kyok ten kʼulil kye! Noqtzun tuʼnj, e pon junjun judiy siʼmil yol kyiʼj ex tuʼn kyyol e jaw lipen xjal. ¡Jurat naj chʼixpuj kymod xjal! E ok ten xoʼl abʼj tiʼj apóstol Pablo ex kubʼ kyximen qa otoq kyim (Hech. 14:8-19).

⁴ Tej kyikʼ apóstol Pablo tukʼe Bernabé qʼolbʼelte Derbe «e ajtztzun meltzʼaj qe apostl tuʼn kyul tuj tnam Listra, ex tuj tnam Iconio, ex tuj tnam Antioquiy. In kykyuwsaʼntoq kyanmi qe okslal, ex in kyqʼoʼntoq kynabʼl tuʼn kyweʼxix tuj kyokslabʼl, ex in kymaʼn qa ilxix tiʼj tuʼn ttzaj nim yajbʼil qe, tuʼntzun qokx tuj tkawbʼil Dios» (Hech. 14:21, 22). Qa mintiʼ sok qqʼoʼnxix qwiʼ tiʼjju tqʼama apóstol Pablo, mlay tzʼelxix qnikʼ tiʼj. Tuʼnju qa oʼkx xqo ximen tiʼj tqanil qa ok ktzajel «nim yajbʼil» qiʼj, ok ktzajel qbʼis tuʼn. ¿Tiquʼntzun xi kyqʼuqbʼaʼn apóstol Pablo ex Bernabé kykʼuʼj qe t-xnaqʼtzbʼen Jesús tukʼe jun tqanil qa tzul nim nya bʼaʼn kyiʼj?

⁵ Tuʼn tel qnikʼ tiʼj, qqʼoʼnkxix qwiʼ kyiʼj tyol apóstol Pablo. Nya oʼkx tqʼama: «Il tiʼj tuʼn tikʼx nim nya bʼaʼn quʼn». Quʼn ax ikx xi tqʼamaʼn jlu: «Ilxix tiʼj tuʼn ttzaj nim yajbʼil qe, tuʼntzun qokx tuj tkawbʼil Dios». Tuʼn jlu, in nel qnikʼ tiʼj qa atz yolinxix apóstol Pablo tiʼjju oyaj tzul qʼoʼn kye qeju lepchiqeʼk tiʼj Jesús qa kukx ẍe ajbʼen te Dios. Aju oyaj tzul qʼoʼn kye nya noqx gan. Axpe ikx otoq tqʼama Jesús jlu: «Alkye kukx ma tzikʼx tuʼn ex mintiʼ ma kubʼ numj, atzunju ok kletel» (Mat. 10:22).

6. ¿Tiʼ tzul qʼoʼn qe qa kukx ma tzikʼx nya bʼaʼn quʼn?

⁶ Qa ma tzikʼx nya bʼaʼn quʼn, tzul qʼoʼn jun oyaj qe. Ok tzul qʼoʼn chwinqlal toj kyaʼj kye qeju o che jaw skʼoʼn tuʼn kyxiʼ kawil tukʼil Jesús atz jatumel mlay che kyim. Ex tzul qʼoʼn chwinqlal te jumajx tzalu twitz Txʼotxʼ kye «txqantl» ẍnel, moqa rit, atz jatumel «kbʼinchetel aju tzʼaqlxix» (Juan 10:16; 2 Ped. 3:13). Noqtzun tuʼnj, ik tzeʼn tzaj tqʼamaʼn apóstol Pablo, naʼmxtoq tpon ambʼil lu, il tiʼj tuʼn tikʼx nim nya bʼaʼn quʼn. Qo xnaqʼtzan tiʼj kabʼe nya bʼaʼn in tzaj qiʼj aqo okslal qoʼ.

7. ¿Alkye jun nya bʼaʼn jaku txi qʼamet qa qʼanchaʼl?

⁷ Kyaj tqʼamaʼn Jesús jlu: «Che xel qʼoʼne tuj kyqʼabʼ aj sanjelal, ex ok che bʼajel asyaline kyuj ja te kʼulbʼil. Che xel qʼiʼne kywitz qe gobernador ex kywitz qe rey» (Mar. 13:9). A jlu in tzaj tyekʼun qa at junjun okslal ok che okel lipen xjal kyiʼj, at maj tuʼnju nya bʼaʼn qe ajkawil moqa tuʼnju nya bʼaʼn qe nejenel kye txqantl okslabʼil (Hech. 5:27, 28). Qo ximen juntl maj tiʼjju ikʼ tiʼj apóstol Pablo. ¿Tzajpetzulo xobʼ tej tok tbʼiʼn qa jakutoq tzaj nya bʼaʼn tiʼj ik tzeʼn jlu? Mintiʼ tzaj xobʼ (kjawil uʼjit Hechos 20:22, 23).

8, 9. a) ¿Alkye tten kubʼ tyekʼun apóstol Pablo qa otoq bʼaj t-ximen tuʼn tikʼx nya bʼaʼn tuʼn? b) ¿Alkye tten o kubʼ kyyekʼun junjun okslal toj ambʼil jaʼlo qa ik kyximbʼetz ik tzeʼn te apóstol Pablo?

⁸ Ten tipun apóstol Pablo ex kubʼ weʼ twitz nya bʼaʼn tzaj tiʼj tuʼn Satanás. Tqʼama jlu: «Mintiʼ ma kubʼ nximane qa maʼxix toklen nchwinqlale te wexe, oʼkx in chin ximane tiʼj tuʼn tjapun bʼaj aqʼuntl wuʼne tukʼil tzalajbʼil, ex tuʼn tjapun wajbʼebʼle aju o nkʼame te Qajaw Jesús tuʼn t-xi npakbʼaʼne  tqanil bʼaʼn tiʼj t-xtalbʼil Dios» (Hech. 20:24). Tuʼn jlu in nel qnikʼ qa mintiʼ tzaj xobʼ Pablo tuʼn ttzaj nya bʼaʼn tiʼj. Otoq bʼaj t-ximen tuʼn tikʼx noq tiʼxku tuʼn. Atztoq taʼ twiʼ tiʼj tuʼn t-xi tpakbʼan «tqanil bʼaʼn tiʼj t-xtalbʼil Dios».

⁹ Toj ambʼil jaʼlo, at nim erman ik kyximbʼetz ik tzeʼn te apóstol Pablo. Jun techel, at junjun testigos de Jehová toj jun tnam ma tzikʼ chʼixmi 20 abʼqʼi ateʼ toj carcel tuʼnju mintiʼ in nokx kyqʼon kyibʼ kyxol ajkawil. Mintiʼ o txi qʼoʼn tqanil jlu twitz jun jwes tuʼnju aju kyley xjal toj tnam lu mintiʼ in nel tnikʼ tiʼjju in kynaʼn xjal. Mintiʼ in xi qʼoʼn ambʼil kye erman tuʼn kypon qeju toj kyja qʼolbʼel kye ex at junjun kyxol erman lu in che ok bʼiyoʼn ex in nok bʼinchaʼn junjuntl nya bʼaʼn kyiʼj.

10. ¿Tiquʼn mintiʼ tuʼn qtzaj xobʼ qa noq minabʼen saj jun nya bʼaʼn qiʼj?

¹⁰ Toj junjuntl plaj twitz Txʼotxʼ, in nikʼx junjun nya bʼaʼn kyuʼn qerman aju noq minabʼen (de repente) in tzaj. Qa noq minabʼen saj jun nya bʼaʼn tiʼja, miʼn tzaj xobʼa. Ximana tiʼj José aju xi kʼayin te majen, noqtzun tuʼnj, «o kolin» Jehová «tiʼj tuj tkyaqilju yajbʼil te» (Hech. 7:9, 10). Axju jaku bʼant tuʼn tiʼja. Miʼn tzʼel naj tiʼj tkʼuʼja qa «at tipumal» Jehová «tuʼn kyklet qe xjal nimal Dios ok kyok tuj joybʼil kyiʼj» (2 Ped. 2:9). At nim tiquʼn jaku tzʼok qeʼ qkʼuʼj tiʼj Jehová ex tuʼn miʼn qtzaj xobʼ aj qel ikʼun. Ojtzqiʼn quʼn qa jaku qo klet tuʼn tiʼjju nya bʼaʼn in tzaj qiʼj kyuʼn nya bʼaʼn xjal ex jaku tzaj tqʼoʼn ambʼil qe tuʼn qanqʼin te jumajx tjaqʼ Tkawbʼil (1 Ped. 5:8, 9).

11. ¿Tiquʼn junxitl nya bʼaʼn qʼanchaʼl twitzju nya bʼaʼn mintiʼ qʼanchaʼl?

¹¹ Aju juntl nya bʼaʼn jaku tzaj qiʼj aju mintiʼ qʼanchaʼl. ¿Tiquʼn junxitl jlu twitzju nya bʼaʼn qʼanchaʼl? Tuʼnju aju nya bʼaʼn qʼanchaʼl ik tten ik tzeʼn jun kyqʼiqʼ jbʼal, noq minabʼen in tzaj ex jaku kubʼ t-xiten jun ja toj chʼin ambʼil. Atzunte nya bʼaʼn mintiʼ qʼanchaʼl ik tten ik tzeʼn qe pokʼ aju chebʼe chebʼe in xi kywaʼn qe tzeʼ te jun ja ajxi kubʼ xitj jun ja kyuʼn. Atlo maj mintiʼ in nel qnikʼ tiʼj jun nya bʼaʼn tzmaxi otoq bʼaj xitj tkyaqil tuʼn.

12. a) ¿Alkye jun nya bʼaʼn mintiʼ qʼanchaʼl mas in najbʼen tuʼn Satanás, ex tiquʼn in najbʼen tuʼn? b) ¿Tiquʼn tzaj tbʼis Pablo?

¹² Tajbʼil Satanás tuʼn tkubʼ tnajsaʼn qamiwbʼil tukʼil Jehová, qa tukʼe nya bʼaʼn qʼanchaʼl ik tzeʼn ikʼbʼil moqa tukʼe nya bʼaʼn mintiʼ qʼanchaʼl ik tzeʼn chebʼe chebʼe jaku chewix qʼuqbʼil qkʼuʼj tuʼn. Kyxol qeju nya bʼaʼn mintiʼ qʼanchaʼl, aju mas in najbʼen tuʼn, aju bʼis. Jatz tqʼamaʼn apóstol Pablo qa at maj in bʼisun (kjawil uʼjit Romanos 7:21-24). ¿Tiquʼn tqʼama apóstol Pablo qa «bʼekʼbʼilxix» twitz, aju jun xjal attoq jun tbʼanel tamiwbʼil tukʼil Jehová ex axle jun at kyxol qeju Kʼloj xjal Qʼil Twitz Aqʼuntl toj ambʼil aju? Tqʼama qa tnaʼ bʼis tuʼnju aj il te: tajbʼiltoq tuʼn tkubʼ tbʼinchaʼn bʼaʼn, noqtzun tuʼnj, attoq juntl ipumalj in xi iqʼinte tuʼn tkubʼ tbʼinchaʼn nya bʼaʼn. Qa ax ikx teya in tzaj tbʼisa, jaku qeʼ tkʼuʼja tiʼjju ikʼ tiʼj apóstol Pablo.

13, 14. a) ¿Tiquʼn in tzaj kybʼis junjun tmajen Dios? b) ¿Alkye taj tuʼn tkubʼ naj qʼuqbʼil qkʼuʼj, ex tiquʼn?

¹³ At nim erman in tzaj kybʼis, in tzaj bʼaj kykʼuʼj axpe ikx in kynaʼn qa mintiʼ kyajbʼen. Jun techel, at jun precursora aju kʼokel qqʼoʼn tbʼi te Débora, in tzaj tqʼamaʼn jlu: «Qa ma kubʼ nbʼinchaʼne jun nya bʼaʼn, in chin ximane jun maj ex juntl maj tiʼj, ex qa ma bʼant jlu wuʼne mas in nnaʼne nya bʼaʼn. Qa ma chin nok tene ximel tiʼj tkyaqilju nya bʼaʼn otoq bʼant wuʼne, in kubʼ nximane qa mix aʼl jun jaku tzʼok kʼujlan weye, axpe ikx Jehová».

¹⁴ ¿Tiquʼn at junjun tmajen Jehová in kynaʼn ik tzeʼn in tnaʼn Débora? At nim tiquʼn. At maj tuʼnju at junjun in kubʼ kyximen  nya bʼaʼn kyiʼjx ex tiʼjju in nikʼ toj kyanqʼibʼil (Prov. 15:15). Ex at junjuntl, tuʼnju at jun kyyabʼ aju in bʼinchan nya bʼaʼn tiʼj kyximbʼetz. Noq alkyexku tiquʼn in tnaʼn teya nya bʼaʼn, bʼaʼn tuʼn ttzaj tnaʼna alkye jun taj tuʼn tajbʼen jlu tuʼn. ¿Alkye tajbʼil tuʼn tkubʼ tnaʼna ik tzeʼn te in tnaʼn, aju ok kkyimel te jumajx? (Apoc. 20:10.) ¿Alkye tajbʼil tuʼn ttzajxix tbʼisa tzmaxi aj tkubʼ tzʼaqa? Ikju, a Satanás. Qa ma tzʼajbʼen nya bʼaʼn tuʼn aju qʼanchaʼl moqa aju nya qʼanchaʼl, noq junx tajbʼil tuʼn tkambʼet: aju tuʼn ttzaj bʼaj qkʼuʼj, tuʼn ttzaj qbʼis ex tuʼn qkubʼ tzʼaq. Miʼn tzʼel naj jlu tiʼj tkʼuʼja: at ttnam Jehová toj jun qʼoj tuʼnju il tiʼj tuʼn tkubʼ tyekʼun qa in najbʼen te Jehová tuʼn kʼujlabʼil.

15. ¿Alkye il tiʼj tuʼn tbʼant quʼn?

¹⁵ Kukx tzʼok tilil tuʼna. Kukx ximana tiʼj oyaj tzul qʼoʼn teya. Xi ttzʼibʼen apóstol Pablo jlu kye okslal te tnam Corinto: «Mintiʼ in qo kubʼ numje maske kyjaʼ tbʼaj tipun qximlale, pero aju qanmiye in tkʼmoʼn akʼaj tipumal junjun qʼij. Porque aju yajbʼil qeye jaʼlo mya nim ex noq te jurat, pero tuʼn jlu ktzajel qʼoʼn jun qoklene maʼxix ex te jumajx» (2 Cor. 4:16, 17).

16. ¿Tiquʼn ilxix tiʼj tuʼn tkubʼ qbʼinchaʼn qten jaʼlo tiʼjju nya bʼaʼn jaku tzaj toj ambʼil tzul?

¹⁶ Ik tzeʼn ma qo xnaqʼtzan tiʼj, in najbʼen nim «sbʼubʼl» tuʼn Satanás (Efes. 6:11). Teyele junjun qe il tiʼj tuʼn t-xi tbʼiʼn aju nabʼil tkuʼx toj 1 Pedro 5:9 aju in tzaj tqʼamaʼn: «Che weʼxixe twitz, kyuw kytene tuj kyokslabʼle». A jlu in tzaj tyekʼun qa il tiʼj tuʼn tkubʼ qbʼinchaʼn tten qnabʼil ex qanmi jaʼlo, tuʼntzun t-xi qxnaqʼtzan qibʼ tuʼn tkubʼ qbʼinchan bʼaʼn. Ik tzeʼn kye soldad in che bʼaj xnaqʼtzaʼn, naʼmxtoq kyxiʼ toj qʼoj. Chʼixmi axju in bʼaj qiʼj. Mintiʼ ojtzqiʼn quʼn tiʼ qo okel weʼ twitz toj ambʼil tzul. Tuʼntzunju, qxnaqʼtzanx qibʼ toj ambʼil jaʼlo akux atoʼ chʼin toj tbʼanel. Xi tqʼamaʼn apóstol Pablo  jlu kye okslal te tnam Corinto: «Che ximane kyiʼjxe qa waʼl qeʼxe tuj kyokslabʼle; tzikʼwit kywitze kyiʼjxe» (2 Cor. 13:5).

17-19. a) ¿Tiʼ jaku bʼant quʼn tuʼn tok qqʼon qibʼ toj malbʼil? b) ¿Alkye tten jaku che bʼaj xnaqʼtzet kuʼxin tuʼn kykolin tiʼj kyokslabʼil toj tja xnaqʼtzbʼil?

¹⁷ Jun tten tuʼn tok qqʼon qibʼ toj malbʼil, ik tzeʼn tqʼama Pablo, aju qa ma qo ximen qiʼjx. Qo ximen kyiʼj xjel lu: «¿In chin naʼne Dios toj tkyaqil ambʼil? ¿In chin koline tukʼe tkyaqil wipumale tiʼj wokslabʼile? ¿In xi nnimane Dios tnejel ex nya kye xjal aj wok weʼye twitz jun nya bʼan? ¿In chin bʼete kyoj kykyaqil chmabʼil? ¿Atpe npasense kyiʼj wermane aj kyel txalpaj ik tzeʼn kye at kypasens wiʼje? ¿In xi nbʼiʼne aju in tzaj kyqʼamaʼn ansyan toj Ja te Chmabʼil ex qeju qʼil twitz aqʼuntl toj tkyaqil twitz Txʼotxʼ?».

¹⁸ Qa ma tzʼok tqʼoʼn twitza kyiʼj kabʼe xjel ma che kyaj, in che yolin tiʼjju tuʼn qkolin tuʼn tkyaqil qipun tiʼj qokslabʼil ex tuʼn miʼn t-xi qqʼoʼn ambʼil kye junjuntl xjal tuʼn ttzaj kyqʼamaʼn qe tiʼ kbʼantel quʼn. Nim qe erman tzma kuʼxin il tiʼj tuʼn tbʼant jlu kyuʼn toj tja xnaqʼtzbʼil. O txi kyxnaqʼtzan kyibʼ tuʼn miʼn kytzaj xobʼ ex tuʼn miʼn kytzaj chʼixwi tiʼjju in nok qeʼ kykʼuʼj tiʼj, tuʼntzunju, mintiʼ in che xobʼ aj kypakbʼan. O che etz qʼamaʼn junjun nabʼl kyoj quʼj. Jun techel, toj uʼj ¡Despertad! te julio te 2009 tzaj qʼamaʼn qa at jun kuʼxin ma tzaj qanin jlu te tuʼn jun tukʼil toj tja xnaqʼtzbʼil: «¿Tiquʼn in kubʼ t-ximana qa at Dios, ex nya ik tzeʼn in qo xnaqʼtzan tiʼj qa mintiʼx jun bʼinchal qe?», jaku txi ttzaqʼweʼn kuʼxin jlu: «¿Tiquʼn kxel nnimene qa mintiʼ Dios? Quʼn axpe ikx qeju in kubʼ kyxnaqʼtzaʼn qa mintiʼ Dios mintiʼ in mojeʼ twiʼ kyyol ex aqewtlo at kyojtzqibʼil tiʼj jlu». Aqeye mambʼaj, che xnaqʼtzane kyukʼil kykʼwaʼle tuʼn t-xi kyqʼoʼn jun tbʼanel tzaqʼwebʼil kye xjelbʼitz ik tzeʼn jlu toj tja xnaqʼtzbʼil.

¹⁹ Ax tok, at maj kwest tuʼn qkolin tiʼj axix tok moqa tuʼn tkubʼ qbʼinchaʼn junjun tiʼchaq in tzaj tqanin Jehová qe. Aj tbʼaj jun qʼij aqʼuntl, atlo maj il tiʼj tuʼn tok q-obligarin qibʼ tuʼn qxiʼ kyoj chmabʼil. Ex atle maj kwest tuʼn qjaw weʼ toj qwatbʼil tuʼntzun qxiʼ pakbʼal te prim, moqa te qlax. Noqtzun tuʼnj, bʼaʼn tuʼn ttzaj tnaʼna jlu: qa ma txi t-xnaqʼtzan tibʼa tuʼn tbʼant qe jlu tuʼna jaʼlo, in bʼaj t-xnaqʼtzan tibʼa aj tok weʼya twitz nim nya bʼaʼn toj ambʼil tzul.

20, 21. a) Qa in qo bʼisen, ¿alkye tten jaku tzʼonin qiʼj aju qa ma qo ximen tiʼj chojbʼil? b) ¿Tiʼ bʼaʼn tuʼn tbʼant quʼn?

²⁰ ¿Tiʼ jaku bʼant quʼn tuʼn miʼn qkubʼ tzʼaq aj ttzaj junjun nya bʼaʼn aju mintiʼ qʼanchaʼl, ik tzeʼn bʼis? Jun tbʼanel tten tuʼn miʼn qkubʼ tzʼaq tuʼn, aju qa ma qo ximen tiʼj chojbʼil, ik tzeʼn bʼant tuʼn apóstol Pablo. At maj tzaj tbʼis tuʼnju aj il te, noqtzun tuʼnj, ximen tiʼj qa mintiʼ kyim Jesucristo tuʼn kyklet xjal tzʼaqli, sino tuʼn kyklet xjal aj il, ik tzeʼn te. Axpe ikx kubʼ ttzʼibʼen: «Tuʼn wanqʼine twitz txʼotxʼ noq tuʼn wokslabʼle tiʼj Tkʼwaʼl Dios in kʼujlanjtze tuʼn, ex xi tqʼon tibʼ tuʼn tkyim tuʼntzun nklete» (Gál. 2:20). Ikju, ok qeʼ tkʼuʼj apóstol Pablo tiʼj chojbʼil ex kubʼ t-ximen qa kyim Jesús tiʼj.

²¹ Qa ma kubʼ qximen qa jaku tzʼonin chojbʼil qiʼj tuʼnju jun oyaj jlu o tzaj tqʼoʼn Jehová qe, jaku tzʼoninxix qiʼj. Ax tok, nya t-xilen jlu qa jurat naj kbʼel naj bʼis. At junjun qe il-lo tiʼj tuʼn tok tilil quʼn tuʼn miʼn qkubʼ tzʼaq tuʼn nya bʼaʼn aju mintiʼ qʼanchaʼl ajxi tul Tbʼanel Najbʼil. Noqtzun tuʼnj, ¡kukx tzʼok tilil tuʼna! Naʼntza qa ok tzul qʼoʼn oyaj kye qeju ok kikʼex nya bʼaʼn kyuʼn tzmaxi aj tul bʼajsbʼil tqʼijlal. Mas nqa atoʼ tiʼj qʼij jatumel ok tzul tiʼn Tkawbʼil Dios tzalajbʼil ex ok kʼonil kyiʼj kykyaqil tbʼanel xjal tuʼn kyok te tzʼaqli. Kukx ximenkuya tuʼn tokxa toj Tkawbʼil Dios maske, moqa inchq, ma tzaj nim yajbʼil tiʼja.